Chimbuk anthokin Pathien in Mosi a ko khan Mosi khan Pathien va hnai a tum a, Pathien chun, “Kha bâk kha hung hnai sap ta naw rawh. I pheikhok kha hlîp rawh, i ngǐrna kha hmun thienghlim a nih” a ta. (Exodus 3:5) Pathien chu nuom el a hnai thei an nawh ti ei hmuh. Sinai tlang ah Pathien a hung trum khan Mosi kuomah hieng hin a ti a, “Trum thla la, LALPA hmĕl hmŭ tuma mipuiin an hung paw thleng lui nawna ding le tam tak an thi pha nawna dinga fimkhur dingin zu hril rawh.” (Exodus 19: 21).
Mipui hai lem khan chu Pathien an hnai a thieng naw a, Pathien Sinai tlang a a hung trum khan Mosi ngei khom kha a tri a nih ti Hebrai 12 chun a hril:
Sinai tlang chu tawk thei a na, chu tlang chu mei chok zur zur suokna, thim sa mupin a bawm, thlipui a hràngna, tawtawrawt an rîk ruoi ruoina, ri nasa tak hung suokna a nih. Chu rawl hretuhai chun thu dang hril zom pei lo dingin an ngèn a. Sa khomin tlâng chu a tawk chun lunga dèng hlum ding a nih ti thupek chu an dawl zo nawh.
A tri-um èm leiin Mosie khomin, “Triin ka’n thin” a ti hiel kha. (Hebrai 12:18-21)
Pathien chu hnai el ruol an naw a, pawng nel hai chun an thipui thei ti a chieng bok.
Isarel hai kha Kanaan ram ah Pathien in a thruoi lut tum lai khan Pathien in an tlonpui nuom naw a, Ama hnai a um thei chi an ni naw lei khan hieng hin Pathien in Mosi kuomah a ti a nih.
Hieng thu hi Israelhai kuomah hril rawh: ‘Hnam lulul tak in nih. Chom khat khom ka’n tlonpui chêu chun ka sukbohmang pal el thei chêu a nih. (Exodus 33:5)
Mosi khan Pathien kha a biek pop hrim hrim a , bokkhupin chibai bukin hieng hin a ngen ta a – ‘Aw LALPA, tuhin i mit ka tlung takzet a ni chun LALPA chun mi fepui hrâm raw se. Hnam lulul tak chu an ni ngei el, sienkhom kan rǐtlona le suolnahai chu ngaidam la, i ro hluotuah mi pom lul rawh’ (Exodus 34: 8,9). Pathien chun a siehlaw thu chu a ngai a, tabernacle a chun a mihai lai a cheng ta a nih.
Mihriem hi suol a sip ei ni leiin tabernacle a Pathien Isarel hai lai a cheng khan suol lei a an bohmang naw na ding le Pathien chu inlaichinna an nei pui thei na ding le Pathien laka and in thieng na dingin ran thisenin an in thawi ngar a ngai a; tabernacle ah Pathien in Isarel hai inlaichinna a nei pui lai khan kum khat sungin ran 1246 vel an that a nih. Hieng hi nitin a inthawina , Sabbath inthawina, Thlathar inthawina, Fekan Ruoithre karkhat sung a inthawina hai, Kut hai a inthawina hai le Intlanna Ni a inthawina hai bel kop a kel, beram, beram chal le bawngchal hai kum khat a an inthawizat bel kop a nih. Hieng baka hin mimal a Pathien kuomah ran a inthawina tamtak a um sa bok a. Pathien hnai a lo in tak em em a, tabernacle a Hmun Inthiengtak, Pathien cheng na hmun, lem chu puonzar in a khardan tlat a, kum khat a voi khat chau Thiempu Laltak in ama suol thuphachawina ran thisen le mipui suol thuphachawina ran thisen chawi in a lut thei trok a nih.
Kum khata voikhat a lut bak chu Thiempu Laltak khom Hmun Inthiengtak a chun a lut thei naw a, hun dang popo a chun puonzar chun tu lut thei naw na dingin Hmun Inthiengtak chu a khardan tlat a nih. Suol in Pathien hnai thei lo in mihriem chu a lo siem ta leiin ei suol man bat tlak in a um zet naw chun suol chun Pathien lak a inthawkin a mi thre tlat a nih.
Thuthlung hlui a suol anthoka intlanna, a hlimthla a lo um, mihriem suol thuphachawina dinga ran thisen lo luong hlak popo kha a tak Isu Krista a hung khan a nawn a nawn a inthawina nei hlak hai kha trul talo dingin voikhat in a thisen thienghlim in suol tadinga inthawina chu a lo inhlan tah:
Krista ruok chun chatuona dinga suol ngaidamna voi khat a’n hlàn hnungin, Pathien chang tieng a hang inthrung tah a.
Chu taka inthok chun a hmêlmahai ke sirsana a hmang hun ding chu a nghâk ta zing a.
Voi khat a’n hlànna khan a sukthienghlimhai chu chatuona dingin a sukfamkim tah a nih. (Hebrai 10:12-14)
Krista chun ei ta dingin a thisen an hlan ta leiin Ama ring nuom taphot chun a thisen leia suol ngaidamna, thiemchangna, sukthienghlimna, intlanna, suol sawpfaina le Pathien le inremna hai ei chang thei tah.
Isu Krista chu hnuoi tabernacle a ni ta lo in thil thra tlung tah le la tlung mĕk dinga Thiempu laltak a hung ni khan, biekbuk ropui lem le thienghlim lem, mihriem kuta bawl ni lo, khawvela thilsiem ang khom ni lo chu a lût thleng a (Hebrai 9 :11), van Pathien umna hmun ngei a chun ei inlang ve theina dingin lampui a lo siem ta a nih.
Hnuoi a tabernacle a pindan inril tak ni ta loin, kuta bawl lo, khawvela thilsiem ang khom ni lo, van hmun a Hmun thienglimtak Pathien umna hmun a chun Isu Krista ringtu hai chu a thisen leiin ngamtakin ei lut thei tah.
“Chuleiin unauhai, Isu thisenin Hmun Thienghlimtaka ngam taka lŭt theina lampui thar le hring, indâidànna puonzâr fe thlengna lampui chu, a mi hongpek tah a, chu puonzâr chu a taksa kha a nih.
Chuongchun, Pathien sungkuohai chun Thiempu Ropuitak ei nei leiin, suol leia inthiem nawna lungril sawpfaipĕka umin, ei taksa khom tui thienghlima sawp faiin, lungril thienghlim tak le ringnaa inhriet chiengna nghet tak leh Pathien chu hnai ei tiu” ( Hebrai 10: 19-22)
Pathien hnai dan lampui chu fie tak tarlang in a um ta anih.
Ei lam rak rak lei in Pathien hnai el thei an naw a, puithuna nasatak hringpuiin, khun le titak em em a ei um lei ngot khom a Pathien hnai thei an nawh. Bible ei tiem rawn lei le ei trongtrai rawn lei ringot khoma Pathien ei hnai thei chuong nawh. Kristien ni hi sakhuomi nina el an nawh a, ringna lei a Pathien lawmzawng mi nina a ni lem. A Isu nekin Kristien sakhuo dan ah ringna ei in nghat a ni chun Pathien hnai tak tak thei a ni hmel nawh.
Isu thisen chau a nih Pathien Hmun Thienghlimtak min hnai tir thei tu chu. Mi fel famkim Isu, mi felnaw hai ta ding a a thisen thienghlim inhlantu, lei chau in Pathien ei hnai thei. Thilthrathaw lei khom an naw a, ringna lei chau a nih. Isu Krista thisen hlutzi hre a A thisen thilthawtheina ring ngam hai chu an nih Pathien hnai thei hai chu.
Chuleichun, Pathien ropui le inza um Sinai tlang ah a hung trum a, ‘ tlang chu mei chok zur zur suokna, thim sa mupin a bawm, thlipui a hràngna, tawtawrawt an rîk ruoi ruoina, ri nasa tak hung suokna’ niin Isarel mipui hai tuor zo naw le Mosi meu khom a tri a an thin el na hmun ang kha ni ta loin Isu thisen thilthawtheina zara Krista ringtu hai ram tlungna chu hi hi an tah:
Zaiawn tlang, Pathien hring khawpui, van Jerusalemah, vantirko sang tam tak hai, naulutir kohran, vana hming chuong hai, mi tin ro rêlpêktu Pathien le sukfamkima um tah mi fel thlarau hai inkhawmpuina hmaah in ngǐr tah a (naki hun a ding ni loin, tu hin an tah)
Abel thisen nêka thra lema thu hril thei thisen thêtu Isu, thuthlung thar palai kuom chu in tlung tah a ni hi. (Hebrai 12:22-24).
Ringna bo chun hi ram hi hriet thei an nawh.
Khawvel hi chu kumhlun lo, innghing thei, a chakna pum a bohmang mek le danglam thei zing a ni a; lalram le rambung hai khom an ngirsuok a, an ropui a, an chuoi nawk a, an boral a. Nisa hnuoi a thil um hai hi teplo Thuhriltu in Bible a lo ti kha a ni tak zet el.
Khawvel hi buoina khawvel a na, voi hnih indopui a tuok ta, rambung le rambung indona hlak a um deu zing. 1900 anthok a tu chen a indona a mihriem a thi zat hi 108, 000, 000 vel an nih a, khawvel a indona hrim hrim a thizat popo hi 1, 000, 000, 000 vel ni ta dinga ngai a nih. Kum 3, 400 sunga mihriem chanchin sui na a hin kum 268 chau remna le muongna a um ni a sui a ni bok. Iengang in changkang ang in um ila khom mihriem hi chu ringtlak ei ni naw a, khawvel hi innghatna tlat an naw top el.
Lirinnghing, thipui, ruopui, tuilien, khaw inthral le lum talu le dei talu in mihriem tamtak hringna a lak zing bok a; hri tri bai um tak tak le natna hai in a nuoi tel tel in mi a sukhlum ta a, a sukhlum zing bok. Kawvela hin chu iengkhom hi a det in do le a takchang a um nawh.
Bible in a hril angin, sukhning a um thei hai chu inhning a ta, sukhning theilo hai chau an um sawng ding ani lei in Isu Krista thisen lei a Pathien hnai tu hai ram chang hi ei chieng a ngai:
Chuongchun, ram sukhnîng thei ruol lo ei nei leiin lawm ei tiu, inzà tak le trì tak pumin a lawmzawngin Pathien rong chu bâwl ei tiu.
Ei Pathien hi mi kăng hmang thei mei a ni takzet si a.
(Hebrai 12: 28, 29)
Isu Krista thisen zara Pathien hnai a, a angsung a chawl hadamna zawng bak chu thaw thei ei nei nawh. Chatuon lungpui Krista ah naw chu inghatna ding ei nei nawh.
Pathien beramte, a thisen a min tlantu, Pathien hnai thei dinga lampui mi siem pektu chu inpak in um raw seh!
N.B. Bible chang lak hai hi Hmar Bible, Delhi Version, 2015-a mi an nih.
Be First to Comment