Hebrâi tlangvâl Daniel chanchin hi, nâupang ka nî lâiin ka nûin a mi hril hlak â, a hril thiem lei am a ni chu ka hriet nawh, ngâinuomum ka ti thei leiin, ‘Nû, Hebrâi tlangvâl chanchin kha mi hril nâwk ta rawh’ tiin ka ngên inzawm rawp hlak. Ka nûin Hebrâi tlangvâl Daniel hi mi ringum, Pathien thu a ni phawt chun a ngîrnaâ ngîr tlat hlak a nî thû a mi hril hâi chu vawisûn chen hin ka lungrila a la châm zing â. MIHRIEM SUKLÂWM TUM NÂW tî thupuiâ hmangin, Daniel hringnunâ inthawkin Pathien thû hang inchûk nâwk ei tîu.
Tlangvâl, Pastor ordination chang thar hlawk chu an kohran-in, kohran member tam tak umnâ, mi thiem, mi var lê experience ṭha tak tak nei umna hmuna chun um dingin an tir â. Chû a va umna dinga chun, mi tam tak suklâwm an ṭûl ding an’ (a ni) leiin a huphur lê huphur nâw thû an indawn â. Pastor Junior chun, ‘Mi tam tak suklâwm dingâ fê ding ka ni naw â, mi pakhat chau suklâwm dingâ fê ding ka ni lem’, tiin a dawn â. Hî Pastor Junior hi inpâk a um hlêin ka hriet.
Daniel kha Pathien thû lê inmilâ mi ringum a nih. Daniel chun Pathien a ringnaa chun a ngîr tlat â. Chu hriet chiengnaâ inthawkin a ṭawngbâu suok, a chet zie lê nungchang hâia â’n langtir hlak. Inphattû ni lovin, ṭantû a nîna hi a ropui tak zet a nih. Harsatna lê mangangna hmunâ inthawkâ sansuok tû ding ringawtin Pathien a beisei naw â, a lâwmnâ, hlimna lê hming ṭhatna ding chauvin Pathien a bêl bawk nawh. Rinumna lê ṭitna hmuna pumpelna lampui dang zawng el lovin, Daniel angin Pathien thû a ni phawt chun meipui râpthlâk tak lê sakeibaknei pûk tuorna lê thîna hmun ding khawm ni sien, thlang ngamtû lê chû nun neitû nî chu tum tlat ei tîu.
Daniel hin mihriem lâwm zâwng a zawng nawh. Daniel 4:1-37 ei tiem chun, lal Nebuchadnezzar-in mang mak danglam tak a nei â. Daniel-in lal mang a hril fienaa a hin, lal lâwm zâwng amani, a theida zâwng, lal hmêl tlai lê mitmei vêng dêr lovin thu dik chu thu dik, Pathien dit zâwng chu a nîna ang takin a hril ngamna hi entawn tlâk a va ni de! Ringtu hâi hi a kârchâng chun, mi neitû lê mî’n tlântû (mi intlantû) Pathien dit dân zâwng lê ngâituo nêkin, ei mihriem chanpui hâi mitmei vêng lê suklâwm nâw inlâuna hi ei nei châng a bo nawh. Pathien thû hrilâ rawng bâwltu hâi khawm, Pathien dit zâwng nêkin ngâithlatû hâi inhnik zâwng zawng el lovin ei pulpit-a hâi hin, Bible-in a tî chu tlip mâwi lovin, Daniel angâ Pathien thû a nîna ang takâ hriltû ei pawimâw ta hlê a nih.
Daniel angin ei chunga, ieng ang hun harsa lê hun khir tak tlung ding ni sien khawm, Pathien-â inthawkâ ei nînâ (identity), innghatnâ (principle), thu tlûknâ ei lo siem ta (commitment) hâia hin, khawvêl danglam mêkin ei hringnun a sukdanglam nâwna dingin nghet takin ngîr tlat ei tîu.
Mi tam tak chun Pathien-â inthawkin mal sâwmna hi ei zawng hmasa hlak â. Pathien nêkin mânî ei inbuoipui hmasa rawp hlak leiin, Pathien-in mal a mi sâwm ding lê a mi hmang ding angin a mi hmang ngâi naw a nih. Mîin amâ hamțhatna ding, a sûng hâi hamțhatna ding lê a ngîrhmun ṭhatna ding ngâi pawimâw hmasa lovâ, Pathien dit zâwng zawngtû lê thâw hlaktû chu Pathien-in a theinghil ngâi naw â, Amaâ innghat tlattû a nî leiin, mal a sâwmin, a ṭhangpui hlak a nih. ‘Lalpâ, i thû ang peiin ka chunga tlung râw se’ ei ti ngam peinaâ inthawkin, Pathien sin thâw einia a tlung hlak a nih.
Be First to Comment