Nau Enkawl – V.K. Pangamte

Tlin taka nau enkawl chungchâng a,
A tam le a tlâwm thu ni lova harsa;
ȚAWNGȚAINA thupui-a nei meu siin,
Ring naw tieng daia petek lampui;
Hnâwl vawng thei a ni der si naw a,
Inthlada lem chun a pawi sei thei ie!

Ringtu sûngkuo le rawngbâwltu In,
Hriet naw tehlêm insîr rem bawk lo;
Nauvin nu le pa a sêl ngam el dâm,
Thudik lo thudika inchangtir tum a;
Khawlaidung țawng ring lem angin,
Nau enkawl thiem a awl-âi naw ie!

Mo le tarpi hai kâr a hla vieu am?
Tarpu rorêlna palzûtin a um chun;
Fâk le dâwn burip ringawta ringin,
Hun sâwt a hadam chuong naw a;
Insûng rorêlna khâwl a derthâwng,
Nau enkawl tlin vawr vawr inlâr lo.

Huoi narân ringawt thaw chu buoina,
Tharum insuoa thuhne tum lem chu;
Dit naw chen chen thil a tlung thei a,
Pathien thu ringsana nau enkawl tlat;
Țhenkhat lem chu an la petek tho tho,
Mawphurna tak taka nei bawk a țha.

Lululna thlarau chang zo ang ela khir,
A zuolkâi bîk deu an lam um ta pei a;
Iengti ang taka siem fel dingin am?
Inthuruol a pawimaw bêk bêk ti hre a;
Hriltu khawma mâni nuna phur indik,
Nau enkawl thiem dinga ditsakna ri!

Bethel, Tuiṭhaphâi, 1:30 p.m. Changer ni 27, 2020