Vawitûk chu tûk dangâ ka thâw ngâi lo thil pahni ka thâw a um â. Pakhat chu ka tho zet hnungin ka zâl nâwk â. Pakhat nâwk chu, thil dang ka thâw hmâin, chanchin thar ka ngâithlâk â. Ka thil ngâithlâk chun tû lâi hri thar inlêng thû lê USA President Donald Trump-in ro rêlna court–in thiem lo â’n changtir tâng in-â intâng el thei ding mî sâwm chuong zet a ngâidam leiâ mi tam tak lâwm lê inpâk a hlâw thû a hril â. Thiem lo changâ puong tah, hrem lê tâng in bang zût el hmabâk tah tî inhre hâi chun ngâidamna hi an topui ṭawk ṭawk thei ring a um nawh. Lungril takâ an lâwmna chu hmû theiin an hmêl lê châng zea hâi inlang ngêi a tih. A ngâidam hâi lâia hin a vote campaign lâiâ a sum sukchingpentû lê farutû khawm an um an ti chu! Chuong sâ khawmâ ngâidamnâ a la puongpêk ta rawp chu mihriem lungril pângngâi khêl met put ni thei a tih. Îsû lê Stephan hâi khawm khan, a sawisatû hâi tâ dingin ngâidam an hnîpêk kha thil um thei a nih. Hieng ang lungril hi Khrîsmâs hin a hung châwi sâ a nih.
Pathien thû (Bâibul) ni nâw sien khawm, chanchin thar ka ngâithlâk chun Pathien ngâidamnâ a mî’n ngâituo zawmtir â. Eden bâw sietna suol leiâ thiem lo chang chatuon hremna mei dîl hmabâk el chu Îsû Khrîstâ leiâ thiem chang lê ngâidam ka nîna chu a mî’n ngâituotir tharâ ka lâwm khawp el. Khrîsmâs hmang a mi sukphûr sawt. Îsû Khrîstâ hung piengna hin thiem chang lo, thiem changâ ei umna ding a sun (tin zâwn) a nih tî hre chieng taphawt chun Khrîsmâs hi lungril takin an hlutsak hlak.
Donald Trump-in thiem chang lo hrem hmabâk hâi a ngâidamna chun nghawng a nei inthûk hlê ring a um. Tâng in intâng ding lê sum tam tak châwi ding hâi lâwm an t’â, an sûng hâi lê ruol ṭha hâi lâwm bawk an t’â, an pâwl lâi inûnâunâ ṭhâ um phâ ngêi a t’â, a hmaâ Trump hmu pei nâw hâi khawmâ ngâinat phâ’ng an tih. Donald Trump-in thiem lo chang hâi a ngâidamna hin a mi mal sum hek nâw ni â, a nuhmei lê nâu hâiin tuor phâ bawk nâw ni hâi. Nang lê keia thiem chang lo, thiem changna ding ruok hi chu a man a to a nih. Pâ Pathien-in a Nâupa neisun a hung pêk dawk â, Nâupâ Îsû khawmâ rin hlei thei loin Vân Ropuina lê chawimâwina chu mâksanin, hnuoiâ hungin a hringnâ a hung pêk â. Chû zâra chun thiem lo chang chu, thiem chang theina zubili dâr vuokpêkin ei um a nih. Chîk takâ ei ngâituo chun, Khrîsmâs hi hlimhlawpâ pal liem lê ârsa zeuâ hotel lê restaurant-a inzo el chî an’ nâw a nih. I ngâituo fûk ruok chun “Bethlehem lê Kalvari tlâng chungah suokna dâr â’n ri tah” tîin rinum lê dei khawm ṭî loin, Pathien inpâk â râwl insuo â, khawvar khawm rin ngâi nâw ti nih. A man fu hâi tâ ding chun Khrîsmâs hin sukchim lê indin anniah a nei â, thlâkhlâ khawp a nih. Kum tin Khrîsmâs zât hin anniah pieng thar lê indin thar hi a um â, Khrîsmâs an hmang râwn po leh Khrîstâ angnâ an niah a pung deu deu pei.
Thlarâu mit-â Khrîsmâs hmu fietû hâi chun Khrîsmâs hi inremna lê hmangainâ inlangtirna huna an hmang â. Khrîstâ zârâ ka chang lê ka nei a nih tî inhrein mî tâ dingâ mal sâwmnâ nî vê tumin, mânî tiengâ inpêk suokna huna an hmang hlak. Khrîstâ inpêkna lê hmangaina zârâ thiem lo chang, thiem changâ ei um ang bawk hin Khrîsmâs hun hi nanga leiin tû hâiin am damna lê hlimnâ chang vê’ng an ti âw? Khrîstâ inpêkna leiâ hnuoi lê vân inrem ta lo inrem nâwk theiâ a um ang hin, Khrîsmâs lei hin î’n rempui lo lê hmû pei lo tâ dingin mal sâwmna tluonglam i nî thei ka ring. Hmêlma tâ dingâ mânî nâu neisun inhlân phalna hringnun hi Khrîsmâs hin hung inher suokpui sien, indâidanna bang sukchimin um sien, chuong chun mal sâwmpêk tuonâ hung pieng a t’â, vut âia pâr ṭhi hrui chu a takin hung inchang a t’â, Khrîsmâs hung châwitû khawm lâwm hlê’ng a tih.
Vawi tam Khrîsmâs i lo hmang ta thei, tû kum Khrîsmâs hi hlû lê ṭangkâi takâ hmang dingin Lalpâ hin a mi beisei a nih tî ngâituo tlâng ei tîu. Thiem chang lo, thiem changna chu Khrîsmâs hin a hring dawk ang hin nang lê keia zârin tûin am mal sâwmna lê lâwmna dawng an t’â?
Be First to Comment