Part – 1
Lal pieng champhâ, hun lâwmum tak chu hripui inlêngna hnuoia ei tlung nâwk tah. Tû kum zet chu kum dang ang lo takin Covid-19 leiin Khrîsmâs danglam tak ei hmang ding chu a nih. Hlimna nî ropui mi ṭhuoi tlungtû Pathien kuoma ropuinâ um sien. Khrîsmâs hlim takâ ei hmang lâi zing hin Khrîsmâs ei lo hmangpui hlak–ei nû, pâ, ûnâu hâi lê ei rawng bâwlpui hâiin ropuina ram tiengâ mi lo fêsantu hâi ei theinghil naw â. Annî chu Khrîsmâs neitû râwiin khawvêl buoinâ, hripui inlêng lê suolin a sukbuoi ta nâwna hmuna hlim takin Khrîsmâs an hmang ta lem a nih. Ei ngâi hâiin ropuina ram an mi fêsan hnungin, einî damâ la um hâi hin kum 2020 Khrîsmâs hi Khrîsmâs Neitû Lal Îsû Khrîstâ leh hlim takâ hmang dingin ditsaknâ kâ’n hlân chêu.
Bible-â ei hmû angin, Khrîsmâs hmasa tak Bethlehem-a hmang dingâ inhriettirnâ dawngtu hâi chu Vântirko lê Vân mipui hâi, Berâmpû hâi, Khawsak tiengâ mi var hâi lê Bethlehem khuo lê a sê vêlâ lusûn sûngkaw hâi an ni â. An nîna lê ngîrhmun chu â’n chen nâw el khêla, Bethlehem-â nautê Îsû a pieng thû an kuomâ puong a nî dân lê hmang dân khawm â’n ang nâw seng a nih. Hieng hâi hin Khrîsmâs an hmang dân â inthawkin ie’m inchûk ding ei nei tî hei en ei tîu.
Khrîsmâs hmasa tak hmangtû Vântirko lê Vân mipui hâi:
Vânâ mî hâi, mipui tî hi a ṭawng bulṭhut tieng ei en chun, Vân sipai ruol tînâ a nih. Eden huonâ thlâtu hâi bâwsietnain a nghawng, mihriem lê Pathien inrem ta lo, hnuoi mî hâi tâ dingâ Îsû Khrîstâ’n remna sa ui Bethlehem khuo daia a hung tan ding thû lê hlaâ hung puong hmasa taktû hâi chu Vântirko lê Vân mipui hâi hi an nih.
Ieng leiâ Vântirko lê Vân mî hâi kher hi remna thû hung puongtû am nî’ng an t’â? Hî thû hi i lo sui vê hlak am? Pathien lê khawvêl inkârâ remna thû puong ding hin hnuoi mî hâi lâi, tlin lê tlâk, hril thiem lê puong thei hrim an um nâw leiin Vântirko lê Vân mî hâi hin remna thû an hung puong a ni lem. Vân lê khawvêl inremna dingâ Îsû Khrîstâ hung pieng thû hi hnuoi mî hâi, Pathien hmaa mi suol, Pathien hmêlma hâi puong thei ding a ni naw â, Vântirko lê Vân mî hâiin, “A chunghnung taka khin Pathien ropui takin um râw se; Hnuoi chunga inremna lê mihriem hâi kuoma ditsaknâ um râw se”, tîin an hung puong a nih (Lk. 2:14).
Vân lê khawvêl inremnâ, Bethlehem lê Kalvari tlâng chunga, Îsû Khrîstâ’n sa ui a hung tan thû hi Khrîsmâs indik tak hmangtû lê Khrîsmâs Neitû changtu hâi chauvin an changin an puong thei a nih. Hnuoi mî hâiin Îsû Khrîstâ hung pieng thû an puong thei nâw ang bawkin, Îsû Khrîstâ chanchin ṭhâ hre nâwtû lê âwi nâwtû hâiin Chanchin ṭhâ hi an puong thei nâw leiin, Khrîsmâs hmasa tak hmangtû hâiin hnuoi mî hâi tâ dingâ an thu hung châwi chanchin ṭhâ hi puong sunzawm dingâ ko lê fiel ei nih. Chû umzie chu vân lê khawvêl inkârâ remna palâi sin thâwtû ding hâi ei ni chu!
Khrîsmâs carol nei hmasa tak hâi chu tû hâi am an n’â? Vânâ mipui hâi an nih. An carol-na hmun khawm Bethlehem khawdâi a ni bawk. Chun Khrîsmâs carol hlâ ngâithla hmasatû hâi chu khawpuiâ ri mâwi, khawvêl hlimhlawpna rî hre phâk lo berâm vêngtu hâi an nih. Hî thû hi ka ngâituo chângin ei ramâ Khrîsmâs Carol lê Khrîsmâs hmasa takâ carol chu â’n ang nâw dê tî hi a nih. Einî leiâ Khrîsmâs carol neitu hâi chun carol an va neina hâi kuoma thil pêk iemani beisei an nei hlak â, Khrîsmâs carol nei hmasa tak hâi ruok chun hnuoi mî hâi kuoma vân hla mâwiin ditsakna vochuom an hung rem lem a nih.
(part -2 lo nghâk nâwk raw âw)
Be First to Comment