New American Standard Version Bible-ah, ‘lâwm’ tî thumal hi, vawi 182 (O.T.-122 le N.T.-60) â’n ziek (a inziek). Lâwmnâ, lungngâinâ, vângneinâ, vângduoinâ, hausakna hâi hi, khâw lâia am a um a ei ti chun, a dawngtû lungrilâ a um a nih. A dawngtû lungril chu Pathien thuâ her dik a ni chun, vângduoinâ khawm lâwmnâ’n â’n chang (a inchang) thei bawk (Sâm 31:11). Chuong ang bawkin, a dawngtû lungril chu Pathien thuâ her dik a ni nâw chun, mihriem ngâiâ vângneina khawm, vângduoinaa â’n chang thei bawk.
Ieng leiâ ei lâwm thei nâw am? Bible-in ‘Lâwm rawp ro’ (I Thes. 5:13) a mi tî lâi zingin, ieng leiâ ei lâwm thei nâw am? Mi ṭhenkhat chu, Lalpa-â lâwm tum lovin, a thilpêkâ lâwm ei tum lem hlak. Ei thilpêk lê thil nei hâia chau lâwm ei tum hlak leiin, ei nei nâw hun lê ei pêk thei nâw hun a tlung phât, ei lâwmna a chuoi hlak a nih.
Ei lâwm ding anga ei lâwm thei nâwna san dang chu, ei lâwmna ding tam tak nêkin lâwm lo ding ei thlîr/zawng tlat lei a nih. Pathien-in ei lâwmna lê ṭhatna dingin thil tam tak a mi thâwpêk hâi, hmû lê hrein, Amâ kuoma lâwm thû hril nêkin, mi thâwpêk sien tiâ ei beisei lê Pathien-in a mi la pêk lo ei dap kuol hlak leiin ei lâwm thei ngâi nâw a nih.
Mi ṭhenkhat chun, Lalpa-â lâwmnâ zawng lovin, hnuoiah lâwmna an zawng lem hlak leiin an lâwm thei ngâi nâw a nih. Rawng bâwlnâ ei tî khawm hi, Pathien-â inthawk lê mi kotû tâ ding lê Amâ ropuina ding ni lovâ mânî hamṭhatna lê hming ṭhatna ding an zawng leiin, an lâwmna chun sâwt a dai ngâi naw â, hlimna lê lâwmna famkim an hmu ngâi bawk nâw a nih.
Ieng angâ lâwm ding am ei ni â? ‘A lâwmna chu Lalpa dâna a ni lem’ Sâm 1:2-â ziek angin, lâwmnâ hi Lalpa-â innghat chun, vângduoinâ, natnâ, thîna hâi khawm hi, lâwmnain a thlâkpêk hlak a nih. Zâwlnei Habakkuk chu a fâk zawngna lê â’n nghatna (a innghatna) po po suksietpêkâ a um vawng hnung khawmin, ‘Lalpa-a chun hlim ka t’â, ka sandamna Pathien-a chun lâwm pei ka tih’ (Hab. 3:18) a ti thei a nih. A san chu, a lâwmna chu, mihriema ni lovin, Lalpâ dâna a ni lem lei a nih.
Lȃwmin lȃwm phawt ei tih:
Bible-in i hâusak, i pasiet, i hrisêl, i var, hmun le hmâng i nei, i hmêl ṭhat leiin lâwm rawh a mi ti nawh. Chun, khawvêlâ mi vângnei tak, mi hlâwtling tak lê thil thaw thei tak i nî leiin, lâwm rawh khawm a mi ti chuong bawk nawh. An’ (a ni) leh, ei lâwmna ding chu ie’m (ieng a,) ni tâ’ng a t’â? Luka 10:20 ei tiem chun, Îsû Khrîstâ’n “…khawhrî hai in thû thuâ an um leiin, lâwm nâw ro, vânâ in hming hâi ziek a nî leiin lâwm lem ro” a ti â, chu chu ei lâwmna ding tak lem a nih.
Khawvêl mâwinâ, hausaknâ, thiemnâ, varnâ, hrisêlna lê a dang dang hâi hi, khawvêl bo ruolâ bohmang el ding an ni â. Lal Îsû Khrîstâ’n, a thisenin nang lê kei Vân Hringna Lêkhabuâ hming a ziek hâi ruok chu, khawvêl hi bo sien khawm sukbo lê thâi hmang thei ni ta nâw ni. Chuleiin vânâ chatuonâ um zing dingâ ei hming ziekâ um chu, ei lâwmna, innghatna lê suong ding tak a nî leiin, ‘Lâwmin lâwm phawt lem ei tîu’.
‘Lâwmin ei lâwm phawt’ nâwkna san ding dang chu, hnuoiâ ei beiseina po po lo chuoiin, hlâwsamin, ei hrisêlnâ tla hnuoiin, ei inbuotsainâ lê rem ruotnâ hâi po po khawvêl mit hmuin chang nâw inlâ khawm, beidawngnâ innam kûn el lovin, Lal Îsû Khrîstâ chun, ‘Lâwm unlâ, nasa takin hlim ro, vânah in lâwmman a um râwn si â’ (Matt. 5:12) a tî a nih. ‘Lâwm unlâ, hlim ro’ mi titû hi hnuoi lê vân ro rêltû, iengkim siemtû lê neitû a ni â. Amâ ringtu hâi tâ dingâ chatuon lâwmnâ chuoi thei lo ding, vân hmuna a mi buotsaipêk hi thlîr lem ei tîu.
“Vân lâwmna kim ka neih theihnân, Lei lâwmna hi mîn ṭhiahsak a, Vân nun hlutzia ka hriat theih nan, Hringnun nepzia mîn hriattir ṭhin”
Be First to Comment