Ngainatna le ditsakna țawngkamin,
‘La um la, la châm rawh’ tia ngênin;
Sienkhawm, dang ruol chang lovin,
Tui luong angin hma tieng an pan a;
Nghâktu um khawma inhnu ve thei,
Inrem diel diela hun hmang a hlu ie.
Thuomhnaw thar le a thar dang dang,
Țha zing le mâwi zing thei um lovin;
Vânglai ni hmang thiem a pawimaw,
Vawisûn hi zâni tia la ko ngêi dingin;
Zinga ti khawm hre chieng thei lovin,
Hun hmang hlâwk ngêi dinga infuiin.
Chûnnu le zuopa hlutna vawng tlatin,
Iengmalo anga ngai a pawi sei thei a;
Inlaichinna hrisêl huongsûnga lêngin,
Thil iengkim tâwp hun a tlung hma’n;
Inrempui fel țûl taphawt nghâk lovin,
Hunin a liempui tia hnung insîr pêlin.
Ngun takin hei ngaituo chet chet la,
Hun liem hnung leia ngaituona buoi;
A hril tieng inhrât rak hi umze bo el,
A sie le a țha hrietna neitu taphawtin;
Hma tienga thil um beisei fan fanin,
A țuoi zo hma le a liem zo hmaa felin.
Hung kîr zai hrim rêl ta lova liem pei,
Ngai ta u, ngai êm êma țîn ri remin;
Khawsâwt sukzuoltu rimâwi intuok,
Lungril ril suklâwmtu khawm a liem;
‘A mak ngêi maw!’ tia la bo pei ding,
Hi khawvêla vul zing ie’m nîng a t’a?
Bethel, Tuiṭhaphâi, 6:30 p.m., Thlaphal ni 4, 2020
Be First to Comment