‘KHUO’ hmangna ding huna hin, ‘VÊNG’ ei hmang tut hlak hi, ei hmang suol let dêr a nih. Ei hmang suol khawm ei hriet chuong nawh. Inngup matin, ‘kan vêng, vêng hmêruo’ tî hâi ei lo hmang hlak.
Ei phâk tâwk tâwkin ṭawng ei inchûk tung pei â. Indikâ ei ingâi hâi khawm ei lo hmang indik nâw dân hâi ei hriet hnung chu ei bân hrâm hrâm hlak.
Khaw dangâ um ei ni chun, ‘kan khuo’ tî hi ei ṭawng indik lem chu a nih. ‘Kan vêng’ ei ti chun khâ, ei umna khaw sûng â, ‘vêng buk’ (colony) hâi kha, ‘vêng’ ei tî hlak tak chu a nih.
Vâirampûr tiengâ um ei ṭhahnem ta bawk, ‘vêng tieng ka suok ding’ ei ti chun ei ‘khuo’ tieng pan ding ei ni tî ei hril tumna deu chu a ni hlak. Ei hril suol lien bêk bêk rak nawh. Khaw sûngâ ‘vêng buk’ tieng ei pan ding thû ei hrilna ang khawmin ngâi thei chu a nih.
Amîruokchu, ‘kan/ei khuo tieng ka suok ding’ ti inlâ a thu fê dân le indik lem mei a tih.
“Khâw lâi ‘vêng’ suok am i nih?” ei ti ngâi nawh. “Khâw lâi ‘khaw’ suok am i nih?” ei ti hlak.
Ei hmang suol a ni tî ei hriet ta sî sî chun, sim vat tluk â ṭhâ a um hmêl nawh.
—– & —–
Be First to Comment