Zân a sâwt deu leia ngai sukțha el a,
Thaw ding ruok chu tlâwm hran lo;
Zâl hmakhuo ngaina ringawt dâm,
Insûng inhnêmna tling zo dêr lovin;
Phaivang anga fâk ding inkhâwl si lo,
Nipui laia âwl narân leia thlasik tuor.
Siemtu hunbi ruot dân a fel diem a,
Hmawsaruma nawr chu rem thei lo;
Tlin le tling zo hrim an um lul naw a,
A pawimaw chu mâni mawphurna;
Ringum le fel taka hlen suok tum pei,
Thlasik le tuisik hmaa châu bîk lovin.
Țhal favâng Nisa suok sen riei riei a,
Vângkhawpui sukmâwitu thing tin;
Saram le berva hrâm thiem an mâwi,
Âwitu an tling zo ngêi ie, mi tin laiin;
Siktui fîm luong del dela inri dâm,
Thlasik boruok mi hîpin lung a lâwm.
Châwl lovin hril pei inla, hlimna hun,
Lungril rila châm zing nghil lul lovin;
Țuoi hun le tâwp nî la nei seng ding,
Vâla le nghâknu an lêngna hmun a;
Hrietthiemna biethu thlum inhlânin,
Thlasik le tuisik phur ngama intiemin.
Pûr do ding tamna hring khawvêl a,
A dam le a thi pûrdo inkawp nun hi;
Dâwnpui chang thei lo ding amani?
Lênghri bâwm vêlna kâra tâwp lovin;
Hunpui pakhat a liem zo hma ngêi a,
Thlasik le tuisik intiempuia tlâwm lo.
Bethel, Tuiṭhaphâi, 7:00 a.m. Changer ni 29, 2020
Be First to Comment