Dit Lai A Liem Ta Maw! – V.K. Pangamte

(L) Rev. F. Emmanuel Pangamte

Hnuoi lâwmna pâr mâwi a ṭuoi thei,
Rûn insûng sukmâwitu a tliek tah;
Thlarau bohmang hmangaina nei a,
Hringnun rinum le harsa tak kârah;
Kîr hrim rêl lovin hma tieng panin,
Vân khawpui a lo inlâwi hmasa ie!

Hril thiem le inzâwt thiem tam takin,
Chel thei le lâwm zing thei tlin bîk lo;
Ngaiin luoithli a far naw thei lul nawh,
Sûnpuitu pung khâwm hai lairil a na;
Lainatuhai thu le hla rem ri hriet sun,
Zuopa ngai luot leia thu tin sâm vêlin.

Rawng bâwltu ṭha le ringum a liem a,
Hraichâwihai enin lungril ril a sukno;
Chûnnu ṭhangin tlei hrim a harsa ie,
Sûng le kuo duthu sâm ang ni lovin;
Umna kohran ditsakna hlu chang lai,
Thina thlipui hung hrângin a liempui.

Duot taka enkawl nuom êm êm laiin,
Hriet hman lo khawpa liemna inrang;
Chunga rem ruot dân sêl mâwi lul lo,
Hriemmi theina tlâwmzie inlang fie;
Ropuina le inlalna tehlêm rama hin,
‘A mak ngei maw’ tia inthla a ṭûl pei.

Ma lova sakhming ko mawl mawlin,
Inṭhena rama lêngin ṭhe nawna ngai;
Sûng kim ta lova hringnun hmang hi,
Zalênna hunpui a tlung phaa lâwmin;
Sûn le zân châwl lo ding ram thlîrin,
Thlamuongin LALPA bêl ta’ng ei tih.

Bethel, Tuiṭhaphâi, 10:00 p.m., Thlaphal ni 9, 2020