Mâwina Inhnarum Le Tlo – V.K.Pangamte

Pieng infûk tia ko hming inthang,
Thiemna hau êm êma lam inzing;
Neinungna leia inzâ hlaw hiela hril,
Puo tieng thlîrna mit hmua ṭha el;
A tak le a lem hriet hran vawng ni lo,
Nungchang ṭha chu mâwina ditum.

Fieltu narân tam tak an um thei a,
Tum naw lampui hraw suol chenin;
Intum ding zawnga buoi chang lovin,
Mâni nun in X-Ray zing a pawimaw;
Siet theina le intâng theina a tam si,
Nungchang ṭha thlang chu a hadam.

Ertu le sêltu intuokpui châng khawm,
Suokna remchâng zawng ṭâl ṭâlin;
Hnung tieng le hma tieng en zingin,
Hraw naw ding chen chen zui inchin;
Fîmkhur taka fe diem diem a him,
Nungchang ṭha neitu bula inchûkin.

Khawvêla hin a mâwi le a ṭha intlarin,
Dit zâwng le lâwm zâwng thu tiemin;
A rênga hmu le hriet sêng ni kher lo,
Khawsak dân inang nawa inhnawk;
Insûng mamaw bâka thu rêl ding,
Mi tinin nungchang ṭha chelin aw!

Thlang indik nawa hnung hnawt pêlin,
Ṭhang a thar ang peia nun thara um;
Inchik tlâk le entawn tlâk nun neiin,
Rêl fel ding le siem fel ṭûl hai ṭanin;
A hun laia inkhêlpui lul lova ṭhangin,
Nungchang ṭha pawimaw thu a takin.

Bethel, Tuiṭhaphâi, Tuolbuol ni 17, 2021