Suonlam Tling Lo – V.K. Pangamte

Thaw dinga intiem ta sa a um hlak,
A nêka sâ phêk ṭûl khawm a la um;
Hun vawng indik a pawimawzie chu,
Bituk neia sin thaw a hlâwk thei a;
Umze nei lova thaw ding ṭhul chîng,
Suonlam tling lo laia inhnuoi zuol!

Insûnga inthawka hei ṭan phawtin,
Tum bîk nei lova thaw mei mei;
Ennawna a sietna lai siem ṭha a,
Hunbi ṭha tak zuia ṭhang la tlângin;
Thabo nungchang puta inhlêmna,
Suonlam tling lo ruolpa a buoi ie!

Kohran le pâwl chungchâng hril chu,
A chawngpupa ṭhibe bun ni si lovin;
Hril nuom le ziek nuom a tam vieu,
A bula phûr hlut thaw chu dai sâwt lo;
Inthlawppui infûk naw thua buoi dâm,
Hmasâwnna dinga suonlam tling lo!

Khawtlâng inrêlbâwl dân a’n chin pei,
Sût thâwl ding a tam luot leia pik ni’n;
Hringmi zalênna nun a derthâwng,
Hnawksak nun le inpawl a pung hrât;
Mi dang intuma mâni insiemṭha si lo,
Suonlam fahra nêka pil inthûk lem!

Mimal hril lova suktâwp nghâl chu,
A kim nawzie suklangtu ni thei ding;
Thil ṭha thaw dinga mi dang nghâk,
Inpâktu tlâwm leia thaw ding ṭhulin;
Ṭan thei lo chen mi dang intum chu,
Suonlam tling lo nun chu ma raw se!