“Hi taka hin khaw hmun nghet ei nei si naw â, khaw la hung um ding chu ei zawng lem a nih” (Heb. 13:14).
Albert Brumley (1905-1977), Arkansas, USA chun, ‘Hnuoi hi ka in an’ (a ni) nawh, kâ’n zinna (ka inzinna) chau a nih, Ka in ropui a um, chung tieng ram mâwia khin’ tiin, hnuoi hi ei khuolzinna ram lê ‘ram ṭha nâwk zuol’ (Heb. 11:16) beisei takâ thlîrtu hâi ngîrhmun hlâin a lo siem â. Hî hlâ hi ka sak zâtin, Morrison, Africa ramâ missionary chanchin a mî’n hriet (mi inhriet) suoktir hlak. Vawi khat chu, Roosevelt, USA President lê Morrison a ruolin Africa-â inthawkin USA panin an hung â. Roosevelt chu New York Airport-ah a ropui thei ang takin mipuiin banner-ah, “Welcome Home, Mr. President” tiin an lo tuok â, pâr ṭhî inawrtirin, motor tam takin a hnung tieng lê a hmâ tieng an sawm â. Morrison ruok chu chibai bûktû lê tuoktû pakhat tak ngiel khawm a nei nâw leiin, Pathien hmaa a nuor thusim lê a lungril natnâ intlunin, lunghnuol ṭeu pumin in tieng chun â’n lawi (a inlâwi) ta â. Chuongâ hlim lo takâ a um lâi chun, Lalpâ’n a lungrila, hieng hin thû a hung hril ta â. Morrison, President Roosevelt chun a ram a tlung ta â. Nang ruok chun “i ram i la tlung lê’m (lê am). I chatuon ram i hung tlung nî chun, President Roosevelt a lo hmuoktu hâi nêkâ lêt za tam lemin nang an lo hmuok ding chê a nih” tiin. Chû niâ inthawk chun, a nuorna hâi po po insîrin, lâwmna mittui leh Pathien kuoma lâwm thû a hril lem ta â. Morrison chu America ram, New York a tlung niin, tlâwm hlê sien khawm, a Chatuon In, Vân Jerusalem, hmangaina khawpui a tlung niâ a ropui ding ziet hi einî ringtu hâi chanvo ding khawm a nih tî hre vê’ng ei tîu.
Khuolzintû chu â’n zinna rama a châm sawng ngâi naw â, a khuo tieng a kîr nâwk hlak a nih. Khuolzin thiem lo chun, a mamâw lo ding thuomhnâw lê thil dang tam tak a châwi sâ hlak â; khuolzin, mâni insukzângkhâi thiem hâi chu, buoina khawm an tuok tlâwm phâ nghê nghê hlak.
Ezra Lêkhabû ei tiem chun, Israel nâu hâi kha, kum 70 sûng Babylon sala an intâng â, hî hun sûng hi a ram mî hâi lê inthlung zawmâ an innei pawl leiin, an sal tângnaâ inthawk insuo zalên annî hnung khawmin mi tam tak chu, Jerusalem tiengâ kîr nuom lovin an um thû hriet a ni a. Israel nâu hâi angin ei mikhuolna ramâ chêng hâi leh, zâi khatâ lêngin, an nuom zâwng lê dit zâwng hâi inchalrempui vê pal ei tih inlâu um tak a nih. Chun, khawvêl hi ei châm sawngna hmun ding ni âwm fahranin, Vân ramâ ei châwi lûṭ thei lo ding ro thil, sum le pâi, in hmun, in ropui, thuomhnâw, bûr le bêl hâi la khawmin vân tieng râwl ngâisak hman lêk lovin insukbuoi pal ei tih tî hi inlâu a um bawk (Matt. 6:19). Îsû Khrîstâ’n, hringnâ a mi pêk chau hi vân khawpui ei lûtpui ding chu a nih.
Khawvêl mî hâiâ inthawk châwimâwina lê hming ṭhatnâ hlâw nâw inlâ khawm, Vân khawpui ei tlung phât leh, “Hieng hâi hi, rinumna nasa takâ inthawkâ suok hâi kha an nih, an silfên hâi Berâmtê thisena sâwpin an sukvâr ta â” (Thup. 7:14) tiin Vân hmunah Hmangaitû Pathien râwiin mi hrâng lo fê ta hâi leh mi lo lâwm lûtin, an mi lo châwimâwi ding a nih. Hla siemtû’n “Vân lâwmna kim ka neih theih nan, lei lâwmna hi mîn ṭhiah sak a” a lo tî angin, Chanchin Ṭha invâkvâipui leiâ retheinâ, hneng dênâ, dem sietnâ, muolphonâ i tuor ngamna chu, Lâwmna Lallukhum (I Thes. 2:19-20) i hlâwna ding a ni lem.
Tirko Paula-in, “Ka rinumna po pova chun, hlimnain ka sip liem a nih” (2 Kor. 7:4) a lo ti â. Lawng chu tui a tam po leh â’n sâng (a insâng) deu deu angin, Khrîstâ leiâ rinum lê muolphonâ, tuor tam tam hâiin, khawvêlin a nei vê lo lâwmna chuoi thei lo neiin, mikhuolna rama, vân lâwmna kim ei lo intem lâwk thei a nih.
Rethei leiin ei mikhuolna rama, in ropui lê inhawia chêng nâw inlâ khawm, rethei nâu hâi tâ dingin, chatuon khuo a var phâ, lung man tam khawpuia, hmangaina khawpui hluotû ding hâi ei nih. Chû khawpui indintû lê neitû Lal chu, riengvâi lê rethei hâi hmangaitû LALPÂ a nih. Hmangaina khawpuia chun, Khrîstâ’n a thisenâ â’n tlân (a intlan) sâ rethei nâu hâi chu, iengkim neitû chun, hausa lê tlai takin mî’n umtir (mi inumtir) a t’â (ti â), hlimin ei la lâwm ding a nih. Âw, a vâ’n hawi (va inhawi) âwm ngêi!
Ûnâu, nang chu i ram i la tlung lê’m (lê am). I ram i tlung phât chun, hmêlma ṭawngsephur leiâ natnâ, thînâ, lusûnnâ, retheinâ, hneng dênâ, hril sietnâ, endawngnâ, muolphonâ i tuor hâi lê khawvêl mî hâiin an hriet fûk nâw chê leiâ i mithlî tlâkna hâi po chu hrûk fâipêk ni tâ’ng i t’â, Vân khawpui tuol zâwlah, Hnêna Lallukhum khumin lâm dêr dêrin chatuonin Lalpâ kuoma i chêng lem ding an’ tah. Chû leiin, mânî inphatâ nî tin Khrâws putâ, a tâwp chenâ Khrîstâ hnung zuitû ei nî theina dingin, ei hringnun Lalpâ kuoma inhlân thar ei tîu.
Tiem â’n hawi ie.