Thu Âwi Nun – V.K. Pangamte

Thil ṭha hre sia zâwm nuom lo nun,
A petek zâwnga la tlat hringnun;
Naupang le puitling kâr indang lovin,
Lululna sala intâng laklaw a pawi;
Țhatpui ding ni lova nuom zawngin,
Thu âwi nun a thla a se ngâwi ngâwi!

Hlim zing le lâwm zing tum chu,
A thei naw ding thila intâlna nun;
Mimal ngaidân ringawt famkim lovin,
Hmangaitu râwl ngaithlâk a hun ie;
Hriemmi inbûrna sin inang vawng lo,
Thu âwi nun ruok chu tiem pei a ṭha!

Mâni um nawna dinga nun hmang,
Țhangthar nun a buoi hrât ngawt el;
Felna le ṭhatna dân khawm a letlingin,
Innghatna ban tia ring ngam lovin;
Sietna râpthlâk a tlung hma ngêiin,
Thu âwi nun inchûk mawl mawlin aw!

Khawvêl zântieng tia khêk inring,
Țawngkam inring chau a hlawsam;
Lampui indik hraw si lova nun inchin,
Țhuoi suokna sinthawtu, ringumin;
Insûng nun hrisêl a pawimaw hmasa,
Thu âwi nun intlawnpui chu a hadam!

Vervêkna ṭhang a pung deu deu,
Hmasielna le duâmna nuna inbâtin;
A um sawng naw ding rama chêngin,
Hraw nuom lova pil hmang mêk;
Damna Zion lawng sûnga lût dingin,
Thu âwi nun pawm vawng vawngin!