Corona Virus hripui inlêng leiin, Biek in hâi khârin a um â. Chû leiin, ringtu tam tak chu, mânî inâ Pathien inpâk chu ‘mi ramâ Zion hla sak’ ang hielâ inngâi khawm ei um phâ bawk. A san ding âwmâ ka ngâi chu, ‘einî hi hûhovâ um khâwm ṭhang, a hûhovâ thil thâw hlak, a hûhovâ Pathien châwimâwi ṭhang, a hûhovâ piengthar lê thlarâu chang ṭhang’ ei nî leiin a nih.
Johan 4:21 ei tiem chun, Îsû Khrîstâ’n Pathien biekna hmun, ei tâ dingâ hla takâ um (Jerusalem temple) chu, Thuthlung Thara a nuom taphawt tâ dingin a hung sawn hnai â, ringtû hâi lem chu, Pathien Temple ei hung ni tah (I Kor. 3:16-17). Khrâws-â Îsû Khrîstâ a thîna khan, Jerusalem Temple-â puonzâr (indaidana) chu a sîpâ inthawkâ, a mawng chenin â’n thlêr (a inthlêr) suok â. Pathien chêngna hmun thienghlim tak chu, mitin tâ dingin hawngin a um tah. Jerusalem Temple-a chau ni lovin, khâw lâi hmuna khawm, Pathien be thei dingâ ei um hi a ropuiin lâwm a va um de!
Corona Virus hripui leiin ei Biek in hâi khâr ni sien khawm, Pathien Temple i nînâ kha hre zingin, i hringnuna, Pathien Biekna mâichâm mei kha sukchawk zing rawh. Chun, nangmaâ Pathien ṭitnâ, hmangainâ, châwimâwinâ, inpâkna lê a tâ dingâ i thilpêk rawng bâwlna kha sunzawm zing rawh. Biek in (building) khâr ni sien khawm, Pathien temple, nang ruok chu ieng tik lâi khawm, Pathien Thlarâu Thienghlim pâwl tlâk lê chêngna hmun dingin hawng zing lem rawh.
Daniel, Babylon salâ intâng, a sal tângna hmunah, Temple um nâw sien khawm, Pathien lê an inbiekna mâichâm mei chu a thi chuong nawh. Pathien lê inpâwlna hun nî tin vawi thum a hmang thei zing tho (Dan. 6:10). Mî rama um sien khawm, amaâ Temple chu khârin a um vê nawh.
Ûnâu dit tak, Corona virus hrik ṭit lei ringawtin in-lockdown nâw lâ, Pathien leh tî tak zetin fienriel hun ṭhâ lê sûngkaw mâichâm khawm nei zawm pei lem rawh. Thuthlung Hlui lê Thuthlung Thar tieng khawm ni sien, Bible ngun takâ ei tiem chun, Pathien-in mi mal kuoma, a bîk takâ thu hril ding a nei phât, mipui/vântlâng lâia ni lovin, fienriel hmuna a biek hlak. Ṭhuoitu Mosie â’n biekpui (a inbiekpui) dingin, Sinai tlângah, a fâlin â’n biekpui â, a puon ina dâm a tumin a biek hlak. Zâwlnei dang hâi khawm, chuong ang bawkin a malin a biek hlak. Hmangai Johan khawm hmun pilril lê fienriel Patmos thlierkarah â’n biekpui a nih. Lal Îsû Khrîstâ khawm kha, Pathien leh an inbiek ding chun hmun fienriel a pan hlak a ni kha.
Lalpâ râwl i hriet theina dingin, fienriel hun ṭhâ hmang lâ, Amâ pâwl rawp rawh.
Hla siemtu chun, “Ka lungril suol inthim hnung kha, I Temple-a inchangtir lâ; A sûnga hin, âw ka Lalpâ! Chatuonin hung chêng zing rawh” a lo ti â.
Ûnâu dit tak, vawisûn hin, ‘tû khawm khâr thei lo kawtkhâr hawng sâ i hmaah kâ’n umtir (ka inumtir) titû Pathien chun i Temple a khâr nawh.
Be First to Comment