Unau Mizie Putin Aw! – V.K. Pangamte

Pahnam binga thil thaw phawt,
Inthuruolna ṭha tak tling zo lo;
Hnam bing le chi bing suong a,
Mi dang hneng têp tum ṭâl chu;
Siemtu mit a tlung chie naw thei,
Unau mizie indik put a ṭha!

Lâwmna le sietna ni tuok hun a,
Fiel bîk le hriet bîk nei a um hlak;
Inruol lo chu sukruol thei niin,
Hmalatu bîk dinga ditsak dâm;
Ṭhe hran thiem a ṭûl takzet a,
Unau mizie hrisêl chu damna!

A pasie le a hausa inpawlna ram,
Harsatna le nun inhawina hringnun;
Indaidanna bang ṭhiek a hun ie,
Tuta hun hi a hun lai tak tia ṭhang;
Inkhâwl tam tuma duâmna tiem,
Unau mizie put chu hlimna!

Ram huopa inṭhuoi dân enin,
Hnawchêpna a zuol tiel tiel a;
ST, SC, OBCs’, General kâr a buoi,
India dânpui besana hril sei chun;
A bula ziek thuthlung inthuo vêl,
Unau mizie put mawl a hlu!

Khawsakpui thei ding ngaiven tlatin,
Mâni chana ngai ṭhenkhat a têlin;
Hnuoi mâwina narân hîp hmang ding,
A phala phal thei lul lova hum det;
Lungril ril hadamna zawnga dam,
Unau mizie lo pâr suok raw se!