Ngaitha Nun – V. K. Pangamte

Tha ṭhang lova fâk hmu inbeisei a,
A thlâwna tlung ding ngawta innghat;
Puitling nun le chun a kâr a hla vieu,
Mizie pakhata nei a ni pângpal chun;
Hmasâwnna lampui hrim hraw fu lo,
Ngaitha nun le inpawl lo bawk a ṭha.

Thil ṭha thaw dinga intiem hnung a,
Awlsam deuva ṭhul inchin nâwk dâm;
Zînga dinga kei sei nun tiem tlat chu,
Hlawtlingna phur khawp intêl hlu lo;
Nakie tia inhnûk pawisatna khêl a,
Ngaitha nun a derthâwngzie a zuol.

Hnuoi mihriem ni sûng phawt chu,
Mamaw le dit inpawl zing dinga um;
A hun laia pût vat vat a pawimaw,
Insîr um lo dinga lungril siem rêlin;
Mihai ta dinga malsâwmna phurin,
Ngaitha nun hnâwla taimâk insuoin.

Inchûklai nun hei ngaituo inthûk vêlin,
A bula phûr êm êm chu a ṭha thlâwt;
Nisienlakhawm a zuitu um si lo chu,
Tum lei ni lova hlawsam thei a fie;
Tumru le taima taka tiem ṭâl ṭâlin,
Ngaitha nun chu sîra hnâwl ngamin.

Ring nêkin a lampui a lo harsa hle,
Mânia tumna chieng tak nei lovin;
‘A mei mei’ meia inkhit det el chu,
Damna khawp intling lo dinga hril;
Râl buoi êm êm nêka la pawi lem,
Ngaitha nun chu bânsan vat a him.