Nasa taka insîngsat tia țhang fan fanin,
Ditsaktu țawngkam a hung tlung zing;
A mei mei a ni naw thu hriet a chieng,
Hming inlang thei khawpa lungrila um;
Inbuotsaina khawm a kawp a têla nei,
Sienkhawm UPSC a la pâr naw tlat el!
Thei naw um bîk lo tia la fe pei tumin,
Theitâwp a tâwp dêr hmaa pût thar a;
Hnung tienga hnâwltu an lo um palin,
Hma tienga beiseina suktlâwmtu ni lo;
Vawi le chang, hnung le hma lampui a,
Tling ngêi tuma tha thara la pût tharin.
India ram leilung le mipui khawsakna,
Inchen lo ti chu inang hnai lo a ni si a;
Inthlier bîkna le intibingna boruok a sâ,
Mimal chanvo le indikna chen a buoi;
Intum ding zawng ngai lovin a um zing,
UPSC 2020 hi vêl nâwk tia sawn rem lo.
Keia anga la tling lo an um ve ka ring a,
Lung hnuol lova la pu țâl țâl a pawimaw;
Thâwk le khat, sûn le zân khata zawng,
A awlâi naw thu chu inzâwt țûl kher lo;
Naupang inhnelna mei meia chei dâm,
UPSC hi buon tak tak a ngai ti a fie am?
Intlânsiekna khawvêla hringnun hmang,
A vêl vêla hril dinga hun inpêk a ni chun;
Mâni chan ang hril mâwi hran ngai lovin,
Mi po po khawm tling vawng chuong lo;
Hlawtlingna hun țha a la um zing ringin,
La pût thar nâwk mawl a ngai tak zet ie!
Bethel, Tuiṭhaphâi, 6:00 p.m. Changer ni 24, 2020
Be First to Comment