Part – 2
KHRÎSMÂS HMASA TAK HMANGTÛ – BÊRAM VÊNGTU HÂI:
Ei hriet ta angin, berâm vêngtu hâi hi mî thu hnuoia sin thâw, mî hriet fûk lo lê hnuoi sie an nih. Mi hnuoihnung an nî leiin Jerusalem Temple-â inthâwi ding khawmâ phût an ni ngâi bawk nawh. William Barclay chun, hieng berâm vêngtu hâi hi Jerusalem Temple-â inhlân ding berâm thlang suok â um hâi, enkawltû lê vêngtu niin a hril â. Jerusalem Temple-a chun nî tin zîng nisa suok tiemâ ran thisen inthâwina sin chu thiempû-in a nei hlak â. Chû inthâwinaâ hmang ding chun berâm chu â’n chaw thei hâi inchâwk sâwng dingin inchâwk khâwl sâ dâmin an sie khâwl hlak a nih an ti â. Ieng ang berâm vêngtu khawm ni hâi sien, hnuoi temple berâm vêngtu hâi chun an berâm vêngnaâ Vân Berâmtê an hlâw suok a ni chu!
Ngîrhmun inhnuoi takâ um ni hâi sien khawm, ringum takâ an sin thâwna (berâm vêng) hmuna chun Lalpâ ropuinâ’n an vêl chu a hung sun var â. Khawvêl sâkhaw mî lê thiempu lal hâiin var an hmû hmâ lê khawvêlin vân mipui hâiin hla mâwi tak an sak an hriet hmâin mi hnuoihnungâ ngâi Berâm vêngtu hâi chun Khrîsmâs var ropui hmu hmasatû lê Vân hlapâwl mâwi tak ngâithlatû hmasa tak an nih. Khrîsmâs hmang hmasa taktû hâi chu an va hamṭha dê!
Khawvêl Sandamtû pieng thû hieng ang hin an kuomâ Vântirko hmangâ puong lê inhriettir an nih. “Ṭî nâw unlâ, ngâi ro, mi tin tâ ding chanchin ṭhâ lâwmum êm êm ka hung intlun chêu a nih. Vawisûn hin in tâ dingin David khuoa Sandamtû a pieng tah, Lal Khrîstâ chu…nâutê puonâ tuom, ran bu pêkna thlênga zâl,” tîin (Lk.2:10 -11). Vântirko chun khawvêl sandamtû pieng thû berâmpû hâi kuoma ṭawngbâu hmangâ a hril chu dit tâwk el lovin, khawvêl sandamtû hi hmu ngêi hâi sien tî a ditsak êm leiin an tâ dingin inchiknâ (sign) “…nâutê puonâ a tuom, ran bu pêkna thlênga zâl” (Lk.2:12) tî chenin a hrilpêk a nih. Berâm vêngtu hâi kuoma Lal thar pieng thû vântirkovin â’n hriettir hi a va fie hlep hlep de! Mi mâwl tak, inchûkna nei lo hâi hriet thiem zâwng taka dingâ inhriettir lê puong a nih.
Tiemtû dit tak, Khrîsmâs huna hin Khrîsmâs neitû hi i kuoma ieng hmangruo hmangin am inpuong vê sien i nuom â? Pathien inpuong nuomna hmuna i um am? Berâmpû hâiin an sin thâwna hmun hmuna Lalpâ ropuinâ’n a sun var ang hin einî khawm ei sin thâwna hmun, ei in, ei pîsâ (office), ei inchûkna hmun lê a dang dang hâia Pathien ropuinain mi sun var sien lâ chu a vâ’n hawi âwm de! Lalpâ ropuinâ inlang nuomna hmun chu ringumnâ, taimâknâ, tlâwm lem inchûna hmun a nih. Chuong ang hmun chu Pathien Thu tlungna hmun lê Pathien inlâr nuomnâ a ni si a.
Chung tieng inhriettirna ropui lê mâwi tak dawngtû Berâm vêngtu hâi chun an thu hriet chu nghâk khawtlâi lovâ, inhmâw takâ Bethlehem-â Khrîsmâs hmasa tak hmang dingâ an pan hin Îsû Khrîstâ chu an hringnuna a pawimâw ziet lê Amâ chibai bûk an inhâwk ziet sukchiengtû a nih (Lk. 2:16). Chuong chun, Bethlehem-â nâutê Îsû chu an hmu â, ditsakna chibai an inhlân zovin Pathien châwimâwi lê inpâk pei pumin an berâm mâksanna (sin thâwna) hmuna chun an kîr nâwk ta a nih. Nautê chanchin thû vântirkovin a hril kha an hril vêl â, chuong chun berâm vêngtu hâi thu hril lê hmû chu a hre ta phawtin mak an ti hlê.
Bethlehem-a nâutê Îsû ei hmû hin ei Khrîsmâs hmang nuom dân dâm, ei nî tin kalchâwina dâm, ei lêkha inchûk nuom dân dâm, ei pîsâ kâi nuom dân dâm, ei rawng bâwl nuom dân dâm, fâk lê dâwn ei zawng dân dâm, nâu le tê ei enkawl dân dâm, Khrîstâ nêkâ thil dang ei ngâi hlut dân dâm, ei inchei dân, Khrîsmâs neitû lungril lê dit zâwngin danglam inlâ nuom a um tak zet a nih. Chuong mî hâi chun îtsîknâ, elrelnâ, vervêknâ, chaponâ, tuolthatna hâi mâksanin, Thlarâu ṭhuoinain nî tin khawvêl tirdakum lê suolna lakâ inthawkâ inthier fihlîmin, thienghlimna lampui an hrâw ta lem hlak a nih.
Khrîsmâs hmasa tak hmangtû, Berâm vêngtu hâi kuoma Lalpâ ropuinâ’n an vêl a sun var angin, einî khawm ei nî tin sin thâwna hmuna hin Lalpâ ropuinâ’n mi hung sun varin, khawvêl chanchin dang nêkin Îsû chanchin hi vân mî hâiin ei sin thâwna hmuna hung puong vê hâi sien nuom a va um de. Bethlehem-â Khrîsmâs hmasa tak hmangtû, Berâm vêngtu hâiin Îsû Khrîstâ an hmu â, an thil hmu leiin “Nâute chanchin thû … an hril vêl â” (Lk.2:17) tî ei hmu nâwk â. Kum 2020 hripui hnuoia Khrîsmâs hmangtû hâi Khrîsmâs ei hmangnaa Pathien Thu thar ei hmû lê dawng hâi chu einiah tâwp el lovin, mî hâi lungril chawk tho lê thlâk danglam thei dingin Khrîsmâs neitû chanchin hi hringpuiin, puong darin, ei thil hmû hin mi dang lungril sukdanglam thei sien nuom a um ngawt el. Îsû Khrîstâ hmutû lê hretû hâi chun Îsû chanchin hril an châkin, an inhâwk hlak a nih. Einî hripui hnuoia Khrîsmâs 2020 hmangtû hâi khawm Khrîsmâs umzie lê Khrîsmâs neitû la hre lê chang nâwtu hâi kuoma a chanchin ṭhâ lâwmum bêk bêk hril dingin ei infiel nghâl a nih.
Berâm vêngtu hâiin Khrîsmâs hmasa tak, Khrîsmâs neitû (Lal Îsû Khrîstâ) râwiâ an hmang zo hnungâ lâwmna thar, testimony thar dawngâ Pathien châwimâwi lê inpâk pei pumâ an sin thâwna hmun tieng an kîr nâwk thû ei hmu â (Lk.2:20). Khrîsmâs hmasa tak hmangtu hâi nunâ inthawkin mânî sin thâwnaâ lungâwi lê Pathien châwimâwi pumâ sin thâw lê rawng bâwl dân inchûk suok inlâ nuom a va um de! Tû lâi hin mi tam tak chun mânî sin thâwna lê hlawâ lungâwi lo leiâ nuornâ (strike) thâw ei tam deu deu. Chanchin ṭhâ dawngtu hâi hin ‘A lâwmna chu Lalpâ dân a ni lem’ tî nêkin lungâwi lona lê nuornâ hi ei insukhmû ni ta sien a hawi. Kum 2020 Khrîsmâs hmangtu hâi kuoma, hî khawvêlin a pêk thei lo thla muongna thar, lungril thar, hlimna thar, lâwmna thar, taksâ lê thlarauvâ damna thar ei dawngin, Pathien châwimâwi lê inpâk pei pumin ei sin thâwnâ, inchûkna hmun, ei khawsakna hmun senga kîr nâwk thei dingin ei inditsak tak meu a nih.
(Khrîsmâs hmasa tak hmangtu hâi (Part – 3) – Khawsak mi var hâi lo nghâk nâwk rawh)
Be First to Comment