Sûnna Râwl Ri Angin! – V.K. Pangamte

Vawitûka thu hung tlung rêng chu,
Inbuotsaina thupuia ṭhang ni lovin;
Lungnatum leia thlaphâng râwl ri,
Ka ruol ṭha L.Ringsan Zote thu intlun;
Innuina ding hrim ni lovin, a dang,
Mercy chûnnu natna thu a pawi ie!

A hmuna hril thei ni si lovin, a na!
Hringmi lairil a fang vawng vawng;
Thu le hla inzâwt leia dam hmêl lo,
A tuortu tak tak ta dinga chieng lem;
Hnuoi rama thil tuok laia na êm êm,
Mercy mitthli hul a harsapêk ie!

Hnêmtu ka tling zo naw ti hre tlatin,
Ngaituona inthûk takin a mi fen a;
Ṭawngkam mâwi hmanga a zie um lo,
Inhnêmna ding dang a um si nawh;
Ruolpa le thu inthawn tuo thei sun,
Siemtu kuoma lungril taka ṭawngṭai.

Natna phur taphawt a zâng hlak am?
A chîn le a lien inkhi thiem tlin lo;
Ṭhenkhat ta dinga a nêp meta inlang,
Pumpel thei si lo, natna dang dang;
Siemtu le inzawmna fel tak nei a ṭûl,
Unau Mercy, Lalpa’n a hmangai che!

Lungriem mitthli far zawi zawi hielin,
Hmangai chûnnu la dam sia sûn ang;
Hril ding invâi ruoiin nun a pik hle a,
Kan hnêm tumna thuziek tâwi chu:
‘Aw LALPA, hi hi kan ngên takzet che,
Mercy chûnnu natna sukdam theitu.’

—-

Bethel, Tuiṭhaphai, 9:30 a.m. Thlazîng ni 21, 2020