Sûnna Thusam – V.K. Pangamte

(L) Pu Siemthanglur Khawbung

Sietpui tuok ding hrim dâwn lovin,
A kimtê’n hringnun kan tiem laiin;
Zuopa liemna thu a hung tlung a,
Lung a mi ṭhâwng, hril kan invai ie!
Thu tin kan inzâwt, umzie um ta lo,
Hnung ngai lovin LAL rûn a bêl tah.

Hunpui nghâkin duthu kan sâm a,
Lâwm inruol dinga beiseina neiin;
Zo thlifîm ieng dawnga hlim takin,
Inṭhena boruok inlêng lova ngaiin;
Sienkhawm hnuoi lâwmna a ṭuoi,
Zuopa dit lai chu thina’n a mi ṭhe!

Chel sawng thei dinga hrâtna bo,
Um zing ding dita theina nei si lo;
Thipui khawp thina nunrâwngin,
La dam hai lungril ril natna laina lo;
Thlier bîk nei lova ṭapna intlunin,
Ngai lai Zuopa a her tliek, a na ie!

Hnêmtu ding kan zawng vêl ruoi a,
Lungngaina le beidawngna inthuo;
Thlasietna le thlaphângna indawt,
Hring kan chan sûnga nghil lo di’n;
Thlâkhla taka kan inrem laiin maw!
Zuopa chun kîr rêl lo dinga mi ṭhe!

Kan hlimpui zing lai, Zuopa ngaium,
A ṭhang lova rûn insûng bêl ta ding;
Kan inzuom lul nawh, Zuopa ṭhang lo,
Aw hmangaitu Lalpa, hi hi kan ngên:
‘I kuoma hringna hmun tlung hmasa,
Zuopa Siemthanglur duot takin aw!

Bethel, Tuiṭhaphâi, Thlaphal ni 14, 2020 dâr 10:30 p.m.