Saula hi lêkha thiem, dân hrietna tiengâ, Gamaliel a hnuoiâ seilien (advocate/ukil) ei tî ang hi a nih. Sâkhuona tienga chun, Farisâi pâwlâ mî, hotu hâi inpâk hlâw khawpâ ṭhahnem ngâi êm êm, hnam tienga, Juda inziet, Hebrâi kârâ Hebrâi a nih. A mihriem piengpui mizie hi mi fel, mi taimâ, tlângram pâ tî dân takâ, tlâwmngâina nei ṭhâ niin â’n lang. A thâwna tieng tieng, hlâ nei dêr lovâ, a hmaâ um chu hlen ngêi nuom mî a nih tî, a chanchin ei tiemâ inthawk hin hriet thei a nih. A lam hluotû niâ a hriet chu, a fâi thei ang patâwpâ inthiel vawng nuom mihriem a nih tî Khrîstien hâi chunga a châng dâna inthawk khawm hin â’n lang. Ka thlîr vêna tukverâ inthawk lem chun, tû lâi bâwk nâl nazawng hâi tluk lo a nih. Amâ tiengâ ṭhang nâw hâi tâ dingâ thâwhlâum tak a nî hmêl. Hî pâ nunâ thil tlung tlâwmtê hei en met ei tih.
Varin a sun thlûk tawp:
A hmaâ ngîr thei tû khawm um lo ang elâ Khrîstien a hmû hmû manâ, khuop â, lung ina nam lût zawt zawt-pâ chu a beisei nâwna tiengâ inthawkin var danglam tak, a la hmêl hriet ngâi lo chun a hei sun (khâw) pawp chun, ṭhang a lâk hman naw ie. Hnuoia a tlu dêr â, “Saula, Saula! Nangin ieng dingâ i mi suknawmnat am a ni â? tiin varâ inthawk chun râwlin a hung bâwzui â. A kâwlâ um hâi (thlawptû, bei nâwi beiseitû hâi ni mei an tih) hlakâ râwl an hriet â chu tû khawm mitâ hmû an um nawh. An hotupâ hlak châng thei loin hnuoiah â’n thal ta zing bawk, buoithlâkum ti ngawt an tih. Tû lâi angâ camera lê CCTV-â lo latû um hâi sien chu, hmû nuom um hlê’ng an tih. Saula ruok chu a lungril tieng a buoi nawh. Sâkhuona tiengâ hotû ni phâk a ni bawk â, ṭawng dân ding â’n vâi nawh, “Lalpâ tû’m i ni â?” tiin a zuk indawn nghâl. Râwl chun, “I suknawmnat Îsû ka nih” a hung ti â, a thâw ding a hrilzui nghâl. “Tho lâ, khuoa sawn lût lâ, i thâw ding lo hril an ti chê” a ti â. Khaw hmû nâw nanâ nâ chu, Saula chun thâw thei a nei ta nawh. A hmaâ an nuom lê nuom nâw thû hril lovâ vau malamâ hmawl fiek leh, mî thâw ding hriltû kha, a thâw ding an lo hril vê ding a ni tah. Inti pâ deu kha, a hnê lo â’n tuokpui zet chun, lâw dân chu a hriet ta nâw chu a ni tak. Vawisûn lê dârkârâ, “kei ka ni annâwm” ti hâi khawm hin an buon hnê lo an intuokpui hun, tlâwm hun, hrât nâw hun chu an la nei ding a nih. Vawisûnâ ei um dân hin zînga ei um dân ding a la hril ding a nih tî hre tlatin ei um dâna fîmkhur ei tîu. “Mî’n i chungâ an thâw i nuom ang bawkin, mî chunga khawm thâw rawh” tî thuvar dâm hi a pawimâw hlê a nih. Ro rêltû dâwkân annâwleh Sêlkaltû dâwkânâ ei um lâiâ, “Yes” ei tî hlak, ṭhungnâ ei insawn leiâ, “No” ei tî dâm; hotû ei nî lâiâ ei um dân angâ hotû ei ni nâw phât, hotû ei ni lâiâ ei um dâna mî an hung um phât, ngâi thei nâwk dêr lo hringnun neitû hâi hin, Saula inthawkâ inchûk ding ei hau khawp el. Mânî tâ dingâ ei dit kha, mi dang tâ dingin ei dit nawh tînâ a nih. Saula hin iemani tâwk chu ngâituo ngêi dingin ka zuk mitthlâ chu tie.
Khawmuol a hmu thei nawh:
Saula chu a tlûkna hmunâ inthawk chun a tho â, mitdel ang elin khawmuol a hmu thei nawh. A suntû, var hi, a hrât hlê a nih. Makna tak chu, a hawnâ (group) lamâ fê an niâ chu, var khan Saula chau a khâw thlûk â, var thil thâw theina hin mi dang a them buoi nawh. Ṭêk tlâ chu ni sien, hieng lâwmâ power hrât hin a kâwlâ mî pahni-pathum bêk them pawi a tih. Saula chu a tlûknaâ inthawkin a tho â, khawmuol a hmu thei nâw leiin ṭhangpuitu bo chun a che châng thei nawh, tlâwm tak a nih. Amâ nêk khan chu, nâupangtê khawmâ umzie a nei lem. Ruol a nei hrâm â, annî hâi chu chelbâtin, râwlin a hrilna tieng chu a pan thei hrâm a nih, tlâwm tak a nih.
Ngâituo ding tam a ti ie. A mit hin khawmuol a hmu thei nâwk dî’m? Mî a sawisak ang khan amâ hi an vuok hriel neng el dî’m, ieng tiin am a chunga ro an rêl ding? Ukîl a ni bawk â, ṭhang khâw dân ding ngâituo nasa mei a ti ie. Annâwleh, Khrîstien a sawisak lê lung inâ a khum lei khan, hung insîrin Pathien pawi a lo tâwk nasat zie ngâituo’ng a t’â, ngâidam inhniâ inrempui dân ding a ngâituo el thei bawk. Ni thum zet khawmuol hmu thei loâ, mî bu thur pêk sâ ringâ, “kei ka nih” inti pâ kha a hei um el chu a rûk takin â’n zak dî’m? Iengkhawm ni sien, a chan chu inlâk phekna chi a ni ta nâw phawt. Parbung hâi thu sima, Hnâma tui tlâ an hril angâ, vawi thum zet, “ka zawi” tîna ngîrhmun a ni ta hrim hrim. Saula vângneina chu, hmêlmâ, phuba lâknâ ni lovâ, hmangaitû kut thlâknâ a nî lei hin a zieumpêk a nih. Tuorna lê harsatnain beisei nâw ang takin sut sien lâ chê khawm, hmangaitû thil thâw a ni chun, a tâwpna chu, hlimnâ a la ni tho tho. Rinumnaâ inthawkâ, lâwmnâ hung pût dawk hi â’n hnik dân a danglam â, râwl lung kârâ tui hung puot angin â’n hnik dân “a ngâwi ngâwi” a um â, dawntû tâ dingin a manhlâ a nih. Amîruokchu, chû tui dâwn ding chun, “ka zawi” tî ngîrhmunâ um a ṭûl.
Kâwl a êng:
Ni thum zet lungril sahâl takâ a um hnungin, Saula tâ ding chun âr a khuong â, kâwl a hung êng ṭan. A hmâ tieng lampui hriltû lê a chungâ rawng bâwlna nei dingâ ruotâ um pâ Anania le chun an inhmu ta â, a chungah kut innghatin, “Ûnâupâ Saula, i mit varna ding lê Thlarâu Thienghlimâ i sip theina dingin, i hungna lampuiâ, i kuomâ inlâr Lalpâ Îsû khan i kuoma a mi hung tir a nih” a ti â. Saula tâ ding chun, ṭhang khâw lovâ, Anania hril taphawt chu, Âmên zung zung el ding a ni tah. A lem â’n hawi ta hlê nî’ng a tih, kâr loin a mitâ inthawkin phuhlip ang a tla ta nghâl â, a mit a hung var nâwk ta â, a tho â, baptîsma a chang ta tî ei hmu . Chawplechilin, khawvêl thara a zuk lêng el chu danglam a ti âwm.
Chêngna ngâi lo ram a fang ṭan:
Mi ṭhenkhat chun, Khrîstien nun (chêngna khawvêl) hi “Ram letling” an ti hlak. Chû khawvêlâ, Saula a hei khawsa ding chu buoithlâk hlê ding a nî leiin, Arabia thlalêrah kum thum zet, inchûkin, â’n sâwi zawi (training) hrim a nih. Hî khawvêl kalphung lê inpersan ram thar indinâ, ram lâk tum chu, a awlâi nâw nî’ng a tih; Îsû khawm, Pathien Nâupâ meu a niâ chu, hmun fienrielah (thlalêr) ni sâwmlî zet bû ngheiin, a tla hran a ni kha. Arabia thlalêrâ inthawkâ Saula a hung suok hnung khan chu, a chêngna ram silfên lê inmil ta lo thil chu thlâkthleng a ṭûl ta â, Saula chu Paula a hung ni â, a ruol pâwl (inthlawppui) a hung dang ta â, a hril nuom zâwng khawm a hung dang â, a khawsakna hmun khawm a dang â, a thil thlîr a dang â, thuomhnaw hlui hlîpin, thuomhnaw thar â’n bel â, mi thar a hung ni ta a nih. Saula chun thil dang nêkin, a tâ dingâ an hem dê Îsû hliemna pânser hâi kha, hmû nûomum lê hril inhâwkum a hung ni â, a hmaâ a lâwmna hâi po po kha a suklungngâitû le hnu sawn ram a hung ni â, hmêlmaâ a ngâi hâi kha, a ruol ṭhâ an hung ni tah a nih. Chêngna ngâi lo ramâ lût a nî leiin, a ram mî hâi leh an inhmu ṭan chun, thil dang nêkin, inhmêl hriet tawnnâ (self-introduction) lê thil tawng hril (testimony) a ṭûl â, chû takâ inthawk chun, a hmatiemin, a ram leilung dit zâwng ang peiin a hung khawsa ta â, a hringnun tâwp chenin, chû silfên chu inbelin, chû rama chun a lû a phûm ta a nih.
Paula (Saula) hin, thil tawng (experience) a hau leiin, mî ngîrhmun khawm a zuk hriet vat vat thei â, a rawng bâwlna khawm a hlâwkin tepuok (nghawng) a hau. A hnungâ a rawng bâwlnâ hung suizui ding khawm a siem â, a sukpuitling ngêi bawk. Kohran mipui a hmangai ziet, a lêkhathawna hâi ei hmu. Mipui tieng thilpêk zâwng lê dawng a beisei nâw thu, fel takin a hril. A hringnun kha, khawvêl (material) thilin a sukbuoi nawh. Mirimsie hmangainâ a nei lien bawk. Khrîstâ a hrietna kha, a chieng lei khan, Juda mî tam takin an uongpui lê an ibeisei, hotu chanvo, thiemna lê hmêl hriet nei ṭhat hâi kha intitheinâ lê chapopuinain a hmang vê nawh. Thlarâuvâ a hringnun khawm ṭawng hriet lo lê thil mak tam tak thaw â, inlârna lê vân thumna chenah, ṭhuoiâ a um hnung khawmâ, intitheinâ (chapona lê uongnâ) nei lo a nih. Khrîstâ ropuina lê châwimâwiâ a umna ding hluotû rêng rêng chu, dêhâwn pei dingin, Kohran hai khawm â’n fûi nasa â, a bîkin Korinth Kohran, kohran buoi lê hotu nî nuom, hlim sâng intî, tlâwmâr hâi kuoma a hril nasâ.
Tlângkâwmnâ:
Khrîstâ tlâwmnaâ inthawkâ bul inṭan hâi chu, mal sâwmnâ an dawng po leh, anniah, Khrîstâ châwimâwiin a um â, mî hâi khawmâ anniah, dâwn ding inhnik, fâk tling butak an hmu â, râwl kârâ zotui inthieng hung far thla angin dangchâr hâi hnêmtû, thlalêrâ tuikhur (oasis) ang an hung ni â, a zârzotû khawm an tam. Hî hringnun nei ding chun, Saula ni hlak kha Paula nî a ṭûl.
Be First to Comment