A harsa le a rinum tia la sâ zuol chu,
Hâwptu ṭhenkhatin dâwn phâk lovin;
Pângngâia nei a lo ni pal khiet chun,
Dawngtu ta dingin pângngâi ngai lo;
Inlîrthei sûnga khû veng vung chu,
Zielpui khû hîp tam a hadam nawh!
Kum tam liema piengna ram kanin,
Lampui chun hmâ a lo sâwn vieu;
Suk le tung hraw a, inchat lo angin,
Inzintu chi dang dang hai tiemin;
Hmarbiel tieng nghain, hun tâwite,
Bethel rûn inhawi ngai sia lâwmin.
Dem le sêl angin ngai naw hrâm la,
Tlang taka hril fel ka’n zuom si leiin;
A pawi sei ding ruok chu phal lovin,
Bengvârna chi khat khêla ditum lem;
Khuol inzinnaa hâwp le hmuom tam,
Mi dang ngaituo puma invêng a ṭha.
Du zâwng le dit zâwng a dang hre a,
Nuom zâwng lem chu a la dang sei;
Mimal nun inzâwt bîk tum si lovin,
Hrisêlna inchen lo tia inzâ intuo tlatin;
Romei inzâm ienga mâwi ni bawk lo,
Zielpui khû intêl hîp a harsa ngêi ie!
Damkhawpui rûn rem nuoma inlâwi,
A dam vawng naw ding a chieng hle;
Hriemmi khawsak inrêlna dam a hlu,
Hêkna bul indik lo, thei ni dinga um;
Khêl mizie puta intumna ṭha lo chen,
Zielpui khû naw khawm a khû buoi!
Bethel, Tuiṭhaphâi, 1:35 p.m. Thlaram ni 11, 2020
Be First to Comment