Thumâ:
Hmun tin, ram tinâ Khrîstâ thisenâ intlan Kohran hâi, Îsû Khrîstâ hmingin chibai ka bȗk chêuvâ. In rêngâ kuoma Shalom! Pathien Thla muonnâ hung um râw se.
Bible-in ‘nî hâi ṭha nâw leiin, remchângna inchaw pei ro’ a tî angin, vawizȃn khawm thâw dân pângngâi lo takin hi hmunâ inthawk remchângâ hmangin, Pathien Thû ka hung hril ding a nih. Nî dang chu, tû tâ ka thu hrilna Biek ina hin, Kohran mî hâi bit murâ inṭhungin, Pathien inpâkin, Pathien Thû inchûkin an ngâithla hlak â. Tû ruok hin chu, kei lê camera man chau kan um a nih. Khawsâwt khawm a um vieuin ka hriet.
COVID-19 natna hrik chîn tak el, mit lâwngâ hmû el thei lo khawpâ chîn chun, khawvêl a mi rûn mêk â. Mi mal, sûngkuo, khawtlâng, a pasie lê a hausâ, ram hâusa lê pasie khawm thlîr bîk nei lovin a mi rûn mêk â, angkhatin a mi hrût rûl chu a tak. COVID-19-in a mi sukthlabâr â, ei chîâi â, ei hnâr a ping â, ei hatchieu met leh, ei inringhlâ â. Lungzîng um tak chu a nih.
Khawvêl hi a mangang hlê a nih. COVID-19 hin khawvêl sawrkâr lien lê ropui, râlthuom nei ṭhâ, ram hausâ ei tî hâi khawm â’n tlâwm â. Doctor thiem lê khâwl nei ṭhâ, mi mawl lê mi var hâi khawm hi, hripui ei ṭitnain a mi hrût ruol â. COVID-19 hi, râlthuom ṭha hâi hmangâ hang do el chî an’ nawh.
COVID-19 hi ieng tiin am hmasuon ei t’â?
COVID-19 leiin Biek in hâi khârin, mipui a têlpuiâ Pathien ei biekna hun hâi sukchâwl ni â, ṭhenkhatin a Pathien thu nâwthlâk, a thlarâu nâwthlâk tiâ sawisêl khawm ei um bawk. Chuong lâi zing chun, Pathien-in mihriem kuoma varna lê rem hrietnâ a sie â. Chû mihriem kuoma, Pathien-in varna lê rem hrietnâ a pêk chu a ṭha zâwng hmang hi Pathien Thû a ni lem.
Suol lê natna hrî lakâ inthawkâ fîmkhur takâ invêng hi, mihriem mâw phurnâ a ni â, damna lê vêng himna ruok chu Pathien kutâ um a nih. Chû leiin, hî hrî lakâ inthawk invêng dân dingâ sawrkâr thupêk lê kohran ṭhuoitu hâi thupêk zâwm lê zui hi mihriem thâw ding a ni â, chu chu ei Bible le khawm â’n mil a nih.
COVID-19 hin:
i) Lal Îsû Krista khawvêl lê a sûngâ um po po siemtû, khawvêl neitû pawimâwna lê hriet chiengna â’n langtir niin ka hriet.
ii) Mihriem varnâ, thiemna lê theina khêl tieng hin Pathien a um a nih tî khawvêl mî’n hriettir a nuom a nih.
iii) Khawvêl hi Pathien kutâ um a nih tî hi mi hril hriet a nuom a nih.
Chun ka la bel sâ nuom nâwk chum ringtu hâi COVID-19 dona kawnga, ei thei tâwp insuo â, hrî hi a la pung bel sâ pei khawmin, ei hriet ding chu Pathien neitû, ei ṭhatna dinga ro rêltû, COVID-19 hri ngamtû lê thu neitu neitu hâi ei nih tî theinghil nâw’ng ei tîu. COVID-19 hrî en lovin a ngam theitû lê a chungâ thu neitû hi en lem ei tîu.
Îsû Khrîstâ chu ei Foundation a ni â, Amâ chu â’n hnîng naw â, vawizȃn chen hin ei tâ dingin a la pângngâi zing â, Hebrâi 13:8-a chun, ‘Îsû Khrîstâ chu zâni lê, vawisûn lê, kumkhuo khawmin a pângngâi zing a nih’, a tih.
Amâ chu ei thlamuongna, Lungpui lê Kul bang insâng a nih. Thil iengkhawm hung tlung sien, a kutpha ropui sûnga ei him a nih. Halleluiah!
I lungril a hrisêl theina dingin, Thu thar (news) ngâiven lê hriet râwn tum taluo nâw. Tû lâiâ ṭawng ei hmang lâr lê ei practice mêk, ‘Social Distancing’ (mipui inhlat) ei hmang lâi zingin, ei lungril a hrisêl â, Pathien ei hnai nâwk zuol theina dingin, ‘Online/Media Distancing’ khawm hi practice tum ei tîu. Asap-in, ‘kei a tâ ding chun Pathien hnai hi a ṭhâ a nih’ a tî angin, Pathien hnai â, Amâ in-online-pui zing lem dingin ka fiel chêu a nih.
COVID-19 hi, mi tin, sûng tinin Pathien lê kâr lo inhlat ta hâi lê Îsû Khrîstâ tuok dingâ lâ’n zo hâi tâ dingin, Pathien hnai phâna lê Îsû Khrîstâ tuok dingâ inzona hmangruo’n inchang sien ka nuom tak zet a nih.
Hî hripuiâ inthawkin, Lal Îsû tâ dingin, ringum thar inlâ, amâ tâ dingin ṭangkaina thar nei inlâ. Amâ hmangai thar inlâ nuom a va um de.
Vawizȃn hin Pathien Thû, I Thessalonika 1:2-9 sûngâ mî ei ngâithlâk tlâng dingin ka hung inbuotsai â. Thessalonica Lêkhathawn hi, Tirko Paula-in Korinth khuoa inthawkin AD 49-50 lâi khan, Thessalonica ramâ ringtu hâi tâ dingâ a ziek a nih. Hieng hun lâi hin, Thessalonika ramâ ringtû hâi chu namên lovin sukdûdânâ leiin ṭitnain a tuom vêl â; tû tâ ei ngîrhmun ang chu a ni nâw el thei. Amîruokchu, an hneng dêna lê fienâ nasa tak an tuor leiin an ṭî a nih.
Chuong ang ngîrhmunâ an um lâi chun, Tirko Paula chun Korinth khuoa inthawk hieng ang hin a lêkhathawn a chun ziek â:
“Ei Pathien lê Pâ hmaa ringna leiâ in sin thâw zie dȃm, hmangaina leiâ in sin inrim zie dȃm, ei Lalpa Îsû Khrîstâ beisei leiâ in sel zie dȃm kha theinghil lovâ hre zingin” (V.3)
Tirko Paula chun, Thessalonica ramâ ringtû hâi nînâ pathum a hril â. Chuong hâi chu:
i) Ringna leiâ an sin thâw zie dâm,
ii) Hmangaina leiâ an sin inrim zie dâm,
iii) Beiseina leiâ an sel zie dâm hâi a nih.
Ieng leiâ Thessalonica ramâ ringtu hâi hin ringnâ, hmangainâ lê beiseinâ an nei am?
Thessalonica ramâ ringtû hâi hin an chêngnâ, khawsakna ramin a zir leiâ ringnâ, beiseina lê hmangainâ an nei an; naw â, khawvêl lê a sûngâ um po po neitû, siemtû; iengkim chungâ thu nei neitû, ro rêltû, thla muontû Îsû Khrîstâ a nih tî an ring lê an nei lei a nih.
- Chanchin Ṭhâ hi inkâi sâwng/inkâi dar thei a nih (Gospel is Contagious)
Chang 5-nâ, “Khȃngâ kan Chanchin Ṭhâ chu thû chauvâ tlung lovâ, thil thâw theina lê Thlarâu Thienghlim lê nasa takâ hriet chiengna leh a hung tlung lem kha, nangnî leiin in chunga ieng ang mî am kan lo ni ta kha in hriet si â”.
Paula chun, Thessalonica ram tâ dingin Chanchin Ṭhâ phur lût â. Chû Chanchin Ṭhâ chu, an kuoma, thû chauvâ tlung lovin, Thessalonica rama, chû Chanchin Ṭhâ a ringtû hâi kuoma chun, thil thâw theina lê Thlarâu Thienghlim sin thâw tlungâ, an testimony chun Tirko Paula, Timothe lê Silvan hâi chu hril nawn ngâi lovin ‘Khrîstâ Tirko’ an nih tî mi tin hriet an hung ni tah. Chu chu Chanchin Ṭhâ a nih.
Tû lâiâ COVID-19 hripui indar mêk hi chu â’n vawitû lê phur dartû nî ei inlâuvâ. COVID-19 hripui Chanchin Ṭha lo chun, mi tin, Rambung tin a fang suok â. Inkâi sâwng inlâuvin ei nuom le nuom lo hril lovin, ‘Lockdown’ hnuoia ei um mêk a nih.
Chanchin Ṭha nâw hi, mî’n an natpui â. Chû chanchin chu a ṭha nâw leiin, â’n dar awl bawk hlak.
COVID-19 chau hi inkâi sâwng/inkâi dar thei an’ naw â. Chanchin Ṭhâ khawm Inkâi sâwng/inkâi d ar thei a nih.
Chu chanchin ṭha inkâi dar awl chu ie’m a n’â?
John 3:16 “Pathien-in khawvêl a hmangai êm êm â. Chuleichun, a Nâupa neisun chu a pêk â, Amâ chu tû khawm a ring ta phawt chu an bohmang naw â, chatuonâ hringnâ a nei lemna dingin a nih”.
Khawvêlin hripui a mi pêk chu natnâ, inkâi sâwng awl tak, thîna chen intlun theitû a nih. Chu chu chanchin ṭha lo a nih. Vân thilpêk ruok chu, mi tin tâ dingâ Chanchin lâwmum bêk bêk taksaâ natna nei, damnâw hâi tâ ding chauvâ chanchin ṭhâ ni lo, thlarâu damna lê chatuon hringna chen intluntû Chanchin Ṭhâ a nih.
Mi tin tâ dingâ chatuon hringnâ mi hung pe dingin, vân hmunâ inthawkin khêk suok el lovin, nang lê kei ei damna dingin, a vân silfên/ropuinâ hlîp thlain, hringmî angin einî lâi a hung a nih.
Suol leiâ thi ta hâiin hringnâ ei neina dingin a hung â. Îsû Khrîstâ chu, nang lê kei a tâ dingin Khrâws-â hem dêin, ei thî âiin a thi â. Thînain a man sawng zo nawh, nang lê keiin thînâ ei hnê theina dingin thlânâ inthawkin a tho nâwk tah. Amâ chu mi suol hâi tâ dingin ‘Inthâwina Famkim’ a nih.
Chu thu chu ei tâ dingâ Chanchin Ṭhâ a nih. Îsû Khrîstâ Chanchin Ṭhâ chun, mi mal, sûngkuo, kohran lê khawtlângâ inkâi dar sien nuom a va um dê! Thessalonica ramâ Khrîstâ Chanchin Ṭhâ ȃ’n indar angin, Chanchin Ṭhâ chun tû tâ inthawkin mi kâi sap sien, inkâi dar pei ei tîu. Khrîstâ Chanchin Ṭhâ chu COVID-19 hrî nêkin a ṭha sie â.
COVID-19 chun natnâ, thînâ an tlun â, ṭitnâ an tlun, hringnun a sukbuoi â, Khrîstâ Chanchin Ṭhâ ruok chu thînaâ inthawk chatuon hringnâ mî’n tluntû, ṭitnaâ inthawkin thlamuongnâ mi petû a nih.
COVID-19 chun, hringmî hâi inhlat dingin a mi ti â. Ei mihriem chanpui hâi lê kâr neiin (feet 3/meter 1) bêkâ um dingin a mi ti â; Îsû Khrîstâ Chanchin Ṭhâ ruok chun, inhmâtâ hla takâ um hâi chu mî’n hnâitirin, ‘keimaa um ro, kei khawm nangnia um ka tih’ a mi tî a nih. Pathien chu ropui râw se!
Îsû Khrîstâ Chanchin Ṭhâ chun, indâi dangna po po chu ṭhiekin, Pâ kuom tieng mî’n hnaitirtû a nih.
- Chanchin Ṭha phurtû (carrier) i nih:
Tirko Paula chun, Thessalonica 1:8-â hieng ang hin a hril nâwk â, “Lalpâ thû chu nangniâ inthawkin â’n thang suok ta si â, Macedonia lê Achaia rama chau ni lovin, hmun tina khawm. Pathien tiengâ in ring zie chu â’n thang ta â…”
Ûnâu dit tak, tû tâ i umna hmuna khan Îsû Khrîstâ Chanchin Ṭhâ phurtû (carrier) i nih tî i inhriet am? I thil phur kha a hlut zie i hriet am? I thil phur kha thîna ding an’ naw â, ṭit ding khawm an’ nawh. Mi tin tâ dingâ damna lê thlamuongna ding a ni lem.
COVID-19 hrik phurtû lê pâitû chu mî’n an ṭî, a san chu, thî theina hrî an’ leiin. Nang ruok chu, Chanchin Ṭha phurtû i ni â, i thil phur ruok chu damnâ, mî’n chatuon damnâ an nei theina ding a ni lem. Nangâ um Chanchin Ṭhâ kha mi dang kâi sâwng inlâu dêr nâw rawh. Nangâ um Îsû Khrîstâ Chanchin Ṭhâ kha pe dawk rawh. Ṭî a um nawh. Ei natna ding an’ nawh. Mi tin damna dingâ Pathien thil thlâwn pêk a ni lem. Halleluiah!
- Chanchin Ṭhâ chu khawvêl pumpui huop a nih (Pandemic Gospel):
Thessalonica 1:8-a
“Lalpâ thû chu nangniâ inthawkin â’n thang suok ta si â, Macedonia lê Achaia rama chau ni lovin, hmun tina khawm. Pathien tiengâ in ring zie chu ȃ’n thang ta â…”
Wuhan, China rama COVID-19 hripui chu thâwk le khatin khawvêla â’n dar â. World Health Organization chun, COVID-19 chu, ‘Pandemic’-in (khawvêl huop hripui) a puong â. Chû hrî chun, tû hin khawvêl a rûn mêk a nih. A va râpthlâk de!
Thessalonica ramâ ringtû hâiin Îsû Khrîstâ an ringna chu, ‘hmun tina â’n thang suok ta â’. Pathien an ring zie chu an niâ châu tawp lovin, ‘Macadonia lê Achaia rama chau ni lovin, hmun tina khawm’ a kâi sap â, â’n dar lien pei a nih. Pathien ropui râw se!
Chuong chun, Thessalonica ramâ ringtû hâiin, Chanchin Ṭhâ an hriet lê dawng chu, mi dang a kâi dar pei â, hmun tin lê ram tina an kâi sap pei â. Hieng an tlukâ Chanchin Ṭhâ, ngâinuomum chu a um am a ni?
Mathâi 9:26-a, Îsû Khrîstâ’n nuhmeitê thi ta hnungâ a kei tho nâwk thû ei hmu â. “Chun chuong ram po pova chun chû chanchin chu â’n thang suok ta â”. Chanchin Ṭhâ chu ram po pova â’n thang suok â. A va ropui dê!
Chanchin Ṭha dang nâwk chu, Kapernaum khuoâ Îsû Khrîstâ-in thlarâu suol mî tû amani sûngâ lût chu a hnawt suok â. Chû chanchin chu, “Galilee ram vêl po pova, ram tina a chanchin â’n thang ta nghâl â” (Mk.1:28)
Chanchin Ṭha lâwmum bêk bêk, vân thil thlâwnpêk Îsû Khrîstâ hi i nei ta am? Mi tin tâ dingâ thilpêk hi i insûngin in chang seng ta am?
- Chanchin Ṭhâ chu ieng tiin am thâw tȃ’ng ei t’â?
Khawvêl chanchin chu a ṭha tâ’m, a ṭha nâw tâ’m, hriet hmasak nî ei inhâwk â. A hre hmasa hâiin thawn dar/puong dar hmasâ ei nuom hlak â. Ṭhenkhat chu an chanchin hriet lê thawn dar â’n dik nâw leiâ Police hâiin an man lê case an inawrtir khawm an um bawk.
Tû lâi tak lem chu, ei hriet leiâ ei hlâwkpui lê ei dampui duok ding um bêk lovin, COVID-19 chanchin in-update ei nuom â, â’n vawi thar khâw lâi hmunâ am? Tû hûi am? Ieng zât am an thi? tî hre nuomin online-in ei um deu vawng. Thu thar ei hriet hâi hin a mi sukdam ding ni sien chu thukhat a n’â.
Khawvêl chanchinin a mi sukdam thei naw â, a mi sukhlim bawk nawh. Îsû Khrîstâ chanchin ṭhâ chau hi mi sukdam thei lê chatuon hlimna mî’n neitirtû a nih.
Vawizân hin ka ngên nuom chê:
Îsû Khrîstâ Chanchin Ṭha sukdamtû nî’ng ei tîu.
Îsû Khrîsta-â inthawk, Hmangaina pe sâwngtû nî tum ei tîu, Îsû Khrîstaâ Beiseina Hring pe sâwngtû (hope dealer) nî’ng ei tîu.
Chanchin Ṭha phurtû ei nî leiin, ei umna hmun sengâ inthawkin mi dang hâi kuoma Ringnâ, Hmangainâ lê Beiseina thu intluntû ni lem ei tîu.
Ûnâu dit tak, virus-in a sukhlum thei lo Îsû Khrîstâ thisenâ intlan lê Îsû Khrîstaâ ringna nghet lê beiseina neitû hâi ei nih tî hi theinghil nâw’ng ei tîu.
Tû tâ ei umna dân hi einî ringtu hâi tâ dingin, “Wake Up Call” a nih. Chû leiin, ngîr nghet ei t’â, Îsû Khrîstaâ inpumkhatin, Îsû Khrîstâ Chanchin Ṭhâ ei hriet hâi hin ei hringun mi thlâk danglam pêk râw se.
Be First to Comment