May 10 Mother’s Day lo urlâwknain, hî thu tâwitê ka hung ziek a nih; Nû hâi, Pâ hâi lê Nâu hâi ei loin warm up-na dingin.
Kan sûngkuoâ hming lam inhawi lê lam râwn pâwl tak lâiâ pakhat chu, ‘NÛ’ tî hi a nih. Kan insûnga, Nû kan nei leiin, Nû tî chu kan insûnga a thunawn tî thei khawp elin, â’n ri (a inri) nawn deu zing a nih. Ka Nû hringnun chu kan insûnga thil po po le inzawm tlat a niâ kan hriet leiin, kan sûngkuo hlimnâ, lâwmna lê hlim nâwna hâi khawm, ka Nû chunga â’n nghat nasa hlê. Chû khêla, ka Pâ lê kan ûrêng bâuvâ Nû tî hi, Pathien hming tlukâ hlû a nih. Kan damnâw châng lê lungngâi nia hâi lem chu, ‘Nû’ tî hi, kan inthlamuonnâ angâ ngâi thei hiel khawpin ka Nû hming hi kan sâm hlak. Hi lei hin, kan insûng hi, ka Nû-in a hluo lum â, a vawng hlim â, a sukinhawi a nih. Bishop Thompson-in, “Nû tî thumala hin, lungrilâ hlimna êng iemani zât zet â’n phûm a nih”, a lo tî hi, kan insûngâ ding a lo nih tî ka hung hriet chieng pei bawk.
Ka Nû chun kan insûng chu a hluo lum â. Ka Nû ṭhang lo chun kan insûng hi a lum zo naw â. Ka Pâ lê ka ûnâu hâi khawlâi an lêng â, kan insûng an hung lût â, indawnnâ an siem hmasa tak chu, ‘Khâw lâ’m (lâi am) nû nû teh?’ tî hi a nih. Hieng huna hin ka Nû chu, insûngâ hmû ding a lo um nâw chun ka û hâi thlâ â’n vâi â, ka Pâ khawm ka Nû in hung inlâwi ding chu, Îsû Khrîstâ hung nâwk ding thlîr takin nghâkhlâ takin a thlîr hlak. Ka Nû chu kan insûng tâ dingin mamâw indawnnâ a ni hrim a nih. Amâ chu kan insûngâ dingin, ‘Missionary ropui tak lê Zirtirtû ropui tak’ khawm a ni bawk. Ka Pâ khuol inzin lê hung tlung huna dâm, kan sikul fê ding lê inlâwi hun hâiâ fâk ding ṭhâ ami pêk hmâin, Pathien hmaa mâichâm a mi siempui hmasa phawt hlak. Sâp hâiin an lo tî ang hrimin, ka Nû chu thiemna tienga chun fâk rawng bâwl siem thiem, ram chanchin (geography) hrietna tiengâ dingin kan insûng pindan po po hre chiengtû a nih.
Ka Nû chun khawvêl sikula chau kâi dingin a mi ditsak naw â. Amâ sikula ngêia chun Pathien chibai bûk dân, Sunday School kâi dân, Bible tiem dân, Pathien tâ dingâ thilpêk pêk hlut ziet, ṭawngṭâi dân, Pathien mî hâi hlûtsak dân, kohran kalchâwi dân lê ringtu kalchâwi dân hâi a mî’n chûktir (mi inchûktir) â; hî bâka hin, khawtlâng nun khawm a mî’n chûktir sâ bawk.
Khawvêl hringmî ka hung inchang hlimna inthawkin ka Nû malpui chunga sikul ka kâi ṭan â, chu takâ inthawkâ seilienin, khawvêla hin ka lo pieng vê a nih tî mi dangin an mi hriet hmâ daiin ka Nû hmangaina mita chun en nghawk um lo pârtê mâwi tak ang ka lo ni dêr tah. Kâ’n nui (ka innui) thei hun, invâk thei hun, ṭhung thei hun lê lâwm thei hun hâi hi khawvêl lêkhabû ropui lê ṭha tak tak hâia lo chuong nâw sien khawm, ka Nû lungrila, hmai lê inkhêl ruol lovin kim takâ inchik vawng a nih. Mi dangin ka damnaw tî khawm hre lovâ an nun an lo phâm lâi zingin, mi hmangaitû ka Nû chun, ‘Bâwitê, i tuor nêkin keiin hang tuor thei lang chu âw” tiin hmangai mithlî leh a mi ṭawng thlamuon hlak. Ka hlâwtlingnaa a mi lâwmpui â, ka hlâwsamin, kei nêkin a tuor â. Fâk le dâwn tienga, khawp lê tlaiâ ka um nâw inlâuvin, ka Nû chun ka khawpna ding a ni phawt chun nghei khawm a thlang lem. Mî hâi hmusitin, ka um huna ka thlavâng a hauvâ; ka thâw suol lê indik nâwna hâia, hmangai takin ka Nû chun a mi zil mawl mawl hlak. Râwl inringâ a mi biek châng khawmin, lungsen lê theidâ lei ni lovin, ami hmangaina râwl a ni lem a nih.
Kan ruol hâi dâm, kan inlêng hâi lê mikhuol kan nei chângin, ka Pâ le ka û hâiin kan lo lâwm lût hmâin, ka Nû chun hmêl hlim sieuvin a lo biek mawl mawl hlak â. Hi lei hin, ka ruol hâi chu kan inah an tlângnêl â, kan inâ hung lêng khawm inhawi an ti phâ hlak. Chun, kan mikhuol hâi duot takin a lo lâwm lût hlak leiin, mikhuol khawm kan nei ngun phâ a nih. Ka Nû chun, mikhuol nei hi mal sâwmna a nih tî lê mikhuol hâi chunga ṭhat insuo ding thû a mi hril rawp hlak.
Ka Nû, Pathien ṭî mî chun, ka Pâ lakâ intuk lût hlut ziet a hriet â. Ka Pâ nêkâ var lê lêkha thiem lem a nî ang bawkin, a varna chu ka Pâ thlazâr hnuoia hmang thiem â, mî hâi chun ka Pâ chu mi var angin an hmu phâ hlak.
Ka Nû chungchâng chu, Thuvar hâi bung 31-a hin, fel takin a lo inziek a nih tî ka hung hriet suok ta pei â. Nû, Pathien ṭî mî ka nei hi chu ka va lâwm dê!
Be First to Comment