Ei ramâ, ‘Total Lockdown’ inṭan phut hlim lâi khan, ka ruolpâ’n, ‘Thu hriltû hril fie bû’ ditsak takâ a mi hung pêk chu dilsut takin ka tiem ṭan nghâl â. Ka tiem lâi chun, khuo pakhatâ tlangvâl pakhatin, ‘Pû, kei chu Pathien thû mi la hril nâw, khawvêl ka la chên ding a nih’ a tî thû a mî’n hriet suoktir â. Chû tlangvâl chu, sam hlâ sei narân, carrom board inpen bâk thiem nei lo, nî tînâ sûng hâi kuoma, ‘mi pe rawh’ tiâ hringnun hmang el hi a lo ni â. A ngîrhmun en chun a ieng khawvêl tak am chên a tum nî’ng a ti âw? Hî tlangvâl ang deu hin, tû lâi ṭhalâi tam tak nû le pâ thâw suok sâ ring pum zingin, Jon Bon Jovi hla tlar pakhat, ‘It’s my life’ (Ka hringnun a ni â, ka nuom dânin hmang ka t’â, i lo hril vê ding a um nawh) lo hei ti vê ringawt â, khawvêl chên tum hi mânî inhlêmnâ chi khat chu a ni ngêi el.
Lal Solomon khan, ‘khawvêl ka chên ding a nih’ ti sien chu, tû khawmin thiem nâw an inchangtir ka ring nawh. Solomon chanchin ei tiem chun, Pathien-in varna lê hrietnâ nasa tak tuipui pangâ ṭieu zât ang a pêk â (I Lal. 4:29). Thuvar 3, 000 lê Hlâ 1005 a phuok (I Lal. 4:32). Jerusalem-â Temple bâwlna dingâ hnam dang mî a sawr ringawt khawm, mî 1, 53, 600 an ni â, thil phurtû dingin mî 70, 000 lê lung sut mî 8, 000 lê sin thâw, enkawltû dingin mî 3, 600 a nei bawk (2 Chro. 2:17-18). I Lal hâi 4:22-28 sûng ei tiem chun, Solomon-in ni khat thil thuâ a fâk ral ringawt khawm, bâwngchal 30, berâm 100 lê sakhî, sangâi, âr hâi a ṭhat â inthawkin, a hâusak ziet ei hriet bawk. Rângkachak lê tangkaruo hâi chu lung ang elâ tamin a sie khâwl â, sakawr tawlâilîr 1, 400 lê sakawr chuong mî 12, 000 a nei bawk (2 Chro. 1:14-17). Nuhmei 700 lê thâikêm 300 (I Lal 11:3) a nei bâka, amâ sukhlimtû dingin rimâwi hmangruo chi tum tum khêla, pasal hla saktû lê nuhmei hla saktû tam tak a nei bawk (Thuh. 2:8).
Ei nî’n, ‘khawvêl ka chên ding a nih’ ei tî nêkin, Solomon hin ti lem sien thil âwm tak a nî lâi zingin, amâ chun khawvêl hausaknâ a thlîr â, a hringnun a en chun, ‘Thil po po hi teplo el a nih’ tî a hmu suok lem tlat. Einî lâiâ, ‘khawvêl ka chên ding a nih’ ti hâi lê tlâwmâ khawsakna tiengâ neinung lê hnieng inhnâr deu hâi hi, Solomon kha hung tho nâwkin, mi hung hmu sien, a nui khawm â’n za phâk ring a um nawh.
Solomon thlîrna tukverâ inthawkin hieng ang hin khawvêl hi chên tlâk a ni am tî zuk ngâituo’ng ei tih.
Hausakna hi chapopui lê suong ding a um nâw ziet, Solomon thlîrnaâ inthawkin hieng ang hin hang khai khâwm ei tih. Mi rethei nêkin mi hausa lungril a hlim chuong naw â, mi mâwl hâi nêkin, mi var hâi lungril a thlamuong chuong bawk nawh. Mi rethei ruohmangna lê mi hausa ruohmangna khawm thuhmun tho a nih. Mi retheiin mi hausâ an inhnar â, mi hausâin a nêkâ hausa lem an inhnar â, mihriem hi inhnar intuo el ei nih. Lungâwinâ lê hlimnâ zawngin ei philî lâi zingin, ei hringna chu kutphâ bawk ang chau a ni lem. Chû leiin, Pathien ṭhang lo chun khawvêl hringnun hi teplo hâi teplo a nî leiin, chên tham hlawl an’ nawh.
A hun lâiâ khawvêla khan, Solomon tlukâ hausa lê var an um ei hriet nawh. A varna lê hausakna khan lungâwinâ a pêk chuong bawk nawh. Mi var tak lê mi invêt tak hâi, mi hausa tak lê mi var tak hâi khawm angkhatâ inumitrtû chu thîna tho a nih. Hausaknâ, varnâ lê thiemna hâi khawm, Pathien ṭhang lo chun buoinâ, lungngâinâ lê beidawngna sukpungtû chau an ni lem (Thuh. 1:8). Pathien ṭhang lo chun khawvêl hringnun, mâwinâ, lungâwinâ, inhawinâ, hlimna lê ropuina hâi hi teplo hâi teplo lê a tâwpâ boralna chau a nî leiin, chên tham hlawl an’ nawh. Chû leiin, Pathien ṭi lâ, a thupêk hâi hi zâwm rawh tî hi hlimna lê lâwmna kumhlun ding a ni lem.
1 John2:15-17-naa chun, “Khawvêl hi hmangai nâw unlâ, khawvêlâ thil um hâi khawm hi thlâkhlâ nâw ro…Khawvêlâ thil um po po tîsa châkna dâm, mit châkna dâm, nun chapona dâm…Pathien-â suok an’ naw â, khawvêla suok a ni lem si â. Khawvêl hi a châkna pumin a bohmang zing a nih, nisienlâkhawm Pathien dit zâwng thâwtû ruok chu kumkhuoin hring zing a tih”.
Chên tlâk lo umsun chu, khawvêl hi a nih. Pathien mî hâi tâ ding chun, khawvêl hi hem dê tlâk a lo ni lem si â. Khawvêl â’n thawkâ lâk suok nî inhre hâi tâ ding chun, khawvêl khêl tieng ram an buoipui lemin, an khûkpui lem hlak a nih.
Vawisûn chen, khawvêl chênâ Pathien ngâisak nuom nâwtû chu, a boralna nî a la tlung ngêi ding a nih. Khawvêl chênâ inngâi hâi hi, khawvêl-in annî a chên lem a ni tî an inhriet suok huna chun, thil iengkim an tâ dingin â’n hnu ta âwm si â. Ûnâu dit tak, khawvêla i um zing a ni khawmin, thlân khêl tienga chatuon hmun pahni, vân ram lê mei dîl, a pakhat lem lem chu mâkmaw â i chan ding a ni tî ruok chu theinghil dêr nâw raw âw.
Be First to Comment