A Tâ Ka Ni â – Rev. Cliff Kawldinglien Joute

“A tâ ka ni â, a rawng ka bâwl hlak Pathien …vawizân hin ka kâwlah a hung ngîr â” (Thilthâwhâi 27:23)

I hringnuna, harsatna thlipuiin a nuoi hlak che am? Kum 2006 khan rawng bâwlna lê inzawmin, Suongpuilawn, Mizoram-â inthawkin kan station Khawlien panin Pastor C. Parlienkung leh kêin lam kan lâwn â. Chawhmâ po chu boruok thawveng takin a um â, chawhnung tieng chun inring lâwk lê insa seng hman ngâinâ um lovin thlipui hrâng lê riel nasa tak hung tla chu kan tuor â. Ṭî a um kher el! Kan mangangna lê beidawngna lakâ inthawkâ inhum himna ding nasa takâ kan zawng lâi chun kan pahni inlengna ding tâwk chie lungpui kan hmu â. Chû lungpui phênna chun thlipui lê riel tâwp hmâ po chun kan um ta â.

Harsatna iengkhawm tuok lovâ, thil iengkim a nî dân dingâ a fê lâi chun mihriem hin hrât tâwk lê thil thâw thei tâwkâ inngâiin mi dang pawimâw bêkin ei inhriet ngâi nawh. Nisienlâkhawm, hringnun harsatna thlipuiin a mi hang nuoi meu chun, hî hmaâ ei thla muongpui hlak mihriem varnâ, thiemnâ, thil thâw theinâ lê rem hrietna hâi chu iengmalo phâk chin tâwk nei tî ei hmu suok hlak.

Thilthâwhâi 27 ei tiem chun, Tirko Paula chun, Chanchin Ṭha a hril leiin manin a um â, Julius, Rome sipai hotû chun Rome khawpui pan dingin a ṭhuoi â, ni tam tak lawngah an chuong hnungin, ni khat chu sim thlî chu damteâ a hung hrâng lâi chun, an dit zâwng an hmû amani an sâwn â, tuipuiah thlamuong takâ an um lâi zingin, Eurokuilo thlipui chun an chuongna lawng lê annî chu a hung nuoi chîm el ta â.

Chuong mangangna thlipui lê thîna hlim ruom an tuor lâi mêkâ Tirko Paula ṭawngbâu, “A tâ ka ni â, a rawng ka bâwl hlak Pathien vântirko pakhat vawizân hin ka kâwla a hung ngîr â” tî hmangin harsatna thlipuiâ inthawk Pathien-in a mî hâi a san suok dân hang inchûk tum ei tih.

Tirko Paula-in a chuongpui hâi kuomâ a thu hril hin, hringnun harsatna thlipui hmasuon dân ding thil pathum pawimâw deu deu el a um â, chuong hâi chu:

A pakhatnâ. “A TÂ KA NI Â…” (Verse 27:23): Pathien ringtu hâi chu Îsû Khrîstâ zârin Pathien nâu, Pathien tâ ei ni â, ei rochan khawm Pathien a nih. Pathien chu ei hringna hnâr a nih.

Îsû Khrîstâ Khrâws-â thî khan, ringtu hâi tâ dingin khawvêl thil iengkhawm mi mâksanpêk a nei naw â, ram dâm, in ropui dâm, sum le pâi dâm a mi mâksanpêk nawh. Amîruokchu, rochan po po lâiâ hlu tak a mi mâksanpêk chu hnuoi lê vân Siemtû, Pâ Pathien lê ei inkâr inlâichinna lampui thar a mi hawngpêk hi a nih. Khrîstâ zâra, Pathien ngêi chu ei rochan a lo ni tâk leiin, Pathien hausakna chu ei ta a ni ta â, harsatna thlipui lê ṭitumna hmuna khawm a mi san suok thei tî hi ring ngam ding a nih. Krista chu ei Lungpui nghet a ni si â.

A pahnîna. “A RAWNG KA BÂWL HLAK PATHIEN” (verse 27:23b) tîin, Paula-in amâ ngîrhmun a puong suok hi a va ropui de âw. Ieng tik lâi khawmâ danglam ngâi lo Pathien chun amâ nâu hâiin mangangna lê harsatna thlipui an tuok lâiin a mâksan ngâi nawh.

Mi tam tak chun khawvêl mâwina lê inhawinâ an chen â, khawvêl hi ring tlâk lê innghatna tlâkâ ngâiin, an dit zâwng lê inhawitirna pe theitû am a nih an ti hlak. Nisienlâkhawm, ieng tik niâ amani chu, khawvêl-in a inphatsan hun la tlung a ti â, chu phât chun, insîrin umzie nei ta naw ni.

• Tangka sumâ ringnâ innghattu hâi chu tangka bawkin la inphatsan vê’ng a tih.

• Mânî varnâ, thiemna lê thil thâw theina ringtu khawm varnâ, thiemna le thil thâw theinain a la mâksan hun um a tih.

• Hmingthangna lê inlârnaâ innghat hlak hâi chu ni khat chu mangangna lê beidawngnain a inlârna chu lâ zâmral a tih.

Pathien-a chun innghat lâ, Amâ chun ieng tik huna khawm inphatsan ngâi nâw ni chê.

Paula-in hî thû hi a hriet chieng êm leiin thlipui ṭîum takin a nuoi mêk lâi lê sietna râpthlâk tak a tuok mêk lâi khawmin nghet takâ ngîrin Pathien rawng bâwltû a nînâ puongin; Pathien khawmin a theinghil naw â, thlipui ṭîumâ inthawk san suoktû dingin a vântirko a tir el a nih. Ûnâu dit tak, i tâ dingin Pathien ringumnâ chu chatuon chenin a um zing ding a nih.

Harsatna thlipui hnuoia hnêna thu rûk, a pathumna, Paula-in a mi inchûktir chu, “PATHIEN THUTIEM THIL THÂW THEINÂ A NIH” (verse 27:25). Pathien chu iengkim thâw thei, hnuoi lê vân siemtû a ni â, Amâ chu thutak, a thutiem chu chatuon chen khawmin inkhêl ngâi nâw ni.

Thu khârnâ:        Paula chu Pathien tâ a ni â, Pathien rawng bâwltû lê Pathien thutiem nghet takâ ring tlattû a nih. Einî khawm Khrîstâ zârin Pathien nâu lê a tâ hâi ei ni â; Hmangaiâ mi intlantû, a thutiem chu chel tlatin, harsatna thlipui hnuoia khawm ringum takâ zuiin, a rawng bâwl tlat ei tîu. Khawvêl thila innghat lovin, Chatuon Pathien, mi inphatsan ngâi lo chu ringin, Amaa innghat lem ei tîu. Âmên!