Harsatna Tui pal Leiin Maw! – V.K. Pangamte

Hnawchêpna le hnengdena nun a,
Hriemmi tling zo naw ding ang elin;
Hmêlma râl hrât hung tho leia buoiin,
Harsatna hmaa chapo a rem thei am?
Hrilsietna kâra khawm țhang țâl țâlin;
Hringnun inchen naw hi inruol lovin.

A mâwi le a mâwi naw thlîr thiem a,
A rem naw leia nghawk châng a tam;
A ropui le ropui naw lampui inṭhieng,
A sîra țhang zing hlak rem infûk lo;
A sûnga nun hlimum chu beisei tlatin,
A țha le a țha naw inpawl a tam ie!

Retheina silfên hi a zie a um am?
Rawtna chi dang dang a tlung hlak a;
Rimtui hîp zing a thei si naw leiin,
Ro fel taka rêl thiem a harsa inthuo;
Ruom tin ha’n tui dawng kher lovin,
Ram zalênna hmang dân inchen si lo.

Santu ngaia inrûm vawng vawng hi,
Sim, Hmar, Sak le Thlang ngha vêlin;
Sietna rûnpui a tlung hmaa sukfelin,
Sirdena thil dawng chu dam thei lo;
Suolna râl anga hrâng hnetu dingin,
Sandamtu LALPA pan vat chu a him.

Thil hlu tak tak hmuin sîngmit a tlei,
Thiem thu hril zing chu khêl ni thei;
Thawna tieng tieng a filawr ni tum,
Thlân khur inthim lût hnunga rem lo;
Thaw thei hun sûng hin ringum takin,
Thlalêr nun rinumzie a zie um thei lo.

Nunnêma hnuoi hringnun hmangin,
Nat châng a um khawma lungâwina;
Nuorna ding zawng lova inremna,
Nal le mâwi ti ringawt chu sâwt lovin;
Nun Krista nei bawk chu a hadam tak,
Nêl suol naw hram dinga inbuotsaiin.

A pâr a hring sûng hin, fîmkhur takin,
A tlâwm le a tam thua innghat hlun lo;
A famkim hrim um nawna rama hin,
A fel bîk tia ṭan khawm indik kim lo;
A suol suoka intâng naw hrâm dingin,
A la um, hun țha po po a la bo nawh.

Bethel, Tuiṭhaphâi, Changer ni 22, 2020, 10:04 a.m.