NEITHAM.IN

THU DIK HRIL LÊ SA ZÂNG KÂP A NÂ.

Thu dik ni sien khawm, mî thil thâw suol annâwleh an muolphona ding thû ei hril chun, an tuor nat taluot leiin, a hriltû an theidâ phâ hlak. Hieng angâ lungril nat hi, sa pêl phât lê, sâ a zâng taka an kâp chun, hlâ fê thei loin a tlu tawp hlak lê têkhînain an hmang hlak.

EI THÂW DAWL LEH DAWL EI FÂK Â. EI THÂW RAK LEH MARAK EI FÂK.

Tien lâi chun, sin thâw inel a ni hlak. A tla se bîk deu hâi, dawl lê chek ringawt ringâ khawsa hâi chu, hmusitin an dêusâw hlak. Hieng ang thil lei hin, nû le pâ hâiin an nâu hâi taimâk dingin an infûi rawp hlak. An zil phât le khawm, “Ei thâw dawl leh dawl ei fâk â; ei thâw rak leh marak ei fâk hlak” tiin an hal hlak.

A CHÂNGIN HMÂR THING A PÂR Â, A CHÂNGIN SIM THING A PÂR.

Vawisunâ hausa lê che thei hâi khawm, zînga an hung tla se thei ang bawkin, tû ang hunâ hmûsitum, pasie lê tû ihriet phâk lo hâi khawm, hun a hung inher liem pei â, vângneinain a hung thlawp vê ta chun, an khawsak dân khawm a inthlâkthleng thei hlak a nih. Hieng ang mi se tê tê hâi lâiâ inthawk khawm hin, mi huoisen, ropui lê hausa hâi an hung suok thei hlak. Chû lei chun, inhmusit bîk ding tû khawm ei um nawh tî hril tumnâ a ni deu tak. ‘A chângin hmâr thing a pâr â, a chângin sim thing a pâr’ an lo ti hlak a nih. Tumrûna lê teirei peinâ neiâ, pâr suok vê tum seng ding a nih tî inchuktirna angâ hmang thei khawm a nih.

ṬAWNG INBUO LÊ TUI INBUO RÛT THEI A NI NAWH.

Tui a inbaw ta chun a luong dar nghâl a, rût thei a ni ta ngâi nawh. Chuong ang bawk chun, vawi khat ei ṭawng suok ta chu, a indar nghâl â, lâk kîr thei a ni ta ngâi nawh. Insîr ieng ang inlâ khawm, ei kei kîr thei ta ngâi nâw a nih. Pî le pû hâi chun mî theidâ hril an inlâu thei êm êm. Ṭawng tlahawl lê lei kuoi thei hrim hrim, sâk suok ngâi lo dingin, “Ṭawng inbuo lê tui inbuo rût thei a ni ta nawh” tiin an nâu hâi fîmkhur dingin an infûi hlak a nih.

NÛ LE PÂ THU ÂWI PHUNCHAWNG ZÂWLA A MÂWNG Â, NÛ LE PÂ THU ÂWI LO INPANG ṬÊNA A MÂWNG.

Nû le pâ thu âwi hâi chu an hmû ingîlin an tluong â. Malsâwmna tam tak an dawng hlak. Nû le pâ thununnâ ngâisak lo, mâni thû thua khawsa hlak hâi chu harsatna lê beidawngnâ chi tin rêngin a bâwm nuom hlak. Chu lei chun, pî le pû hâi chun, an nâu hâi chu an thû le hlâ zâwm dingin an infûi hlak. An thû âwi lo hâi zilnain hî ṭawngka suok hi an hmang hlak a nih. Phunchawng thing (pângpat kûng, cotton tree) hi zâwla a mâwng deu tak a. Inpâng thing ruok hi chu ṭênbarama a mâwng hlak. Hî thing hâi hi ûnâu niin an hril a. Phunchawng hi thu âwi thei tak a nî leiâ zâwlâ mâwng lê, inpâng hi thu âwi lo a nî leiâ ṭênâ mâwng niin an hril a nih. Chu lei chun, thu âwi lo an nâu hâi kuoma, “Nû le pâ thu âwi lo, pâng ṭên ṭo thâw’ng i tih” an ti hlak a nih.

TAIMÂK CHU IENG DANGIN A MÂK NAW Â, KÂWNG CHAUVIN A MÂK.

Mi taimâ hâi chu a sûr a sâ hnuoiâ sin rum thâwin fâk an zawng hlak â, âwl rêng an nei ngâi nawh. “Ka sâwl, ka kham” ti lovâ sin rum thâw an nî leiin, an rû an chângin a tuor ngâi naw â, an kâwng a napêk hlak. Amîruokchu, taimâk chun lukhâwng a nei têi hlak â. Mi taima chu an hnieng inhnâr deu nghê nghê hlak. Kâwngin thâwhlâ nâw sien lâ lem chu, mi taimâ chu mi tinin an ngâi sâng â, inzâ khawm an inzâ hlak. Chu lei chun, upâ hâiin, “Taimâk chu ieng dangin a mâk naw â, kâwng chauvin a mâk” an lo ti hlak a nih.

KEIPUIIN A ZIE A THUP THEI NAWH.

Mihriem hin a nungchang hlui hi, sim lê bânsan intak a ti hlak. Sim ta lê bânsan ta angin inlang hlak sien khawm, keipuiin a zie a thup thei nâw ang bawkin, nuna a hung inlang nâwk hlak a nih. Keipui khawm hin nun ṭhat lê zâidam tum ieng ang sien khawm, a phîng a ṭâm â, sa sê ding a hmu phât phât chu, a zie bawk a hung suok nâwk hlak. Nunghâk mî tak annâwleh tlangvâl mî tak chu, nuhmei pasal an nei hnung khawmin, an zepui a suok nâwk châng a um rawp hlak. Hî lei hin ‘Keipuiin a zie a thup thei nghâl lo chu’ tî hi a hlâw hlak a nih.

RUONG CHÂICHE THLÂK.

That tumâ a sîr tuokâ inhuol khum. Hnung tieng le hma tiengâ hnâw chêp. Hi hi ṭawngka suok hi inthatna tieng kher kâwk lo khawmâ an hmang hlak. Mîin ei sietna ding ngawt phan â, ei suksuol inchân dawp dawpâ ṭhang an khâw hi ruong châiche inthlâk khumnâ a nih.