Kan Huona Pârte Mâwi – V.K.Pangamte

Eden huon mâwina le hausakna tekhi lovin,
Mitthlaa châm zing le lungril rila vawng tlat;
Hrietpuitu le lâwmpuitu fiel nuom hiela um,
A kûng innovin enna mit a suktlei hlie hlie a;
Rawng chi hrang hranga chei mâwi ang elin,
Kan huona pârte mâwi en dingin ka fiel che.

Huon hming inthang le ropuia tem ve ni lo,
Siemtu țhatna zâra dam le hrisêla hringnun;
Hril le ziek ringawta lâwm thu hril zo ruol lo,
Hriemmi thiemna le varna chun a tlin naw a;
Hring le dama um hi ngaia nei el a awl thei,
Kan huona pârte mâwi danglamzie hlimpui.

Zîngkâr Nisa suok var inthieng êm êmin a el,
Khuolzin mi țhenkhatn châwl siema thlîrin;
A hmun ngêia biethu hrilna remchânga nei,
Sêl lul naw ning, lâwm lûtna hun țha a ni si;
Hmangaina thu châwia inremna thupui nei,
Kan huona pârte mâwi danglamzie hlimpui.

Um khawsâwt chângin sûngril a fang hlak a,
Nghil dinga țuon sin rêl thei lo dinga temin;
A kim vawng thei naw khawmin a hun lai a,
Bêl ding le pawm ding chu duot taka chelin;
Hnuoi hlimna le lâwmna a țuoi zo hma hin,
Kan huona pârte mâwi châwia intem felna.

Thil mâwi hmu le hriet hai taphawt hlun lo,
Beiseina insâng neia hma teng pan ṭâl ṭâl;
Tâwp el ta sien ta lungkham bângna invâi,
Thuneitu le ro rêltu țhang lova nun kim lo;
Pieng hun a um a, thi hun la um ngêi ding,
Kan huona pârte mâwi khawm a țuoi thei.

Bethel, Tuiṭhaphâi, 5:30 p.m. Thlaphal ni 5, 2020