Palm Sunday thuchâ
Paula lê Sila, Philipi lung inâ an intâng khan, rip sûngrilâ inthawkin kawl bun pumin Lalpâ an inpâk â, mi intâng vê lê lung in vêngtû hâi chenin an lungrilin an lo zâwm vê a ni kha. Einî hâi khawm mânî in lum sengâ inthawkin Lalpâ Pathien hi inpâk ei tîu. Paula hâi ruolchamin Lalpâ an inpâk lê ṭawngṭâina kha lung inâ um hâi lê tâng inâ vêngtû chen tâ dingâ mit lê na suktlaitû a nî ang khan, Khrîstâ leiâ ei lâwmna lê Amâ ei inpâkna hi a lo ngâithla lê hre hâi tâ dingin mal sâwmnâ ni râw se.
Einiâ Khrîstâ châwimâwinâ a um theina dingâ pawimâw pathum chau hei suklang ei tih:-
1. Thu âwinâ:
Sabengtung kei dingâ mi pahni tir hâi lê sabengtung thu âwina lei khan Îsû châwimâwiin a um a nih. Îsû tir hâi hlak khan Îsû hril ang takin an fêin an hril â, sabengtung hlak kha mi khuolin awlsam takin an va kei el thei bawk. Îsû a chungah a chuongâ an tîna tieng tieng a fê pei el a nih. Mipui khâng zozâi khêk khawm khan hel zâi hrim a rêl nawh, a tâwp a tlungpui zak a nih. Ieng chen am Khrîstâ thû hi hmû thei lê hmâ thei loâ ei âwiin ei zâwm ding âw? Îsû tirna lê a hril angâ ei zawm peinaâ inthawkin Îsû châwimâwiin um a ti â, Pathien rem ruotnâ khawm sukhlâwtlingin a um hlak a nih.
2. Thienghlimnâ:
Îsû’n a chuongna dingâ a thlang kha, tû la chuong ngâi lona sabengtung a ni kha, a dittui hlê. Thienghlimna lê indiknâ nunâ inthawkin Îsû châwimâwiin a um hlak. Ei um dân mâwi lê inzâumnaâ inthawkin khawvêl lal lê hotû hâi khawmâ ei niâ um, Îsû hi an hmu thei a nih. Josefa lê Zâwlnei Daniel nunâ inthawkin ei hriet thei.
3. Inphalnâ:
Sabengtung neitû hâiin Îsû tâ dingâ inronâ nei dêr lovâ phal takâ an thil nei an pêkna lei khan Pathien rem ruotnâ sukpuitlingin a um â, Îsû châwimâwiin a um thei a nih. Phal takâ Îsû tâ dingâ i thil nei i pêk khan Îsû châwimâwiin a um vê hlak a nih. Vawisûn hin Lalpâ’n a dit ei pêk leiin Îsû châwimâwiin a um a ni tî hre nawn ei tîu. Chuong angâ thâwtû hâi tâ dingin Amâ khawmâ a thil nei â’n ro bîk nâw a nih.
A faknain kil tin thang khâwk râw se.
Be First to Comment