Sêlna thu tin dawng hnung,
Lâwmna hmêl hmu ve lovin;
Remna lungril ngai êm êmin,
Țhangpuitu le santu invâiin;
Beidawnga hringnun hmang,
Damna famkim LALPA ngaiin.
Tuol lêng ve khawm ngam lo,
Harsatna khur-a intâng leiin;
Hmêl hriet lo anga hringnun,
A mala dâwnin a rinum vieu;
Insam vawng rem thei lul lo,
Hadamna hmun ngaia inrûm;
Ka tuok ang thil tuok ve thei,
Ditsakna ri pângngâi dawng;
Țhangpuitu hmêl hmu beisei,
Sûn le zân ka’n tâwina hmun;
Hretu taphawtin a dam nawh,
Ngaituona a rik leia zâng ni lo.
Sûng le kuo laka inthlahrung,
Mâni ringawta phur zo si lo;
Ruol le pai laia thlasietna dâm,
A tak ngêia tawng leia mitthli;
Hnêmtu ding an um si naw a!
Hi lai hin nun khawsâwt takin.
Rimsikna sîk hran ngai lovin,
Innuina ding a vâng ngawt el;
Hnuoi dân suong ding um lo,
Thlâkhla ding hrim a um nawh;
Khuol inzinna rama lêng ve hi,
Hlun lo ram-a thil hlun um si lo.
Bethel, Tuiṭhaphâi, 4:15 p.m. Changer ni 25, 2020
Be First to Comment