Zâni zân kan family devotion huna, Luka 23:26 thû hi kan tiem lang â. Îsû inchûktir hâiin amâ an mâksan vawng hnung lê Kalvari lampuiâ a dangchâr hnêmtû ding lê Amâ ṭhangpuitû ding an um ta nâw hnungâ, Simon Kurini ramâ mî, Îsû Khrîstâ Khrâws putpuitûâ a hei ṭhang el kha, ka ngâituonâ a hnê hlê.
Simon, Kurini ramâ hi, Îsû Khrîstâ inchûktir hâi lâi khan a ṭhang tî khawm hriet an’ (a ni) nawh. A thilmak thâw lâi khawm, a hming hril lê hriet ding a um bawk nawh. Amîruokchu, Kalvari lampuia, Îsû Khrîstâ’n santû ding a pawimâw hun lâi takâ a hmêl a hung inlang nal hin, inchûk ding ei nei ngêi ka ring. Chuong hai chu hang târ lang ei tih, tâwitêin:
1) Pathien ram lê Kohran rama, a bulâ inthawkin ei hming lê hmêl inlang nâw sien khawm, a hun takâ Îsû Khrîstâ Khrâws putpui dingâ ei um hi a hun tâwk.
2) A bul tieng phûr hlut â, a tâwp tieng hmêl hmû ding um ta nâw nêkin, a tâwp chena, Îsû Khrîstâ Khrâws putpuitû nî hi ziek suok lem.
3) Îsû hnung zuitû nî hi â’n hnu (a inhnu) taluo a um nawh. Zîngkârâ thâwtû lê zântiengâ sin thâwtu hâi an hlâw â’n ang (a inang) vawng tho.
4) Simon angin Îsû Khrîstâ Khrâws putpuiâ, hunbî hriet a pawimâw. Mipui tam lâi lê â’n hawi chinnâ Îsû Khrîstâ zuitû nî nêkin, phungruol an ṭîn dar vawng hnung khawmin, Îsû Khrîstâ, a Khrâws putpuitû dingin a ko chê a nih.
5) Îsû Khrîstâ zuitû hi, â’n hnû (a inhnû), â’n hmâ (a inhmâ) a um nawh. ‘Tû hun hi’ a nih, Îsû Khrîstâ’n a Khrâws putpui ding cheâ fiel hun chê.
In rêngâ kuoma, SHALOM!
Be First to Comment