(Heb. 11:15-16; 38-40)
Ip set set loâ hril chun, ei vâkvâina khawvêl hi – sum le pâi nei tam hâiin hmun ṭhâ lê hming ṭhat an changna ram, mânî hmasiel thiem hâi hamṭhatna ram, mi fel lê indik hâi sir dêna hmun, mânî inhril mâwi thiem hâi ngîr suokna ram, mi lien lê hausa thî niâ tiem sêng lo lâinatû kimna ram, mi rethei hâi mangang nî lê lusûn niâ khaw lâ’m hmangaitû hâi an um leh tîna ram, châwimâwi lê inpâk phû hlie hlie hâiin sawisêl lê dem siet an hlâwna ram, a nei hâi pêk bel sâna lê rethei nâu hâi an neisun inchû thlâkpêkna ram, hlimna lê lâwmnain tâwp chin a neina ram, thîna lê lusûnna ram a nih.
Vâkvâina khawvêl hi dûthu sâm po po kimna ram an’ naw â, a tîrâ Siemtûin rem ruotna chu nang lê keiin ei nuom a ningâ ei sukdanglam el thei khawm a ni nawh. Ei dit thlangnaâ ṭhang sâ dêr lo ei chunga vângduoina lê harsatnâ a tlung chângin vângduoi bîka ei inngâi hlak â. Nang lê keiin ei dit dânin vâkvâina khawvêl hi um sien lâ chu mi dang hâi chanvo ding um lo khawpin hausain hlim bîk ei t’â, ei hrisêlna leiin mi hrivawi sie hâi ngîrhmun hre thiem ngâi nâw’ng ei tih. Chuong ang dûthu sâm invêtthlâk chu mi Siemtû chun a hriet kar leiin ei phur zo tâwk seng ding phur rik a mi sem ruol lem a nih.
Ûnâu dit tak, vâkvâina khawvêla hin nang chau rinum, lungngâi, beidawng, rethei lê lusûn bîka inngâi nâw rawh. Ringnaâ pasal ṭhâ lo fê hmasa hâi khawm chuong ang takin an him bîk nawh. Annî chun vâkvâina khawvêl hi umna tlâka an ruot nâw leiin lê ram ṭha nâwk zuol beiseitû hâi an nî leiin tû lâiâ tuorna hâi hi an chunga ropuinâ suklangâ la um ding lê chun hril khî khawpâ an ngâi nâw a nih (Rom 8:18). Chuleiin berâm lê kêl vun silin rimsi takin thlalêra dâm, tlânga dâm, khura dâm lê pûka dâm an vâkvâina khawvêl hringnun chu an hmang ta lem a nih (Heb.11:36-38).
Vâkvâina khawvêl ei inzin sûng, ringtû nî lei elâ kawng iengkima hamṭhâ le a thil thâw hâi tluong pur bîk dingâ inngâituo chun a tâwpa beidawngnâ a hmu hlak. Chuong ang mî chu Tirko Paulâ’n ‘…mi po pova mi lunginsietum tak lo…’ a tî hâi chu an nih (1 Kor.15:19). Chuong mî hâi chun an chunga thil tlung dân izirin an lâwmin an lâwm nâw hlak a nih. Pathien-â innghat tlat mî hâi chu vâkvâina khawvêl hi an chatuon hmun ding an’ nawh tî hre zingin, beisei hring le iengkim sel takâ tuorin, Îsû Khrîstâ chu ṭhanghmun siemna hmangruoin an hmang ta lem hlak a nih.
Levi mî, Berekia nâupâ Asaf (1Chro.15:17) chun vâkvâina khawvêla mi rilo hâi vângneina, hamṭhatna lê hlâwtlingna hâi a hmu chângin nasa takâ â’n insuolpuina thu Sâm 73-naa ei hmu â. Asaf chun mi rilo hâi vângnei zie an hmu chângin an sui thlûk vâng vâng â, an lungril dûthu sâm nêkâ nasâ neiâ hausa lê inhawi ti takâ an khawsak dân hâi a hmu lem chun â’n hnarnâ a zuol phâ hlak leiin a ke pên hâi chu in tleu vâng vângin, a lungril lê a taksâ chenin a tuor phâ hiel hlak a nih. A tâwpa chun Pathien chu amâ chanvo a nî ziey hung inhre suokin, Pathien-a ringnâ innghatin, a tâ dingin Pathien hnai chu a ṭha tak a nih tî a hung hmu suok ta a nih (Sâm 73:28).
Mi rilo hâi rem ruot angâ um nuom lo lê an lampui hrâw hâi hrâw nuomna leiâ retheinain a tlâk buok lê tuor mêk hâiin vâkvâina khawvêl khêla beiseina dang nei nâw hâi sien lâ chu mânî hringnâ lain vâkvâina khawvêl hi an bye bye-nâ sâwt ta ngawt a tih. Amîruokchu, Khrîstâ hmingâ an tuorna hâi hril lê inzâwt ding tam tak nei hâi sien khawm vâkvâina khawvêl khêl ram êng mawi hung inlang ding chu dingdihlîpin an thlîr lem a nih. Tîsa khawvêla hin mi rilo hâi angin chanvo lê nîna ṭhâ chang nâw hâi sien khawm, Vân thar lê Hnuoi thar chanvo hlu tak an dawng ngêi ding a nih tî an hmu chieng êm leiin, “An hmusitna chu phurin i kal chhuak ang u, Hetah hian khawhmun nghet nei kan ni lo e; Inthâwina nung Pathian lâwm tlâk ni tûrin, Hawh u i chhuak ang u daipawnah; A tuarna i ṭâwmpui ang u”, tiin châwnbân vâwrin zâihlâ an rem ta lem a nih.
Ringtu hâi chun vâkvâina khawvêl mâksan â, chatuon khawpui ei tlung huna Vân khawpui kawt kâia Welcome to Eternal Home tiin Hmangaitû Lal Îsû Khrîstâ leh lung dit ei lo ṭhe ta hâi chun vân silfên mawi takâ inthuomin an mi lo hmuok ding a nih. Âw a vâ’n hawi âwm ngêi de! Chatuon Khawpui ei tlung huna chun khawvêl suolin a lo inhliem ta hâi po po chun vân silfênâ inthuomin rângkachak tuol lâi chun thînâ hnêâ ngamtû Lal Îsû Khrîstâ inpâk lê châwimâwiin chatuonin ei lêng diel diel ding a nih. Chû hmuna chun vâkvâina khawvêl hi ngâi ta nâw mei nih. Âmên!
Be First to Comment