Mosie ‘Ṭawngṭâi Hlâ’ Sâm 90-naa chun, “khawvêla ei khuol zin hun sûng ding chu ‘kum 70 a ni â, hrâtna leiin kum 80 khawm a ni thei” tî ei hmu â. Khawvêl ei suoksan hunâ ei umna ding Vân ram amani Mei dîl ruok chu, a sâwt dân ding chu chatuon nî’ng a tih. Chatuon hmun pahni, Vân Ram amani Mei Dîl pakhat lem lem chu ei la hmasuon ngêi ding tî chu a chieng sâ a nih. Chû hmun pahnî hâi chu, ringtû lê ring nâwtû hâi ei tâwpna hmun ding a ni naw â, chatuon hun ei hmang ṭanna hmun ding chau a ni lem. Chatuon hmun pahni inkâra hmun dang a um bawk nawh. Khawvêlâ i inzin sûng ngêiin chatuonâ i umna hmun ding chu i thlang fel a ṭûl â, tûtâ thu tlûknâ i siem dungzuiin i chatuon hmun ding chu innghat a tih.
Îsû Khrîstâ chun Mei Dîl râpthlâk zie chieng takin a hmangai mihriemin Pathien hremnâ ei pumpel theina dingin, Mei Dîl râpthlâk ziet uor takin ṭum 14 lâi a mi hril thû ei hmu â. Mei Dîl ei hriet chieng theina dingin mî thi khuo thlarâu khawvêl Bible-in a hril hâi tâwitêin la hei thlîr thuok ei tih.
Hebrâi ṭawngâ ‘Sheol’ (mi thi khuo), Greek ṭawngâ ‘Hades’ tî chu, mî thi thlarâuin, a chatuon hmun ding a tlung hmaâ a lo um lâwkna hmun a nih. Lukâ 16:18-31 ziek ei tiem chun, mî thi khuo hi hmun pahni a um tî ei hriet â. A pakhatnâ chu ring nâwtû hâiin khawvêl tâwpâ Pathien ro rêlna nuhnung tak (Lal Ṭhungphâ Var Ro rêlnâ) an lo nghâkna hmun a ni â, hrem lâwkna hmun (Hremhmun) tî khawm a nih. Mi hausa pâ khawm kha hî hmunâ um a nih (Lk.16:23). A pahnîna chu Persia ṭawngin, ‘Pâradîs’ (Greek ṭawngâ Paradeisos) a ni â. A umzie chu ‘Huon/Hmun inhawi’ (Lk.23:43), annâwleh, ‘Abraham ângsûng’ (Lk.16:22) tî khawm a nih. Pâradîs tî hi Thuthlung Tharah vawi thum ei hmu (Lk. 23:43; 2 Kor. 12:4; Thup. 2:7). Pâradîs-a hin mi thienghlim lo in ta hâiin, Îsû Khrîstâ a hung nâwk ding (rapture) an lo nghâkna hmun a nih. Lazar khawm kha hî hmuna hin a um (Lk.16:23).
Thupuongsuo 20:5-â ei hmû angin, “mi thi dang hâi chu kum sâng khat a invawi hmâ khat chu an la hring hrî nawh” tî ei hmu â. Chuleiin, Bible-in ro rêlna nuhnung tak (Lal Ṭhungpha Var Ro rêlna) a tî chu kum 1000 ro rêl zo a nî ring a um. Hî ro rêlna hi mi suol Khrîstâ ring nuom lo, sandamna chang lovâ thî lê Tribulation hunâ dam suok hâi chungâ ro rêlna ding chu a nih (Thup. 20:12). Hringna Lêkhabuâ hming chuong lo hâi chu, Hremhmun an tuorna nêkâ râpthlâk lemin Mei Dîla chatuonâ dingin hrem nî’ng an tih (Thup. 20:14 -15). Thî hnînâ chu kum khuoâ an chanvo ding chu ni tâ’ng a tih (Matt. 25:30). Chû hmun chu mihriem tâ dingâ tuorna lê ṭit umna râpthlâk chitin rêng, infâwk khâwmna hmun ni bawk a tih.
Mei dîla chun hmangainain hmun a chang ta nâw ding a nî leiin, intheidâna hmun hung ni tâ’ng a tih. Natna hrî po po luong khâwmna hmun ding a nî leiin, natna lê tuorna chu chatuonâ an rochan ding nî’ng a ti â, natna leiâ an inthuok rî lê khêk rî chu mei dîl chawkrawl lê thlipui siemtû ni lem tâ’ng a tih. An um dân hmasâ nêkin, a nuhnung lem pei an tâ dingin rinum lem a ti â, um ngâinâ hre lovin thî nuomin, thînâ zawng an tih. Amîruokchu, chatuonin rinum takin nâ tuorin, intâl buoi lem an tih. Mi suol hremna hmun ding a nî leiin, hrem rinum umzie hre chieng hlê’ng an ti â, amîruokchu insîrin umzie nei ta nâw ni.
John Bunyan lêkhabu ziek, ‘The Pilgrim’s Progress’ ei tiem chun, Khrîstien kha boralna khuoâ um a ni ti a inhriet suok hmâ khan chu, ngâi ṭhat lê lung muong takin a um â. A umna khuo meipuiin a suksiet ding thû a hriet chun, tlân suokna lê pumpelna ding a zawng ta â. Boral khuo suoksanin vân lampui a hrâw ṭan thû ei hmû angin, tûtâ i umna hmun kha himin i hriet a ni ngawt nâw chun, a inhnu se hmâin suoksan rawh.
Mei Dîla chun piengthar lê Îsû ringin umzie nei ta nâw ni â, sandamna CAMPAIGN um ta bawk nâw ni. “Ûnâu ngâituo chieng rawh i hringnun liem hmâ hin; I piengthar lê thar nâw, Pielrâl kawt suoâ chun zâwna um ta nâw ni”.
Hla phuoktû chun, “A hi dam lâi thil ngâituo ding pawimâw lê ṭûl a nih” a lo tî angin, tû hi hun lâwmum, sandamna nî Lalpâ zângâina hun chu a nih. I piengpui felna lê ṭhatnain dawn tlei pal a ti chê, inlâu a um a nih. Khrîstâ leiâ felna tak lê Khrîstâ ṭhatnâ hmangâ sukdanglam i ni nâw chun, hî hun râpthlâk tak ei hmasuon mêk hi ni khat chu, a takin a la hung tlung ngei âwm si â. Khawvêlin a la hmû ngâi lo hun râpthlâk tak la hung tlung ding hin, i him chie ding am mâw? Îsû Khrîstâ hung sien lâ i him chie ding mâw? I nuhmei, i pasal, i nâu hâi an him chie ding mâw?
Vân kâina ding hringnâ nanga a um tak tak am? A hî, damlâi thil ngâituo ding, pawimâw lê ṭûl a nih.
Be First to Comment