Kohran dang dangâ inthawk lê ruol ṭhâ ṭhenkhatin telephone hmangin, “Khrîsmâs iengtin am in hmang ding?”, “Khrîsmâs in hmang thei ding am?”, “Khrîsmâs ruoi in ṭhê ding am?”, “Khrîsmâs carol lê lêngkhâwm in nei thei ding am?” tî hâi hi an mi hung indawn zawm zut hlak â. Hieng indawnna hâiâ inthawkâ ka ngâituonâ hung um chu, COVID-19 hripui lê inzawmâ tû lâiâ ṭawngbâu thar suok lê inlâr êm êm chu ‘New normal life’ tî hi a nih. ‘New normal life’ chu einî ṭawng chun, ‘Nun dân phung thar’ tîin kan hang inlet â, hi nêkâ indik lê mâwi lem khawmâ inlet thei nî’ng a tih. Hî khêl tienga hin chu. ‘nun dân phung thar’ hrilnain ‘New normal life’ tî ei hung hmang pei ta lem ding a nih.
Covid-19 hripui inlêng hmaa ei normal life chu intîmna lê vêng thâwng ding rêng um lovâ pîsâ, school, college hâi hawng, mipui pung khawm hut hut, biek in-a a hûhovâ Pathien chibai bûk inkhâwm (corporate worship), ruol ṭha hâi lê inpâwl khâwm dur dur, thawveng taka pui pung khâwmna hmunâ um lê bazar kâi lê a dang dang hâi a ni hlak. Chun, hripui inlêng hmâ chun hmâi tuom hâi sipai an ni nâw leh mi suol lê mi ṭha lo angin in ei ngâi hlak. Covid-19 hripui inlêngna hnuoia ruok chu hmâi tuom hâi chu mi fel lê sawrkâr thupêk pawisatû an hung ni ta lem.
Normal life (nun dân phung pângngâi) hnuoia hlim takâ nun hmangtû hâi hringnun chu Covid-19 hripuiin ‘New normal life’ (Nun dân phung thar) a mi hung thlâk danglampêk â. Chû new normal life hnuoia chun nî dang lê hun danga pângngâi tak lê thawveng takâ mipui tam tak pung khâwm dâm, mipui tam tak fê khawmâ Pathien chibai bûk â, biek in inkhâwm dâm, kohran lê pâwl hmingâ inkhâwmpui nei dâm lê thil dang dang chu a lo remchâng awzâwng ta nâw a nih. Chuong angâ um lê thâw nâwtû hâi chu sawrkâr ngâiâ mi fel, thu âwi an hung ni ta pei bawk. Chuong ang peiin, Covid-19 leiin hmun ṭhenkhat a chun ei Khrîsmâs lâwm dân lê hmang dân khawm ni dang lê kum dang angin a hung danglam ding ni ta sien a hawi.
Hi lê inzawmin Khrîsmâs Nun Dân Tharâ hmangtû hâi tî thupui hmangin Pathien Thû ei hei hung thur dawk nâwk hi ngun takâ lo ngâituo zui dingin ka hung fiel chêu a nih.
Bethlehem dâifêma berâm vêngtu hâi chu ngîrhmun inhnuoi takâ um ni hâi sien khawm, ringum takâ sin thâwtû (berâm vêngtu) an nî leiin Khrîsmâs hmasa tak nun dân phung tharâ hmang dingin Vântirko lê vân mipui hâiin ṭawngbâu lê hlapâwl mâwi tak hmangâ inhriettir lê fiel an nih (Lk.2:1-12). Chung tieng inhriettirna lê fielna ropui lê mâwi tak dawngtû Berâm vêngtu hâi chun an thu hriet lê fiel an nîna chu nghâk khawtlâi el lovin, inhmâw takin Bethlehem-a Khrîsmâs hmasa tak dân phung tharâ hmang ding chun inhmâw takin an fê nghâl thû ei hmu â (Lk. 2:16).
Bethlehem-â nâutê Îsû chu an hmu â, ditsakna chibai an inhlân zovin Pathien châwimâwi lê inpâk pei pumin an berâm mâksanna (sin thâwnâ) hmuna chun an kîr nâwk ta a nih (Lk.2:17-18). Nâute chanchin thû vântirkovin a hril kha an hril vêl â, chuong chun berâm vêngtu hâi thu hril lê hmû chu a hre ta phawtin mak an ti hlê. Khrîsmâs nun dân phung tharâ hmang hmasa taktû hâi chu an va hamṭha de!
Tiemtu dit tak, berâm vêngtu hâiin Bethlehem-â nâutê Îsû an hmu â, an nun dân phung pângngâiâ (normal life) inthawkin nun dân phung thar (new normal life) neiâ an sin thâwna hmun tieng Pathien châwimâwi lê inpâk pei pumâ an kîr nâwk thû lê Khrîsmâs hmasa tak an hmang dân thû an hril chu a hre ta phawt mak tî a nî ang khan, einî Khrîsmâs 2020 hmangtu hâi hin ei nî tin kalchâwina dâm, ei lêkha inchûk nuom dân dâm, ei pîsâ kâi nuom dân dâm, ei rawng bâwl nuom dân dâm, fâk le dâwn ei zawng dân dâm, nâu le tê ei enkawl dân dâm, Khrîstâ nêkâ thil dang ei ngâi hlut dân dâm, ei inchei dân dâm hung danglam vê sien nuom a va um de! Covid-19 hrî-in ei nun dân phung a mi sukdanglam ang hin Khrîsmâs 2020 ei hmangna a hin danglamna nei dingâ ko le inhriettir ei nih.
Khawsak mi var hâi chun lal Herod in-a Lal thar pieng an va zawng chu an hlâwsam dêr hnungin Pathien Thû hmangin Îsû Khrîstâ piengna hmun inhriettir an nî thû (Mika 5:2) lê Lal ârasî-in nâute umna hmun an tlung hmâkhat chun an hma a ṭhuoi pei thû ei hmu â (Matt. 2:9). Einî khawm normal life, hnuoia dân pângngâiin kum tam tak, vawi tam tak Khrîsmâs ei lo hmang rawp ta hlakâ chu, Khrîsmâs Neitu Îsû Khrîstâ ei zawngna hmun â’n dik nâw leiin Khrîsmâs ruoi, thuomhnaw thar, decoration lê dân pângngâi lêngkhâwm hall bâk chu ei pel thei nâw chu a ni deu tak.
Bethlehem-â nâute Îsû piengna hmun an tlung chun an bawk khup â, chibai an bûk â, an ro bâwm hâi hawngin lâwmna thilpêk: Rângkachak, Berraw lê Murra hâi an inhlân thu ei hmu nâwk â. Isaac Watts-in Khrîsmâs hlâ inlâr tak, “Joy to the World” (Lalpâ a hung khawvêl hlim sien) tî hlaa ‘Lungril tin in hmun pe hâi sien” tîâ a lo hril angin, Khrîsmâs Neitû, Îsû Khrîstâ’n Lalnâ ei niâ a chang theina dingin ei lungril hmun inkienin, Khrîsmâs Indik tak tlungna lê neitu ni lem ei tîu. Khawvêl thuomhnaw mâwi tak inchawin, nei thei nâw lâ khawm Khrîsmâs Neitû i nei â, Amâa chun înthuom phawt chun chuong nêkâ mâwi lê nal a um thei chuong nawh.
Khawsak mi var hâiin Îsû an hmu â, chibai an bûk hnungin lampui hlui, nun hlui tieng kîr ta lovin, Lalpâ’n an fêna ding lampui him, lam thar â’n hriettir angin einî khawm Normal Khrîsmâs-â inthawk New Normal-â Khrîsmâs hmangtû hâi chun an lampui hlui, nun hlui tieng kîr ta lovin lampui thar, Khrîsmâs indik tak hmangtû ni dingin ei infiel a nih. Amen!
Be First to Comment