A la ṭuoi ding nghâka hun hmangin,
Ngaituona inthûk taka mi ṭhuoi lûtin;
Thil iengkimin mumal tak tak nei lo,
A um naw hlimpui ang chauva nêpin;
Beiseina hruia intâng vêl, hriemmi,
Hnuoi hringnun hi la tâwp ngêi ding!
Hla tak thlîra hma tieng intâwl peiin,
Hmu le chang hnunga hlimna hlun lo;
A nêka ṭha le mâwi lem chang tumin,
Chu khawm chu famkim lova bo ding;
Insâng lem le thuneitu lem inchu a,
Hnuoi hringnun hmangin dai sâwt lo!
A mak ngawt el tia mâksan thei lo,
Ma tum lova pung deu deuva hriet;
Hripui natna le Eden natna tuokin,
Hringmi chan hi thâm ral dinga um;
Thlarau damna ngai pawimaw, a ṭha,
Hnuoi hringnun pâr khawm umze bo!
Hmangaina zûna tlep rawng rawngin,
Awlsam taka siem fâwm ni si lovin;
Ditthlangna khawm inthlang thei lo,
Intiempui sa tia lâwmna lampui dang;
A dang ni tum chu ringum nawna,
Hnuoi hringnun hrim dâwnin a pik!
A um sawng naw ding hre chiengin,
Hnung tieng le hma tieng ei tiem a;
Hmusitna le chapona nun hnâwlin,
Inhniek hlawp hlawpa la’n ṭhe ding;
Hun lo rama chêngin, LALPA ngaiin,
Hnuoi hringnun hi fîmkhur takin aw!
Be First to Comment