Galilee hmâr tiengâ tlângdung insâng bêk lo lê hmun thawveng inhawi tak el a um â. Hî tlângdung hmun pakhat lâi taka hin Îsû Khrîstâ’n sermon ropui lê hmingthang tak el a hril â (Matt. 5:1ff; Lk 6:20ff), a khawhnunga, chû tlângdung hming chu Mount Beatitudes tiâ inbûk lê hriet a hung ni ta pei a nih.
Tlâng chungâ Îsû Khrîstâ thu hril Hamṭhatna thû hi Mathâi lê Luka zieka hâi ei hmu vê ve â. Hamṭhatna thû hi Mathâi chun kawng riet lâiin a ziek â, Lukâ hin kawng lîin a hril vê thung. Chun, ‘Ṭap hâi’ tî thumal tak hi Mathâi-in a hmang vê nawh. Pathien nâu hâi, (mi mal, sûngkuo tin) tû tâ khawvêl suolna leiâ lungngâinâ, rinumnâ, beidawng, natna lê thînain a tlâk buok mêk hâi lê tû lâi hripui tuor mêk hâi ngîrhmun hre zingin, ei thupui innghatna dingin Luka zieka Îsû Khrîstâ ṭawngbâu, “Nangnî tû tâ ṭap hâi in ham a ṭhâ, in lâ’n nui ding a ni si â”tî hi ei hmang lem ding a nih (Lk. 6: 21b).
Khawvêl hi tuorna khawvêl a ni â, a sûngâ chêng mihriem hâi hi a tuortû ei nih. Mihriem hringnun hi ei piengâ inthawk ei thî nî chenin lungngâinâ, beidawngnâ, retheinâ, natna lê tuornain a khat a nih. Hi hi ei tâwp sawngna ding ni sien chu a va râpthlâk âwm de!
Khawvêl thiemna lê varnâ â’n sâng tah tiâ ei ngâi ṭhat lâiin, natna khir tak tak hâiin a hausa lê rethei thlier lovâ mi hrût ruol vawngin, lusûn ṭap rî a rê chuong nawh. Covid-19 hripui a hung inlêng lem hi chu mihriem thiemna lê varnain a buon hnê zie hretû vawng ei nih. Ram ropui lê hausa tak tak lê ram rethei tak hâi khawm hripui ei tuor dân â’n thuhmun vawng â, a bîkin Pathien ring nâwtû hâi chan chu thînaâ inthawk thî hnînâ a nih.
Tuorna hi mi tin chunga chau a tlung naw â, Pathien nâupâ Îsû Khrîstâ chunga khawm a tlung. Îsû Khrîstâ khawvêla a hung lâi khan lungngâinâ, hmûsitnâ, hneng dênâ, hril sietna lê sukrimumnâ chau kha a tuok naw â, thîna chen a tuok a nih. Chû leiin ei rinum tuorna hâi po po mi hre thiempuitû, ei tuornaâ mi tuorpuitû lê ei ṭapnaâ mi ṭappuitû chun, a hmangai hâi kuoma “…In lâ’n nui ding a ni si â”, tîin thû a mi tiem hi a va thla muongum thlâk de!
Sâm ziektû’n “Ṭapnâ hi zâna châmbâng sien khawm, zîngkâr hlimnâ a hung tlung hlak”(Sâm 30:5) tiin zâi hlâ’n a lo inzâwt angin, hnuoia ei lâwmna po po kim vawng nâw sien khawm ringtu hâi tâ dingin chatuon khuo a var phât chun, “… lusûn hâi hnêm ding dâm, vut âia pârṭhi hrui pe ding dâm, lungngâi âia hlimna hriek dâm, lungrilâ ngûina thlarâu âia inpâkna silfên dâm, felna thing hâi tiâ ko an nî theina dingin. Lungril ngûina thlarâu âiâ inpâkna silfên dâm, felna thing tiâ ko an nî theina ding dâm in…” chuong hâi chu ei lâwmna sukkimtû ding lê ei lâ’n nui pui ding hâi chu an ni si â (Isai 61:3). Retheinain a tlâk bûk lê fam ngâiâ ṭap hâi chun, “Ka lusûnnâ chu ka tâ dingin lâmnaâ î’n changtir â; Ka sâiip puon chu i mi hlîppêk â, lâwmna puon i mî’n siltir ta â…” (Sâm 30:11) tîin, Vân khawpui tuol lâiâ châwnbân an la vâwr sieu sieu ding a ni si â.
Khawvêlâ Chanchin ṭhâ leiâ ei mitthli tlâkna dâm, inrimna dâm, tuorna dâm, hril sietna dâm, dem sietna dâm, hneng dêna dâm, vuokna dâm lê lungngâinâ ei tuok hâi po po hi Vân ram ei tlung phaâ mi suknuitû ding an la nih (Jn. 16:20-22). Halleluiah!
Be First to Comment