Buphal Lâk Khâwm – V.K. Pangamte

Lâk khâwm tâwma ruotui tla inzingin,
Lungril ril a suksâwl êm êm ti hrein;
Bu kûng tam tak chu tui-in a chîm a,
Lung a hnuol thei ti chu hriemmi dân;
Innghatna le inhnêmna invâi hielin,
LALPA zârin sietpui êm chu tlung lo.

Kum bul tiema inthawk lungruol diel,
Vân malsâwmna kut-a țhuoina zârin;
Sin inrim taka thawtu ta dinga hlimna,
Hnuoi țawngsephur kâra lêng ni siin;
Bu le bâl sîk thei le sîk zova hun țha,
Zâwlpa Lungawi hai sûngkuo lâwmin.

Kha ni kha ka ta dinga ni inchik tlâk,
Buphal lâk khâwma sin vawi khatna;
A lekha thu bâka hriet ding a tamzie,
Fetu hai chângziea inthawk inchûkin;
Malsâwmna bu inkhâwm, lung a dam,
Petu kuoma lâwm thu hril ma lovin.

Piengna hmun le inchûk țanna hmun,
Tlângram suok inhre ngâwi ngâwiin;
Nghil chang thei lul lo, a hring zing ie,
Chûnnu le zuopa ha’n mi châwilienin;
Kum 2005-a phaizâwl lût țan chau hi,
Hma hnawt thaw naw chun a harsa.

Khawvêl thiemna le varna a’n sâng,
Khâwl thil thaw theina a lêt tama țha;
Ni tin a suok zing ti chu inkhêl ruol lo,
Buphal lâk khâwm hun a um angin;
Vân konaa inlâwipui hun la um ding,
Malsâwmna tiem thiem a pawimaw.

Bethel, Tuiṭhaphâi, 7:00 a.m., Changer ni 30, 2020