SIEMNA SAN, THIL TUM, HMANG DÂN DING
Hî ‘blog’ ka siemna san tak chu, ‘Hmâr Thu Ro Bâwm’ tî inziek ang hin, ei thû le hlâ hâi, hî ‘thu tuikhurâ ’ inluong lûttîr â, intling khâwmtir nuomna lei a ni deu tak. ‘Menu’ sûngâ thu inziek hâiâ inthawk khawm hin hriet thei ni bawk a tih. Ṭûl hun hunâ, nuom hun hunâ, khâw lâi hmunâ inthawk khawmin, zawng buoi, zawng sâwl ṭûl loâ, hei enâ tiem el thei dingin, hmun khatâ sie khâwl lê sie ṭhatna dingâ rîruong a nih. Tiemtû hâiin ei lo sawr ṭhangkâi seng ka beisei.
Kei lê mi ṭhenkhatin, thû kan hung ziek dân hâi hi a lo danglam met el thei, a bîkin ziek ṭhê, ziek kawp lê ri infân (thlûk sei) sinsienâ hmang kimna kawnga. Hieng angâ ziek dân hâi hi la hmû ngâi lo, la hmû ṭhang lo leiin, mak tî tieng lê mit lo kham tâwk khawm ei um el thei. Amîruokchu, ziek dân indikna kawnga ruok chu, a nî dân ding ang takâ ziek tumna lampui hrâw a ni lem. Hiengâ ri infân sinsienâ kim thlap thlapâ ei hmang phât hin, tiem huna khawm, tiem dân ding, thlûk infân dân ding ngâituo buoi, hriet buoi lê tiem indik fâwm ṭûl lo khawpâ chieng lemin, tiemtû hâi a ṭhangpui thei lem hlak a nih. Ziek indikna lampuiâ inthawkâ mi kei pêng â, mi sukpetek theina lakâ mi veng himtû lê mi khal dik theina hmangruo ṭha tak el a nih.
Mi dangin thû an iziek, hi ‘blog-â’ inchuonâ um hâi hi, blog neitû lê enkawltû ngâi dân lê thlawp zâwng a ni chuong kher nawh. Hî kawngâ mâw phurtû lê dawntû ding chu, ziektû ni lem a tih. Thû, ziekâ um chungchâng hril tlâng lê chaina kawnga ruok chu, inphalam loâ ngâi dân hril theina ding kawtkhâr lien tak el hawng a nih. Chuong ang huna chun, inzâ tawnâ, ṭawngbâu mâwi hmangâ hohlimna hmuna (comments section) thâw ni ngêi hlak sien nuom a um bawk.
Thû, ziekâ um hâi hi ni loin, thu ziek dân kawnga ruok chu, ziektu dang dang hâi ziek dân ang charâ inchuonpêk pei a nih. Ziektû hâiin, en felpêk ding lê ziek ṭhatpêk dingâ ngênnâ siemin, phalnâ an mi pêk hâi ruok chu ziek dân thlengpêk thei ka tih.
Pathien-in rem a ti chun, ka mi mal inhnik vêna thu dang dang hâi dâm ka hung inchuon ṭan mêk ang hin, damtê têin hung inchuon pei ka tum bawk.
Thû inchuonâ um hâi hi, hriet chieng nâw leiâ, a nî dân indik tak a lo ṭhel met châng a um pal a ni khawmâ, ziektû annâwleh, blog neitû/enkawltû inhriettir thei nî’ng a tih.
Thu inchuon nuom hâi chun, blog neitû/enkawltû (Joshua Neitham) mobile No. 8974055013 (WhatsApp) annâwleh e-mail Lalhmathuoi@gmail.com hmangâ thawn thei nî’ng a tih. Pawlitiks lê sawrkâr chungchâng, a siet zâwng lê a ṭhatna tieng khawm ni sien, hî blog-a hin inchuon lê hril rem tî ni nâw ni.
Thil thâw vawi khatna hi chu, bâksamna dâm a lo um nuom vieu hlak leiin, blog en lê tiem inhawi lem siemna kawnga, thurâwn ṭhâ petû ding ei um sûng chu, nâ lo sit vê dingin ka inpei zing. Blog hi ieng tik lâi khawm siem ṭhat, thleng lê sukdanglam thei nî’ng a tih.
Kei, blog siemtû chanchin ruok chu, ieng bêk bêk hei hril ding pawimâw taluo a um chuong nâw leiin, inchuon ka tum hran nawh. Ka chanchin nêkin, ei thu inchuon mêk lê inchuon pei ding hâi hi a pawimâw lema ka ngâi leiin, hî blog-a hin hmun hluo bit lem sien tî chu ka nuom dân lê dit dân a nih.
Thuvar hâi 16:1
“Mihriem lungrilin thil a rîruong â, sukpuitlingtû ruok chu Lalpâ a nih.”