Tû tâ ṭum chu Pu R.L. Kamlala hla phuok, “Âw ropui tak Halleluiah” a châng lînaâ ‘Ran thlêng lê thing ṭawngsephur leh” tîâ inthawk hin Khrîsmâs sermon ‘Ran thlêng lê thing ṭawng se phur’ ti hmangin hang ngâituo tlâng nâwk ei tîu. Hî hlâ hi Nâupang Sunday School ka kâi lâiin (L) Rev. Dartinhmang-in, ‘Kalvari Hospital Crusade’ a neinaâ crusade hlapui ang hiel in kan sak insâwk zut hlak. ‘Âw ropui tak Hâleluia hi châng lî chau ni sien khawm, Genesis-â inthawk Thupuon chen mihriem sandamna dingâ Pathien chatuon rem ruot, Pathien thu inril lê inthûk lê Khrîstien theology po po thlung mat vawngtû a nih ti inlâ khawm ei hril suol ka ring nawh.
Ran Ina chun mihriem chêng ding ni inlâ, chêngna hmun tak tak dingin a chung, a bang lê ṭuong hei bî chieng lâ, ran zun le êk, thosî lê thotel an umna hmun a nî leiin chêngna tlâka i ruot ring a um nawh. Chuong ang khawpâ hmun pawrchê lê thienghlim lo, tirdakum lê rimsie chêngna tlâk lo hmuna chun hnuoi lê vân Lal tak, khawvêl suol intlantû ding chun a piengna hmun dingâ a hung thlang hin ie’m mi hril hriet nuom a nei nî’ng a t’â? Suol leiâ mihriem Pathien hmaâ mi pawrchê lê tirdakum lo ni ta hâi, Pathien thienghlimnâ ei chang theina dingin ran in lê ran thlêng a hung thlang a nih. Îsû Khrîstâ chu ei suol mî’n tlantû ding lê ran thisenâ inthâwina thienghlim lê dam zo ta lo hâi natna hmun mi hung hluo suoktû ding a la nî leiin ran in lê ran thlêng a hung bêl a nih. Chun, khawvêl suol intlântû ding chu nakie ran angâ a lâ’n tâl ding a nî leiin ran in lê ran thlêng hung bêl a nih. Hî thû hi (L) Rev. Zosanglien Joute-in hlâin hieng ang hin a lo siem â, “Kei chu a mâwi ka ti hun lâi tak chu, saruok ngawtâ siel angâ an sâwi vêl lâi; vuok thiduk lê dangchârin â’n rûm â, Hmangaitu um lo lâi” tîin. Chû leiin, tiemtu dit tak, Ran In lê ran thlêng chu riengvâi lê rethei, mi hnuoihnung, mi dit lo lê endawng, mi ngâithâ lê thienghil hâi khawsakna hmun ni sien khawm Vân Lalnâu-in nang lê keiin chatuonâ beiseina thar ei neinâ dingâ a mi hung zawng suokna hmun tlâwm tak chu a lo nih.
La hei bel sâ nâwk hrâm ei tih. Ran angâ that ding a la nî leiin a piengna hmun dingin ran In chu thlangin, mi tin tâ dingâ Hringna Bei a la hung ni ding an’ leiin a piengna hmun dingin Bei In (Bethlehem) kher chu a hung thlang a nih. Ran thlêng kher a zâlna hmasa tak hmun dingâ a hung thlang hin a tlâwm zie lê Amâ chibai bûktu hâi chu a hmaah an la kûn ngêi ding a nih tî inentirnâ a nih. Chû leiin Lal Îsû pieng nuomna hmun chu khawvêl lal In lê hmun changkâng an’ naw â; lungrilâ inngâi tlâwmin, “I thû ang peiin ka chunga tlung râw se” titû hâi kuoma Lal Îsû Khrîstâ hi a pieng nuom a nih.
Tiemtû dit tak, i lungril ran bu pêkna thlênga khan tû’m pieng dingin i dit â? Hmangaitû Lal Îsû piengna lê inlalna dingin i lungril kha î’n hlân ngam am? Tû hin i lungrila Lal Îsû Khrîstâ chu fiel rawh, amâ chu a kotû lê zawngtu hâi hnâwl ngâi lo a nih. Chuong chun i kuoma hung lût a t’â, amâ chun i suolna po po hung sukthienghlimin, Lal Îsû Khrîstâ chu i tâ tak tak hung niin, Khrîsmâs indik tak hmangtû hung ni tâ’ng i tih.
Ran bu pêkna thlêng lê khrâws hi Sandamtû Îsû Khrîstâ nun lê inthlung zawm tlat a nih. Îsû Khrîstâ chun Khrîsmâs hmasa tak chu inngâi tlâwmna lê thu âwinain Khrâws lampui a hrâw dingâ buotsai a um chu a hung hrâw ṭan nghal â. Khrâws umzie indik tak chu thu âwinâ, mânî dit zâwng nêkâ Pathien dit dân inlaltirna chu a nih. Lal Îsû’n, “Tû khawm mi zui a nuom chun, mânî inngâisak dêr lovin, a khrâws putin mi zui râw se” a ti â (Mk.8:34). Hi takâ ei hmû chu, “a khrâws putin” tî a ni â. Îsû chun thû âwi takin a khrâws a lo put ta â, a thu âwina chun ran bu pêkna thlêng lê khrâws chu a phier zawm â. Pâ Pathien-in a Nâupâ chu ran bu pêkna thlêng lê khrâws khêla chun a chawimâwina vê thung ta a nih. “Chu lei chun, Pathien-in amâ chu nasa takin a chawimâwi vê thung ta â, hming po povâ hming chunghnung tak chu a pêk tah” (Phil.2:9). Khrîsmâs ei hmang hin Pathien thu âwina le tlâwmna hmuna mi ṭhuoi lût sien nuom a va um dê. Khrîstâ zârâ Bethlehem-â ran bu pêkna thlêng lê mî ṭîsim Kalvari tlâng lê khrâws chawimâwiâ a um angin, einî khawm Îsû Khrîstâ leiâ ei tlâwmna lê thu âwina hmun peia hin chawimâwiin um ei t’â, Khrîstâ ropuinâ â’n lang hun peia, Amâ zârin ei ropui vê pei ding a nih. Âmên!
Be First to Comment