(II Kor.12:9)
Paula nuna hin Pathien thil thâw theina sin thâw puong suokna tam tak hmû ding a um â (2 Kor.12:2-4, Thil.14:8-11; 19-20). Chuong lâi zingin harsatnâ chi hran hran tam tak a pal tlang bawk (2 Kor.11:24-26). Paula hin Khrîstâ a ringna leiin harsatna tam tak a tuok lâi zingin Pathien a chunga a ṭhatna thû chu hieng ang hin a hril: “thînâ dâm, hringna dâm, vântirko dâm, inlalna dâm, thil thâw theina dâm… khawmin, ei Lalpa Îsû Khrîstaâ um Pathien hmangainaâ inthawk chun mi ṭhê nâw ni” (Rom 8:38-39).
Paula hi lo pieng nâw sien, Thuthlung Tharâ Lêkhathawn tam lem hâi hi tiem ding ei nei kher dî’m mâw? Pathien hmangruo ropui tak a nî lâi zingin, ei theinghil lo ding thil pakhat Paulâ’n a kawl zing a um â, chu chu a taksaâ hling a nih. Hî hling hi la suok dingin vawi thum Pathien kuoma a hni â (2 Kor.12:8), anâchu Pathien-in a remti naw â, “ka lunginsietnâ i tâ dingin a hun tâwk, ka thil thâw theina hi hrât nâwnaâ i sâwn nâw sukfamkimâ a um”, tiin Pathien-in a dawn lêt lem a nih (2 Kor.12:9).
Paula taksaâ hling, ieng tik lâi khawmâ amâ hringnun kap zingtû Pathien-in lâk bo rem a tî nâwna san chu Paulâ’n a thil tuok ropui tak tak, amâ hmangâ Pathien thu rûk puong suok zozâi hâi, thil mak tam tak a thâw hâi ngâituo a, lungâwi takâ a ṭhung el ding Pathien-in a rem ti naw â, hun liem taâ innghat a, lungâwi el dingin a phal naw â, nî tin Lal Îsû Khrîstâ hliekhûnâ ngâiâ um zing Pathien-in a dit â, a hringnuna Lal Îsû Krista thil thâw theina puong suokâ a um pei theina dingâ, harsatna hling hi â’n kawltir ni sien a hawi. Chuong ang bawkin einî khawm khawvêl inhawitirna lê thabona khurah ei um â, amâ ei theinghil ding Pathien-in a mi phal nâw leiin ei nun mi kaptû ding hling Pathien-in a mî’n pâitir châng a um hlak a nih. Harsatna hlingin a chîm buoi zing lê a kawltû hâi chun, ‘Pathien hmangaitû hâi…an ṭhatna dingin iengkim a thâw hlak a nih’ tî hre chiengtû an nî leiin, an niâ harsatna hling chu ‘LUNGINSIETNA HLING’ tiin an inbûk ta lem hlak a nih. Hi lei hi ni ngêi a tih, Rev. Lalnghaksang-in ‘Harsatna a dang a la um am? tî a zâihlâ chena a lo inzâwtna san chu!
Mi tinin harsatnâ kawng khat bêk ei nei seng â. Chuong harsatna hâi chu a ṭhen hun sâwtnâwteaâ ding lê ṭhenkhat chu, dam sûngâ ei kawl ding khawm a ni thei. Ei harsatna lê phur rik hâi ruok chu an’ ang vawng kher nawh. Harsatna thlipui (nûpa kâra dâm, nâu chunga dâm, fâk le dâwn zawngna kawnga dâm, rawng bâwlna kawnga dâm, hrisêlna dâm, hlâwsamna dâm, tlâk sietnaa dâm) in mî’n kiengsan el tum lovin ei hringnun (taksâ, lungril lê thlarâu) a hung sûnaa tak tak chu Pathien lakâ nuor el khawm a awl hlak. Hmâ tieng thil hung tlung ding lê Pathien-in ei chunga rem a ruot dân ei hriet nâw leiin lê ei hmu fie thei nâw leiin a hriet thiem harsâ ei ti zuol hlak bawk. Hriet thiem harsa ei ti hlak ei nia harsatna thlipui hâi hi Lal rem ruot a hung ngîr suok phâ ruok chu Pathien lunginsietna thil tha thlipuiâ inthawk Pathien lunginsietna thil thâw hung inlang ding chu Rev. Lalnghaksang bawkin Hla in a siem a “Aw harsatna Lal hmêl hmu na… Lung chim takin lo pawm ka chê…Duot takin lo enkawl lem ka ti chê” tiin.
Tiemtû dit tak, i chunga harsatna thlipui hung tlung lè tû tâ chên chil mêk tû hai chê kha nangmain phur tum ta nâw lâ, “Nangnî sin inrim lê phur rik phur po po hâi, ka kuoma hung ro, keiin châwlnâ pê’ng ka ti chêu” tiâ mi mal taka (personal invitation) fieltu chê Lal Îsû Khrîstâ kuomah i harsatna chu tlûk lûṭpui lem el rawh. che chu zânî, vawisûn lê kumkhuo khawmin a pângngâi zing â (Heb.13:8). Paula chunga lunginsietna hling sietû kha ei Pathien a la ni zing leiin, i chunga ieng ang harsatna thlipui hung hrâng sien khawm chiâi in, beidawng nâw lâ, a lunginsietna hling hi i mamâw po po phur rûkna hmangruo ding le thlarâu mal sâwmnâ i dawngna dingin a hun tâwk êm êm a nih. Nangmaâ inthawk inkieng el thei lo i hringnun sukbuoitû um leiin, hringnun thlipui i tuok taphawtâ inthawkin, Pathien thil tum lê rem ruot hre dingin inchûk lem rawh. I hrât nâw zie hrein Pathien hrâtna ringsan lâ, ṭawngtâiin Pathien pâwl lâ, Lunginsietna Hling nangmaâ um chu pâr mâwi tak angin inpâr suoktir lem rawh. Âmên!
Be First to Comment