Annual Audit – V.K. Pangamte

Sum le pai thil hril hmasa a ni chun,

Pâwl khat sum lâk lût le hmangna;

A enkawltu bîk le mawphurtu ha’n,

Ṭha taka enfelna nei a ṭûl inthûk a;

A hun ruot anga sukdik hrâm hrâm,

Annual Audit inkhêlpui lul lovin aw!

Thuk pathum hling anga hril sapin,

Inruol taka ngîr det meuvin a hrât a;

Chairman, Secretary le Treasurer lai,

Pathum laia pakhat a nuor pal chun;

Châu el thei tia a se tienga thu um,

Mâni sina in audit fel a pawimaw ie!

Pathum chau thlang suok ni lovin,

Member-hai ṭangkaina hre zing siin;

Indawm tuo chu hrâtna thurûka zep,

Vântlâng laia mî inpâk beisei lovin;

Thil indik le rimâwi ri intuok êm êm,

Hringnun annual audit dam raw se!

Fîmkhur naw leia khura intâng thei,

Ringum naw leia a um ta sa sukbuoi;

A hming sâm ringawta inṭâwmpui,

Dem le hril inzing tuok naw thei lo;

Sawisêlna le demna chu pârṭhi ni lo,

Annual Audit ra ṭha lo tlung raw se!

A tiemtu ta ding lieuva ziektu inhlân,

Hawrawp le thu mal rem khâwm uluk;

Chatuon rorêlna a hung tlung hun a,

Dam laia sukfel vat vat dinga infûi;

Kawtkhâr mâwi chu thlîr tâwp lovin,

Vân Annual Audit-a hringna changin.