Tû lâiâ kâ’n vawi lê ka lungril hluo siptû chu, ei ram lê kohranâ mânî hmasielnâ lê chapona hluor taluot ta hi a nih. Pathien biek ina hlak inkhâwm thei ta lo. September beiruola bêk hin thupuia nei inlâ ka ti leh a lo inhnu ta bawk sî, ieng lâw ta dî’m a ni mâw? Îsû hlak thienghlimna leh a hung ding a ni si â, hieng angâ a mi hung hmû ding chu ieng am ei chang ding mâw? Sandam ei ni khawmâ meiâ fê thleng ang chau ei nî hmêl. Ei ram lê khawtlânga, mânî hmasielnâ lê dûâmnâ ka hmû dân chu hei hril ka tih.
1. Khawtlânga.
Khawtlâng tiengâ ei khawsak dân ka enin mânî hmasielnain ei sip zo tain ka hmu â. Pathien lung ei sukâwi ta nâw niin ka hmû a nih. Khawtlâng tâ dingâ hung ta phawt mânî tâ dingâ lo pumbil nuom seng ei ni tah. Khawtlâng tâ dingâ sawrkâr thil pêk suok hlak, a duk a dakin hung thei ta lo, beidawng chu a um ie! Ieng bêk hlak thâw thei ta lo ei ni si â. A zângâi thei thei a dâwng chu an ni pei ding a ni ta hi. Mâni hmasielna leiin khawtlâng ṭhuoitû lê pâwl ṭhuoitû khawm inthlang dukdak thei ta lo ei ni â. A hmâ angin lungril inhmu takâ thil thâw thei hlak ni ta lo, ka nei phawt chun kan pansak-pâ phîng ṭâmin um sien khawm, pawi tînâ nei ta lo ei ni â, Îsû dit dân chu a va ni ta nâw de mâw! Pathien-in ieng tiin am mi ngâi a ti âw? Bible-in ûnâu inhmangai ding a tî hi chu ei hlat ta ie.
2. Kohrana.
Kohrana khawm hin, mânî hmasielnâ hin ram a lâk nasa ta ngêi ie. Ei hamṭhatna ding a ni phawt chun, Pathien mitmei khawm ei vêng pei ta nâw a nih. A hmaâ a hrilâ hril khawm ei ngam ngâi lo, kohrana lem chu um thei dingâ ei ring lo kha langchang takin ei thâw nuom el ta hi mak chu a mak ngêi. Mânî ei inthiem fâwm pei nî’ng a t’â, a lampui indik loâ sum lâk lût khawm intîmnâ ei nei ta nawh. Bible hlakin kut tling loâ sum lâk lût a remti dêr sî naw â. Ieng tiin am Pathien-in a mi ngâi ding mâw? Har tharnâ (revival) hung tlung sien, mânî hmasielnâ po po hi bo vawng sien nuom a um khawp el a nih. A kotû chêu â’n thieng angin, in um dâna lo inthieng ta ro a tî zing lâiin, ei inhnawk tâk ziet hi hrilin a siek nâw a nih, a pawi ngawt el. Ieng tiin am kohran tâ ding hin thâw hlâwk ka ti â, tî lungril nêkin, kohran sum fâk thei dân ngawt ngâituo ei pung deu deu bawk, a buoithlâk ngawt el.
Dûâmna chu milim bieknâ: Bible chun, “dûâmnâ hi milem bieknâ a ni si â” (Kol. 3:5) a ti â. Khrîstien hâi lâi hin milim bie ei tam âwm ngêi. Dûâm takâ mânî chan ding bâk bâk lo fa hâi ku hi milem bie lê inang an nih tînâ a ni â. Kohran lâi khawm hin milem bie tam ngawt ei tih ka ring. Dûâmna leiâ mi chan ding intîmnâ nei dêr lovâ lo lâk dâm, sin thâw sî lovâ tam tak tak lâk nuomna dâm, mânî ûnâu lê khawtlâng tâ dingâ sawrkâr-in a hung pêk mânî tâ dingâ lo lâ hai hi milem biek lê thuhmun charin Pathien hin a mi ngâi a nih tî inhre inlâ chu ei thâw ngam dâ el dî’m mâw? Hieng ang mî hâi hin pulpit kâi khawm an rin sî nawh, inthlang tâwm phât, ram lê hnam hmangai an inti nâwk hlak sî, Pathien luok ei suksuok hlak ka ring.
Chung tiengâ varna chu: Jakob zieka chun, “îtthîkna lê mânî hmasielnâ, varna hâi hi chung tiengâ inthawkâ hung ni loin, khawvêl lê taksa châknâ le khawhrîâ inthawkâ hung a ni â, chuong ang varna umna taphawta chun, buoina lê suolna tinrêng a um hlak” a ti â. Amîruokchu, “chung tiengâ inthawk varna hung chu a tîrin â’n thieng â, inrem a nuom, a nun â’n nêm â, biek â’n hawi â, lunginsietna lê râ ṭhain a sip â, thlier bîk a nei naw â, a vervêk nâw a nih” a ti â, varna seng seng an inang nâw hlê. Mânî hmasiel ro rêlna chun thlier bîk a nei â, a thû â’n lâi naw â, buoinâ a râ suok â, chung tiengâ varna hung ruok chu â’n thiengâ, inrem a nuom bawk leiin râ ṭhâ â’n suo a nih. Kohran, khawtlâng lê pâwl thil thâwna hrim hrima, mânî hmasielnâ â’n rawl phât phât, inremna lê inthuruolnâ a um thei ngâi nawh. Pathien dit nâw zâwng a nî leiin, mânî hmasielâ sip lungril chun, Pathien lâwm hlâw ngâi naw ni â, hlim ngâi bawk nâw ni. Chû leiin, ei ram lê hnam hma sâwnna dingin mâni hmasielnâ hi hnawt hmang ei tîu â, chung tiengâ inthawk varnain insung sip seng ei tîu. Chuongchun ei chunga, Lalpâ a lâwm ding annâwm.
Ngênnâ:
Âw le! Ka lungrilâ sip ka hung suklang a ni â. Pathien thû khawm a ni bawk â, Îsû hung nâwknâ a hnâi ta bawk leiin, hlim takâ Lalpâ Îsû thienghlimna lê ei intuokpui theina dingin, thil ṭhâ ei hril hâi hi zâwm dingin ka ngên chêu a nih, Âmên.
Be First to Comment