Simnâ hei tî hin thil ei thâw, hril lê chîng hlak po po thâw lê hril ta lovâ tâwpsan hmak hi a nih. Bâibul-â (Thuthlung hlui) chun simnâ hrilna ṭawngkam pahni Hebrâi ṭawngin a um â – ‘naham’ (rinum, inrûm) lê ‘shubh’ (kîr, ngha kîr) tî a ni â. Thuthlung thar tienga chun ‘mentanoia’ (lungril thlâk) lê epistrephein (kîr) hmang a nih (Mizo Bâibul dictionary phêk 678). Cambridge English dictionary-a chun “be very sorry for something bad you have done in the past and wish that you had not done it (thil i lo thâw suol tah pawi tînâ nei â, thâw ta dêr ta lo dingâ nuomnâ nei hi a nih) a ti â. Simnâ umzie chu ei hril ta povâ inthawk hin a fie tâwk hlê.
Suol inhriet:
Sim intak ei tîna san pakhat chu, suol nî inhriet nâw lei a nih. Mî’n mi suol, thiem nâw chang, hrem ding a nih tî â’n hriet phâ phât, sandamnâ a zawng nâw thei nawh. Thiem lo chang mi suol a nî ziet â’n hriet chieng po leh ngâidamtû sandamnaa a lâwmna â’n sâng ting el a nih. Ninevi khaw chungâ thil tlungâ inthawk khan ei hriet thei. Suol hrem ding an nih tî zâwlnei Jona kuomâ inthawkâ an inhrietâ inthawk khan simna sâiip puon silin Pathien kuoma an tlu lût â, an suolnaa khan pawi an tî ziet an ti â, am inlam lêt â, a ngâidam an inhni â, Pathien-in an suolnâ ngâidamin a hrem ta nâw a ni kha.
Suol sim nun:
Ninevi khaw lal-in ni sâwmli nia Pathien-in an khuo a sukbohmang ding a nih tî a hriet char khan a lal ṭhungphaâ inthawkin a thovâ, sâiip puon a sil â, vut lâiah â’n țhung a ni kha. Hi hin suol sim um dân fie takin ei hmu thei. Lal ṭhungphaâ inthawkin pilvutah a ṭum thla â, sâiip puon a sil hin a nînâ a danglam ziet ei hmu. Lal puon sil kha sâiip puon a sil â, lal ṭhungphaâ inṭhung kha pilvutah â’n ṭhung a nih, a tlâwm rawng rawng el. Chu khêla, Pathien hmaa, a suolna ngâidam dingin a tlu lût a nih. A suol pawi a tî ziet a nuna hmû theiin a um a nih.
Simna hi Pathien-in a lâwm:
Suol sim hi Pathien lâwm a nih. Israel hâi khawm ieng angin lo suol hâi sien khawm, an suol pawi tîna nei a ngâidam an inhni phawt chun a ngâidam chau ni lovin, a lâwm a nih. Amîruokchu, simnâ tî hin tû chung lê tû lakâ suol am ka nih tî inhriet a ṭûl. Hnuoiâ lal lê thu neitû lakâ am a ni, mânî pasal lakâ am a ni, mânî mihriem chanpui laka khawm a ni thei, ei thil suksuolna kuoma ngâidam inhni chu ei thâw hmasak ding a nih. Îsû Khrîstâ khawmâ ngâidam î’n hni hmâin i thil suksuolna hâi leh inrem hmasa zet ro a tî a nih. Simnaâ inthawk chauvin hmêlma lê inkâra inremna tluontling a um hlak. Chun, hnuoia mânî mihriem chanpui lakâ ei suksuolna hi Pathien hmaâ suksuol ei nih tî ei inhriet a ṭûl â, Pathien leh hringnun lo inzawm ta hâi chun chu chu hril hran ngâi lovâ an hriet a nih. Chuong ang peiin mihriem lakâ suol sima inremna ei nei dâm hin Pathien a lo lâwm êm êm a nih tî hriet a ṭhâ. Indik takin ei thil thâw ta phawt hi Pathien leh â’n zawm zing a ni lem â. Hnuoiâ mihriem chunga i bâwsietnâ, i suksuolna po po kha, chungâ Pathien chunga suksuol i nih tî i suksuolna î’n hriet char khan inhre nghal i tih. Chuong ang bawkin i mihriem chanpui chunga i suol i simnaa khan Pathien a lo lâwm hlê a nih. Ei hril ta ang khan hringnun Pathien leh lo inthlung mat ta hâi chu Pathien kuoma tlu lût lovin an um thei nâw a nih. Nâupâ zâm hmang hung kîr (sim) chungâ Pâ lâwmnâ kha â’n sâng hlê a nih. Mi pakhat chau suol sim chunga khawm Lalpâ Pathien hi a lâwm hlê a nih.
Pathien ram lûtna kâilâwn:
Simna hi mî po po lâwm a ni â, Pathien khawmâ “mi fel sâwmkuo lê pakuo sim ding nei nâw nêkin mi suol pakhat sim chunga vânâ mî an lâwm” a tih (Lk. 15:7). Simna bo chun Pathien Ram lût thei an’ nawh. Îsû khawmâ “Hun chu a hung tlung tah, Pathien lal ram khawm a hung hnai tah. Sim unlâ, Chanchin Ṭhâ hi ring ro” a tih (Mk. 1:14). Sandamna ding khawmâ suol inhriet â, sim â, ring hi a kâilâwn a nih. Suol inhrietna um lo chun simnâ a um thei naw â, simna bo chun sandamna khawp ringnâ a um thei nawh. Hi lâi thû hi Counselor tam takin an fê khêl hlak leiin an hma lãkna khawm a dai sâwt ngâi nâw a nih. Cambridge dictionary hril fiena ang khan, suol pawi tînâ nei â, thâw ta lo dingâ nuomna lungril nei hi thlarauvâ piengtharna dingâ pawimâw a nih. Ram thar, hringna tharâ chuongkâi ding chun mâksan nei a ṭûl. Chû mâksanna tak chu simna lampui a nih. Pathien Ramâ lût ding lê Pathien Ram mî (citizenship) nî ding chun, thâw ding (criteria) a um â, chu lâiâ pawimâw tak pakhat chu ‘simnâ’ hi a nih.
Revival kâilâwn:
Simna bo chun ngâidamna lê revival a tlung thei nawh. Tirko Peter khawmâ “Sim unlâ in suol ngâidamna dingin Îsû Khrîstâ hmingin baptismâ chang ro” (TT. 2:38) a ti â. Simnaâ inthawkin ngâidamnâ a um â. Ngâidamnaâ inthawkin thiem changnâ. Ngâidam lê thiem chang lê inhriet chiengnaâ inthawkin thla muongna lê hlimnâ (revival) a um chau a nih. Suol inhrietnâ, simna lê ringnâ hi a tum ni sî hun tâwi te sûngâ tlung thei vawng a nih. Amîruokchu, hî pathum ṭhang lo chun piengtharnâ a um thei nawh. Khi hâi pathum neina ding hin Thlarâu Thienghlim thil thâw a pawimâw êm êm. Chu chû chang ding chun “po po” hi a pawimâw. Pathien hmangaina hi â’n thûk â, Îsû Khrîstâ inpêkna hi â’n sâng lei hin Thlarâu Thienghlim sin thaw inlangna ding chun pûm sir kâr angâ thâw hin chu a tak chang thei ngâi lo a nih. Lungril kawi dar khawp simna hi revival changna dingâ kâilâwn pawimâw, a bovâ tlung thei lo a nih. Hî ram hi lal David khan a hrâw vê a nih (Sâm 51:4, 17)
Thu tlângkâwm:
Simna hi nun danglam, nun inthlâkthleng a nî leiin, ringtu nun bul inṭanna sirbî a nih. Pathien ram lûtna dingâ kawtkhârpui a tling. Hlimna lo inhmang, nun inhmang hâi tâ dingâ ngâi âw nâwkna dingâ pumpel thei lo kâilâwn a ni â, chû hrâw thlêng hâi chunga chun Lalpâ a lâwm hlak. Thil tam tak ei hriet â, ei inchûk â, amîruokchu lungril kawi darâ simna khawp ei inchûk dawk nâw hi ei hma sâwn thei nâwnâ a ni hlak. Ei camp ei hlim, ei thu ngâithlâk a ṭhâ, ei beiruol ei hlim, ka lêkhabu tiem a ṭhâ ei ti hlak, amîruokchu, mânî suksuolna hmû tum lovâ mi dang suksuolnâ ei hmu lem rawp lei hin simna hmun ei tlung thei ngâi nâw a nih. Sim ding nei lo mi ṭhâ ei tam hi hma sâwnna mi dâltû an ni hlak. Lungril kawi dar khawp simna tlung hâi chun lo thei lovin Pathien Rama an lût â, nun hlimnâ an nei â, mî hriet theiin nun danglam an nei hlak. Insûng khat pâ lê kohran hotu, simna lem chun insûng lê kohrana hmêl thar, boruok thar â’n lang hlak. Simna hi Pathien thil thâw tum sukdanglam thei khawp hiel â Pathien lungril them thei a ni â, a pawimâw êm êm. Chû leiin, sim ding nei nâw hâi chunga nêkin simâ nî tin Lalpâ kuoma tlu lût hâi kuoma, Lalpâ a lâwm â, ringtu hlim, nun danglam put an ni lem hlak (Luka 13:7).
Be First to Comment