Khrîsmâs Hmasa Tak Hmangtu Hâi – Rev. Cliff Kawldinglien Joute

Part – 3

KHRÎSMAS HMASA TAK HMANGTÛ, KHAWSAK MI VAR HÂI:

Îsû Khrîstâ, Pathien thil thlâwn pêk po po lâiâ ropui tak pieng thû chu mi var hâi kuoma ârasî hmangâ puong lê inhriettir an nih. “Khawsak tiengâ Ȃrasî kan hmu â, amâ chibai bûk dingin kan hung a nih” (Matt. 2:2) tiin khawsak tiengâ inthawkin Bethlehem-a Khrîsmâs hmasa tak chu hmang dingin ârasî an hmû chu hung zui hâi sien khawm, an thiemnâ, varna lê inchûkna hâi hmangin, Jerusalem-a nâw chu lal thar a pieng dingin an ring nâw leiin Herod in chu an pan ta chawt thû ei hmu â.

Mihriem thiemnâ, varna hmangtû tâ ding chun, Lal thar hung pieng chu, lal Herod in-ah an va zawng chu an thâw suol talaw bêk bêk nawh. Pathien Thû ni lovâ hrietnâ, varna le inchûkna changchâwitû an ni tlat leiin. Chuong lâi zingâ ei hriet dingâ pawimâw chu ei thiemnâ, varna lê lêkhabû tam tak hmangâ ei inchûkna hâi hi Îsû Khrîstâ ei hmûna ding mi dâltû hmangruoin inchang pal a tih tî ruok chu thil inlâuum tak a nih. Bâibul khawm hi thluok hrietnaâ tiem lê hriet thei a ni â. Ei Bâibul tiem hi Pathien Thlarâu Thienghlimin a sukhring nâw chun hringnun a sukdanglam chuong nâw leiin ei thu hril ngâithlatû hâi tâ dingin nghawkumin â’n chang lem hlak a nih.

Khawsak mi var hâi chu lal Herod in-â Lal thar pieng an va zawng chu an hlâwsam dêr hnungin, Pathien-in zâwlnei Mika kuoma Judai ram Bethlehem khawâ Israel Ro rêltû lê Vêngtû ding hung pieng ding a lo hril lâwk thû, Pathien Thû (Bâibul) hmangin Lal thar piengna hmun chu hril hriet an nih (Mika 5:2). Chuong chun ârasî chu khawsak mi var hâiin nâutê umna hmun an tlung hmâkhat chun an hmaa a fê pei â (Matt.2:9). Îsû Khrîstâ hi khawvêl varna lê thiemnâ hmangâ hmû lê zawng suok chî an’ nâw zie khawsak mi var hâiâ inthawk hin hriet thei a nih. Chû leiin, Îsû Khrîstâ hi chieng takâ ei hriet â, Khrîsmâs indik tak hmangtû lê changtû ei nî ngêi theina dingin Bâibul-a (Pathien Thua) kîrin, inchûk thar nâwk dingin ei infiel a nih.

Bethlehem-â nâutê Îsû piengna hmun an tlung chun an bawk khup â, chibai an bûk â, an ro bâwm hâi hawngin lâwmna thilpêk: Rângkachak, Berraw lê Murra hâi an inhlân â. Rângkachak chun Îsû Khrîstâ chu Lal, hotu hâi Hotû indik tak a nih tî â’n entir; Beraw hin Îsû chu thiempu lal tak, amâ thisen ngêi châwiâ Pâ hmaâ ei tâ dingâ inthâwina famkim lê khawvêlâ Pathien lê mihriem inkârâ remna palâi sin thâwtû ding a nih tî â’n entir. Murra chun khawvêl sandamtû Eden suolna hâi po po tho nâwk ta lo dingâ thlânâ vûi ding a nih tî â’n entir.

Tiemtu dit tak, vawisûn hin Îsû Khrîstâ chu mihriem taksa put lâi ang takin, hmuin chibai i bûk thei ta nâw khawm a ni thei. Hla siemtû’n ‘Lungril a kuom tieng hawng inlâ, ro thil dang ngâi ta nawh ni’ a lo tî angin, vawisûn hin i nei po po hluotû ‘i lungril’ kha Lalpâ’n a dit a nih. Îsû Khrîstâ hmu chiengtû hâi chun Îsû Khrîstâ chu a nîna ang takin chibai an bûk â, Îsû Khrîstâ tâ dingin inro an nei ngâi bawk nawh.

Ieng leiâ khawsak mi var an tî am nî’ng a t’â? Pathien thu ngâisaktû an nî hi an varnâ a nih: Khawsak mi var hâi hin, “Jacob-â inthawk Ârasî hung suok a t’â, Israel-â inthawk chun lal hmawl hung suok a t’â,” tîâ (Num. 24:17) Mosie-in a lo ziek hi an tiemin, an ngâisak hlê ring a um. Bâibul hi tiem ngun â, a umzie hriet lê â’n chûktir tum tak hriet hi Bethlehem-â Khrîsmâs hmasa tak hmangtu indik tak nun a nih.

Lal lê sandamtû dingâ Pathien-in a thlang lê ruot hmaâ bawk khupâ chibai an bûk hi an varnâ a nih. Îsû kha mi var hâiin an va hmu khan nâupang chau la ni sien khawm a hmaâ bawk khupâ lâwmna thilpêk an inhlân hin Lal dingâ an pawm tî â’n entir a nih.

Lampui danga an kîr kha an varnâ a nih. Îsû an hmu â, chibai an bûk hnungâ lampui hlui, nun hlui tieng kîr ta lovin, Lalpâ’n an fêna ding lampui him, lam thar an hriettir ang takâ an kîr nâwk hi an varna lê Khrîsmâs indik tak hmangtû an nînâ a nih.  Îsû Khrîstâ hmû chu lampui thar hrâw lê lampui thlâk nun a ni si â. Pathien mi ṭhuoina lampui lê a dit zâwng hriet tumâ Amâ lê inpâwl zing pumâ hringnun hmang dingin ei infiel â. Bethlehem-â Khrîsmâs hmangtû indik tak chun lampui thlâk a pawimâw. Lampui, Hringna lê Thu tak zuiâ Khrîsmâs hmangtu indik tak ni dingin ei infiel a nih.