Mitthli A Tla! – V.K. Pangamte

(L) Mrs. Niengkhawkim Sûnna Thusam

Siemtu indin anga nun hmang ṭhain,
Khawvêl var tiema hma tieng panin;
A hmangaihai ta dinga nun inhlânin,
Rûn insûng le kohran hre zinga inpe;
Theitâwpa khawsak a rêl laiin maw!
Khawvêl mâksanin hmun hlun a pan.

Lainatu le sûntu hai hung inkhâwmin,
Liem el dinga la phal lo, a liem ta si a!
Zân lung mâwk huna ṭap lai ma lovin,
Khawvara ngai lai chu re thei lul lovin;
Chûnnu nun innêm hringnun a tliek a,
A chanchin hrietin sûnna mittui a tla!

Fam inhma ding hrima inbuotsai lo,
Pângngâi taka hringnun hmang hlak;
Taima takin ṭuon sin a rêl thu hmuin,
Nun entawn tlâk le inchik tlâk a sie;
Intodelna chu lungril rila vawng tlatin,
Famkim lo rama lêngin mittui a tla!

A mak ngêi de maw chûnnu liem dân,
Hringmi thiemna le varna khêl tieng;
Ṭuoi hun la nei ve seng dinga nghâk,
Suilung rem dân a na vawng vawng;
La chel thei dinga tlin bîk um lovin,
Thina thlân khêl tieng a’n lâwi ta ie!

Thucha pawimaw le ditum êm êm hi,
A’n hnu hmaa siem ṭha a ṭûl mawl ie;
Hnuoi hausakna le mâwina tehlêm,
Ring lovin, LALPAA innghat lemin aw;
Inṭhena ram innghila lâwm kim di’n,
Nu Niengkhawkim, thlamuong takin!

Bethel, Tuiṭhaphâi, Thlaphal ni 13, 2020, dâr 3:00 p.m.