Damkhawpui sûngkuo hai, lungril hadamna chibai!
Thu Hmasa:
Tuolbuol ni 20, 2021 (Nilaini) hi Damkhawpui ta dinga ni inchik tlâk a nih. Lt. Col. Rajeev Bakshi Memorial Football Tournament Final – 2021-a hrât tak nina NOPUI dawm phâk ta naw inla khawm, khawsûng inunauna le inthuruolna țha tak hriet le hmu theia a um leiin, lâwm a um tak zet. Ei tlung thei china hin lungâwi dân thiem a pawimaw a, hnung tieng thil ngaituo leia innam kûn naw hrâm dingin ei infiel a nih. Chun, mi dang natna le theida zâwng țawng suok le ziek lang lo dingin ei inngên nghâl bawk. Thil ho te le thil chi tea ei ngai hai khawm, vântlâng hriet a hung ni pha pha chu ring nêkin a pawi sei thei hlak leiin, a thei china țawng le ziek fîmkhur dingin ei inngên mawl mawl a nih. Lungril infuol a țûl a, intheida le inhmêlmâkna nêkin inremna hnawt sau sau lem ei tiu. Khawsûng entawn tlâk le ngainat tlâk lungril pâr suok mawl raw se! Inkhêltu hai an thiem êm êm a, nu le nau ei phûr tlâng a, Village Authority hai inpêkna ngaisâng a um bêk bêk a nih. Inhnelna le inzawma mimal le a pâwla thilpêk petu ha’n sûngkhat nina an târ lang a, hieng ang lungril hi hma tieng peia khawm Damkhawpui mipuiin sawm hring pei inla nuom a um.
Beiseina Tharin Aw:
Ngaituona thar le inbuotsaina thara hun hmang dingin ei inditsak a. Hun țha a la tâwp naw a, insîngsatna hun ei la nei hi hmang thiem seng dingin Pathien-in mi țhangpui pei sienla, ti chu ei țawngțaina a nih. Mihriem nuom dân le dit dâna thil chang le nei vawng thei a ni ngai naw a, tuta țuma inkhêlna zâwl le a hmuna inthawkin inchûk ding țha tak tak ei nei ngêi ring a um, chu chu Damkhawpui-in hmasâwnna’n hmang thei sien a va țha âwm de! Khaw hminga suok hai lai um dân le țawng mâwi naw hmang leia buoina thu hriet ding a um naw a, hi tak hin lungril a suklâwm zuol a nih. Pathien-in rem a tia ei dam tlâng a ni chun, vêl nâwk la pui hum hum dingin beiseina tharin lo nghâk nâwk phawt ei tih. Chû hun tlung thei seng dingin Pathien kuoma țawngțai ei t’a, inkhêltu ding hai khawm inbuotsaina țha lem nei dingin ei ditsak tak zet. Khawsûng hminga inkhêlna sukhmasâwnna dingin mâni theina zâwn senga țhang la a, hun le ngaituona pe tlâng dingin ei infiel bawk. Pakhat khata tiemin tlâwm te ei ni a, ei rênga tiem ruok chun tam tak ei nih. Aw Damkhawpui, vul zing rawh!
Lâwmna Rimâwi:
Khawvêl huopa inkhêlna lâwmman dawng lâwmna rî laia mâwi tak chu hrât tak nina Nopui lâm huola hun hmang a ni kher nawh. Chun, sum tam le thilpêk tle ringawt khawm lâwmman ropui le insâng a tling kher naw bawk. A pawimaw le hlu chu a dawngtu lungril lâwmna a nih. Kum 1998-in Men’s FIFA World Cup Final, France-in a mikhuol a. Final hi Stade de France stadium hmuna inkhêl niin, mipui 80, 000 vêl laia inkhêl a nih. Khâ țum khan France le Brazil ha’n Final an khêl a. Brazil chu mikhuoltu France laka se thumin (3 Goals-in) a tlâwm a. Hrât tak nina hum mêktu (Brazil) ta ding chun lungril na vieu dinga ngai a nih. Anachu, kha taka inthawk khan Brazil chu a tlâwm sawng el naw a, World Cup nâwk (Kum 2002)-a South Korea le Japan inkawpa an mikhuol țumin thei tâwpin țhang a lâk a, a khingpui Germany chu se hni (2 Goals)-in a hnebân a nih. Khâ ṭûm kha Brazil-in khawvêl hrieta hnena Nopui a dawm vawi ngana a ni nghe nghe. Final hi International Stadium, Yokohoma, Japan khawpuia entu mipui 69, 029 vêl laia inkhêl a nih. Inkhêlna le inhnelna hmun chu a thiem sawng bîk um thei lo, insâwk zak zakna hmun ti inla ei hril suol bêk ring a um nawh. Chuleiin, Damkhawpui hin lung hnuol el lovin, lâwmna rimâwi le hrâtna ditum hma tieng a thlîr tlat nuom a um tak zet. Chun, Bakshi Tournament-a lâwmman a dawng khawm hi thu le hla inpawla lâwmna rimâwi insam veng vung khawpa lâwmum a tling a nih. Aw Damkhawpui, thiem le hrât sakhming inthang i nih!
Pathien Zârin:
Hmarbiel sûng le hmun dang danga hriet dân le hmu dânin, Damkhawpui hin hming țhatna chi dang dang a nei a. Inchûkna le Pathien ram rawng bâwlna tieng haia khawm hming a ser țha pei a, hi kawnga hin khaw dang țhenkhat nêka ei vângneizie le malsâwmna ei dawngzie a suklang a nih. Chapo le uong ding ei ni naw lai zingin, mi dang nêka châu bîk le tlâwm bik anga inngai ding ruok chu ei ni nawh. Ei sin thawna senga taima le ringum taka nun ei hmang pei a ni phawt chun, tuta ngîrhmun nêka insâng lem le țha lema um thei ei nizie hi mi tinin ei ring ngam nuom a um a nih. Lekha inchûktu ha’n thei tâwp suo a, lo sin le sin dang dang thawtu ha’n țhang la fan fan a, rawngbâwltu ha’n hmangaina indika kal pênin, chuong anga hun ei hmang thei a ni phawt chun, mi dang laka chîn le inhnuoi bîkin ei um ring a um nawh. Hun hi a hlu a, hmang thiem a pawimaw bawk a nih. Famkim nawna rama la chêng ei ni leiin, hril neu neu le buoina neu neu chu um hlak a tih. Amiruokchu, inremna lungril puta nun ei tiem tlat a ni chun hadamna nei ei tih. Khawvêla hin fâk ding dâm, umna ding dâm, sil le bil dâm zawngin ei invir tak meu a, anachu, lungril hadamna bâka hlu a um chuong nawh. Nun dân mâwi taka umin, sûngkhat ei nina hre zing bawk ei tiu. Aw Damkhawpui, Pathien zâr zovin dam vawng vawng rawh!
Bethel, Tuiṭhaphâi, Tuolbuol ni 20, 2021
Be First to Comment