“…chuongchun theichang hnâ an ṭhui mat â, silfên an siem fâwm ta â” (Gen. 3:7)
Bible-â incheina silfên ei hmûna hmasa tak chu, Eden huon a nih. Adam lê Evi suolâ an tlûk char â an ngâi pawimâw hmasa tak chu, Pathien lakâ thî lê bohmang an nîna nêkin, an saruok zâmâw inkhûm bo kha ni lem sien a hawi â. A san chu, bâwsietna suolâ an tlûk lê inruolin, saruok an nih tî h an inhriet â, an saruok inkhumna dingin, theichang hnâ ṭhui mat silfên siem fâwm an siem tlat leiin a nih (Gen. 3:7). Adam lê Evi chun, theichang hna silfên siem fâwm hmangin inbel zing hâi sien khawm, Pathien hmaa, mâwi lê pawm thei ding tâwkâ inbel an nî nâw leiin, Siemtû hmaa chun saruok an la ni zing tho â. Chû leiin, bâwsietna suol leiâ mihriem muolphonâ, thînâ lê bohmangna râpthlâk tak a nîna hi, silfên siem fâwm hmangâ intuom mâwi el chî a ni nawh.
Bâwsietna suolin silfên siem fâwm a mi ṭhuipêk hieng – mihriemin ei ngâi pawimâw chin chu, pâwnlâng tak, ‘suol’ (Pathien lakâ thî, bohmang) khawm ni phâk chie lo, suolin a râ suok hâi ngâi pawimâw lemna dâm, fel lê tling intî rûk tlatna dâm, mâwi sî lo, mâwi lê inhmê intî tlatna dâm, chapo sî, tlâwm takâ um tumna dâm, mitâ hmû thei chinah, thienghlim angâ inlang sûngril thienghlim sî lo, puo tieng fel angâ inlang a takâ bêl chieng dâwl si lo, thâw tam nuom sî, thâw pei bawk lo, piengthar sî lo, piengtharâ inngâi tlatna dâm, Pathien kona dawng sî lo, fâk hmûna ding a nî leiâ rawng bâwltû dingâ inpe hâi chu an nih. Bâwsetû mihriem chun, ieng angâ mâwiin, silfên siem fâwm hmangin inchei sien khawm, chuong hâi chu, a tâ dingin tâwp chin lê hnawksak hun a nei hlak â. Mihriem mit hmuâ mâwi lê ṭhain inlang sien khawm, iengkim hmu fietû hmaa a mâwiin, a ṭha chuong nawh. Lem chang, mânî pei chen ram silfên siem fâwm hmangâ inbel a ni tlat leiin.
Silfên siem fâwm hmangâ puo tieng inlang dân a mâwi lê thienghlim tum, sûng tiengâ mâwi lê thienghlim sî lo hâi chu, Îsû’n “Thlân nâl var, puo tiengâ mâwi takâ inlang, a sûng tieng ruok chu, mî thi rû hâi lê hmunhnawk tinrêngâ sip hâi ang chu in ni insawnnâw” (Matt. 23:27) tiâ na takâ a tî hâi ang chu an nih. Eden nun lem changna ram, mânî nîna suol inthup, mânî nîna ni lo anga inlang tumna silfên siem fâwm incheinâ hmangâ inthuom mâwi tum hâi chu, Pathien hmaa an mâwiin, an thienghlim chuong sî nawh. Hieng silfên hâi hi, mihriem-in amâ saruoknâ thupna dingâ ṭhui fâwm a nî leiin, a ṭhui â’n fûk (a infûk) thei naw â, hâk mâwi lê inhmêpui khawm intak a ti hlak. Chun, Pathien hmaâ hâk lê ngîrpui tlâk khawm a ni bawk nawh.
Adam lê Evi silfên siem fâwm theichang hnâ ṭhui khawm phêna Pathien hmaa an inbîk rûk ang khan, tû lâi hin Pathien-â hringna tak tak nei sî lo mi ṭhenkhat hâi chun, kohran hi inbîkna hmun dingin an hmang mêk a nih. Mihriem mitmei vêngin, a hmingin thâwlâwm pein, siet ṭhat an tuok hunâ ṭâwiâwmtû an neina dingin, kohran census-ah an hming an ziek lût bawk. Camp lê crusade program-a hâi ṭhangin, piengthar silfên siem fâwmâ inthuomin, lam zâwlah a phungsawr takâ um khawm an um tâwl. A ṭûl huna chun, amâ hring hrietnâ hmangin, Pathien thû khawm a hril thei tho. Puo tienga inlang dân chun Farisâi angin, kohran tâ dingâ ṭhahnem ngâi tak, a taima tak lê felfâi tak khawm an ni hlak. A hriet hran khawm an intak hlak. Chuong mî hâi chu, silfên siem fâwmâ inthuom an nî leiin, an sûngrila, thla muongna lê lungâwina tak tak an nei naw â, a mâwi tâwk, ringtu nînâ hming hâwtû chau an ni lem.
Silfên siem fâwm chun, mihriem nun a sukbuoiin hâk â’n tak (a intak) â. Chû leiin, savun zakuo siempêk a ni â (Gen. 3:21). Silfên siem fâwm lê savun zakuo chu a kumhlun nâwin, mihriem chun an mâwipuiin, an ṭhatpui chuong nawh. Mânî felnaâ mâwi lê dam thei ta lo hâi chu, Pathien-in a Nâupâ Îsû Khrîstâ ei nîna po po mi tuom mâwitû dingin a mi pêk â. Îsû Khrîstâ chu, ei felnâ, thienghlimnâ lê mâwinâ a hung ni tah. Îsû Khrîstâ chu, ei thlarâu sandamtû lê vânram ei kâina ding lampui chau ni lovin, dam lâi khawvêla ngêi khawm ei hringnun pumpui mi sukmâwitû khawm a nih.
Be First to Comment