Khrîstâ Lunginsietnâ, Mi Sukmâwitû – Rev. Cliff Kawldinglien Joute

‘Îsû Khrîstâ lunginsietnâ’ tî thû hi, Khrîstien hâi chun ei hriet inzing pâwl tak lâiâ mî ni mei a tih. Îsû Khrîstaâ siem thar ei ni charâ inthawkin, lunginsietnâ tî hi ei nia a hring thar hlê bawk a nih. Chuong lâi zing chun, mi tam tak chun, ṭawngkam suok narân, sâm inhawi ei tî khawm a nih.

‘Lunginsietnâ’ tî hi, Greek ṭawng chun, ‘karis’ tî a ni â. ‘Lunginsietna’ thumal Greek hâiin an hmang dân chu, râl khata ram mâwi tak, tlâng lien tak, hring incham dup, a kâra vadung tui dâm dieiâ luong tî hrilnaâ hmang a nih. Chun ‘ri mâwi’ (music) lunglâi kuoi êm êm lungril ngûi chawk har sawng sawng el hrilna khawmin an hmang bawk.

‘Lunginsietnâ’ chu, mi suol, mi tirdakum tak, hrem phû ngâwi ngâwi khawm ni inlâ, Pathien sûngkawâ sandamna ruoi ropui kîl vê dingâ fiel ei nîna hi, lunginsietna mak chu a nih.

Hî ‘lunginsietnâ’ mal sâwmna dawng dingin fel hmasak, ṭhat hmasak, tlin hmasak a ngâi nawh. Ei felna bul, ṭhatna bul lê tlinna bul Îsû Khrîstâ chu inzawmpui hmasak a pawimâw lem. Khrîstâ lê inzawm ding chun ringnâ, nînâ indik takâ Îsû Lal lê Sandamtuâ pawmnâ a niâ. Chû lampui chu, simnâ, suol hnâwl tînâ a nih.

‘Lunginsietnâ’ hi, man tam a nîna san chu, Pathien-in a Nâupa neisun ei tâ dingâ a mi pêk lê Pathien Nâupâ-in a hringna hiel a mî’n hlânpêk (mi inhlânpêk) lei a nih.

‘Lunginsietnâ’ chun, Pathien tiengâ ei suolnâ fie takin a mî’n hmûtir (mi inhmûtir), mi suol, tirdakum, mi tling lo, Pathien lungsenna changtû ei nînâ fie uor â mî’n hmûtirtû a nih.

‘Lunginsietnâ’ chun, mi suol, mal sâwmna phû ta lo, hrem hmabâk, kut benthekâ um chau hmabâk chu mal sâwmnaâ vur a ni tah.

‘Lunginsietnâ’ chun, hremhmuna tla ding chu Vânram, Chatuon In a pêk a, Pathien hmélma chu Pathien nau nina a pêk ta lem.

‘Lunginsietna’ chu, Pathien lakâ hlaw suok ni lo, ei dawng, Pathien ṭhatnâ phût lei ni loâ, ei chungâ inlang suok chu a nih.

Chû ‘lunginsietna’ chu, dawng âwm tak tak lang thei ramâ, fel êm êm lê tling êm êm hâiin an dawng naw â, dawng âwm lo tak tak angâ inlang, Uirenû dâm, Rahab nâwchizawr hâi lê tuolthat hmang mi suol tâwpkhâwk hâiin, an dawng thiem ding zâwng takin Lalpâ’n a Nâupâ-ah a mi hung bun thlâkpêk ta a nih. Einî hâ’n ei chang bîk hi ei vângnei ngêi.